អ្នកនាំពាក្យអយ្យការអមសាលាដំបូងខេត្តស្ទឹងត្រែង ចេញប្រកាសព័ត៌មាន ជុំវិញករណីចុះបង្ក្រាប ឃាត់ខ្លួនជនសង្ស័យ ៥នាក់ រកឃើញគ្រឿងញៀន ២៤០គីឡូក្រាម កាំភ្លើងខ្លី១ដើម នៅស្រុកបុរីអូរស្វាយសែនជ័យ
ភ្នំពេញ៖ អ្នកនាំពាក្យអយ្យការអមសាលាដំបូងខេត្តស្ទឹងត្រែង នៅថ្ងៃទី១ ខែឧសភា ឆ្នាំ២០២៤ បានចេញសេចក្តីប្រកាសព័ត៌មាន ជុំវិញករណីសំណុំរឿងព្រហ្មទណ្ឌទទួលពីមន្ត្រីនគរបាលប្រឆាំងបទល្មើសគ្រឿងញៀន ដែលបានចុះបង្ក្រាប ឃាត់ខ្លួនជនសង្ស័យចំនួន ៥នាក់ រកឃើញគ្រឿងញៀនទម្ងន់ ២៤០គីឡូក្រាម កាំភ្លើងខ្លី១ដើម និងទ្រព្យសម្បត្តិមួយចំនួន ប្រព្រឹត្តនៅភូមិក្រឡាពាស ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែង កាលពីថ្ងៃទី២៧ ខែមេសា ឆ្នាំ២០២៤។
អយ្យការអមសាលាដំបូងខេត្តស្ទឹងត្រែង សម្រេចចោទប្រកាន់ជនសង្ស័យចំនួន៩នាក់ (ជនជាតិឡាវ១នាក់) និងបក្ខពួក ពីបទល្មើសរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន កាន់កាប់អាវុធដោយគ្មានការអនុញ្ញាត និងសម្អាតប្រាក់ តាមមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន មាត្រា២០ នៃច្បាប់ស្តីពីការគ្រប់គ្រងអាវុធគ្រឿងផ្ទុះ និងគ្រាប់រំសេវ និងមាត្រា៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេវរវកម្ម ។