ឯកឧត្តម ពេជ្រ វាសនា អនុរដ្ឋលេខាធិការក្រសួងធនធានទឹក ដឹកនាំកិច្ចប្រជុំលើកដំបូង គណៈកម្មការតាមដាន និងត្រួតពិនិត្យការអនុវត្តគម្រោងស្តង់ដារជាតិប្រព័ន្ធធារាសាស្ត្រ
ភ្នំពេញ៖ នៅព្រឹកថ្ងៃព្រហស្បតិ៍ ២កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី៩ ខែឧសភា ឆ្នាំ២០២៤ ឯកឧត្តម ពេជ្រ វាសនា អនុរដ្ឋលេខាធិការក្រសួងធនធានទឹក និងឧតុនិយម និងជានាយកចាត់ចែងគម្រោងស្តង់ដាជាតិប្រព័ន្ធធារាសាស្ត្រ (ប្រព័ន្ធស្រោចស្រព និងប្រព័ន្ធដោះទឹក) បានអញ្ជើញដឹកនាំកិច្ចប្រជុំលើកដំបូង របស់គណៈកម្មការតាមដាន និងត្រួតពិនិត្យការអនុវត្តគម្រោងស្តង់ដាជាតិប្រព័ន្ធធារាសាស្ត្រ។
សូមជម្រាបថា កិច្ចប្រជុំមានការចូលរួមពីមន្ត្រីជាន់ខ្ពស់ និងមន្ត្រីបច្ចេកទេសក្រសួងធនធានទឹក និងឧតុនិយម តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) ក្រុមការងារជំនាញការជប៉ុន តំណាងក្រសួងសាធារណការ និងដឹកជញ្ជូន តំណាងក្រសួងកសិកម្ម រុក្ខាប្រមាញ់ និងនេសាទ តំណាងក្រសួងអភិវឌ្ឍន៍ជនបទ តំណាងវិទ្យាស្ថានបច្ចេកវិទ្យាកម្ពុជា និងតំណាងសកលវិទ្យាល័យភូមិន្ទកសិកម្ម សរុបចំនួន ៤៥នាក់។
ឯកឧត្តមអនុរដ្ឋលេខាធិការ បានឱ្យដឹងថា កិច្ចប្រជុំនាពេលនេះមានគោលបំណងគឺចែករំលែកព័ត៌មានស្តីពីទំហំការងារគម្រោង រយៈពេលអនុវត្តគម្រោង និងវឌ្ឍនភាពការងារគម្រោងដែលសម្រេចមកទល់ពេលនេះជូនដល់សមាជិក សមាជិការបស់គណៈកម្មការតាមដាន និងត្រួតពិនិត្យការអនុវត្តគម្រោងស្តង់ដាជាតិប្រព័ន្ធធារាសាស្ត្រ។
សូមបញ្ជាក់ថា គម្រោងនេះ មានរយៈពេល ៤ឆ្នាំ ដោយបានចាប់ផ្តើមដំណើរការសកម្មភាពគម្រោងនៅក្នុងខែមីនា ឆ្នាំ២០២២ ហើយគ្រោងនឹងបញ្ចប់នៅក្នុងខែមីនា ឆ្នាំ២០២៦ ខាងមុខ។
គម្រោងស្តង់ដាជាតិនេះ មានសារៈសំខាន់សម្រាប់ការសិក្សាគ្រោងប្លង់ និងការរៀបចំផែនការគ្រប់គ្រងប្រព័ន្ធធារាសាស្ត្រនៅទូទាំងប្រទេស។
ក្នុងឱកាសនោះ ឯកឧត្តមអនុរដ្ឋលេខាធិការ បានសំណូមពរដល់សមាជិក សមាជិការបស់គណៈកម្មការតាមដាន និងត្រួតពិនិត្យការអនុវត្តគម្រោងស្តង់ដាជាតិប្រព័ន្ធធារាសាស្ត្រ សហការគ្នាឱ្យបានល្អ និងផ្តល់នូវអនុសាសន៍ពាក់ព័ន្ធនឹងបញ្ហាប្រឈមនានា ក្នុងអំឡុងពេលនៃការអនុវត្តស្តង់ដាជាតិប្រព័ន្ធធារាសាស្ត្រ ៕
