សម្តេចធិបតី៖ កម្ពុជានៅពឹងគេដកដង្ហើម ព្រោះកំពង់ផែយើងនៅរាក់ ដូច្នេះយើងត្រូវធ្វើផែទឹកជ្រៅ ដើម្បីក៉ំពឹងដង្ហើមគេដក

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា កម្ពុជានៅពឹងគេដកដង្ហើមនៅឡើយ ព្រោះកំពង់ផែយើងនៅរាក់នៅឡើយ ដូច្នេះយើងត្រូវធ្វើផែទឹកជ្រៅ ដើម្បីក៉ំពឹងដង្ហើមគេដក។

សម្តេចធិបតី ហ៊ុន ម៉ាណែត បានថ្លែងបែបនេះ ក្នុងឱកាសដែលសម្តេចអញ្ជើញជួប សំណេះសំណាលជាមួយមន្រ្តីរាជការ បុគ្គលិក កម្មករ និយោជិក កំពង់ផែស្វយ័តក្រុងព្រះសីហនុ នាព្រឹកថ្ងៃទី០១ ខែឧសភា ឆ្នាំ២០២៤។

សម្តេចធិបតី ហ៊ុន ម៉ាណែត បានមានប្រសាសន៍ថា វិស័យកំពង់ផែ គឺជាវិស័យមួយក្នុងចំណោមវិស័យអាទិភាពរបស់រាជរដ្ឋាភិបាល។ការដឹកជញ្ជូនតាមផ្លូវទឹក បានជួយក្នុងការប្រកួតប្រជែងខាងវិស័យឧស្សាហកម្ម កសិ-ឧស្សាហកម្ម និងកសិកម្ម។ កំពង់ផែស្វយ័តក្រុងព្រះសីហនុ បានដើរតួយ៉ាងសំខាន់ណាស់ តែកំពង់ផែនៅរាក់នៅឡើយ បច្ចុប្បន្នយើងកំពុងសាងសង់កំពង់ផែទឹកជ្រៅ ដើម្បីក៉ំឲ្យពឹងដង្ហើមគេដក ព្រោះនាវាធំៗដឹកទំនិញមកមិនអាចចូលចតបាន ដូច្នេះយើងត្រូវដឹកនាវាតូចៗទៅចូលចត និងលើកទាក់ទំនិញនៅសិង្ហបុរី។

សម្តេចធិបតី នាយករដ្ឋមន្ត្រី បានបញ្ជាក់ថា កំពង់ផែស្វយ័តក្រុងព្រះសីហនុ ក៏បានរៀបចំពិធីបើកការដ្ឋាន សាងសង់ចំណតផែកុងតឺន័រទឹកជ្រៅថ្មី-ជំហានទី១ មានប្រវែង ៣៥០ម៉ែត្រ ជម្រៅទឹក ១៤,៥ ម៉ែត្រ កាលពីឆ្នាំ២០២៣។ ចំណតផែថ្មី-ជំហានទី១នេះ មានសមត្ថភាពអាចអនុញ្ញាតឱ្យនាវាប្រមាណជាង ៩៣% ក្នុងតំបន់ចូលចតនៅកំពង់ផែ ស្វយ័តក្រុងព្រះសីហនុ ដែលបច្ចុប្បន្នមានត្រឹមតែ ១៨% ប៉ុណ្ណោះអាចចូលចតបាន ហើយគម្រោងនេះនឹងបញ្ចប់ការសាងសង់នៅក្នុងអំឡុងឆ្នាំ២០២៦។ កំពង់ផែស្វយ័តក្រុងព្រះសីហនុ ក៏គ្រោងនឹងពង្រីកសមត្ថភាពបន្ថែមទៀត តាមរយៈគម្រោងសាងសង់ចំណតផែកុងតឺន័រទឹកជ្រៅថ្មី ជំហានទី២ មានប្រវែង ៤០០ម៉ែត្រ ជម្រៅទឹក ១៦,៥ម៉ែត្រ និងចំណតផែកុងតឺន័រទឹកជ្រៅថ្មី ជំហានទី៣ មានប្រវែង ៤៣០ម៉ែត្រ ជម្រៅទឹក ១៧,៥ម៉ែត្រ រួមជាមួយនឹងគម្រោងបំពាក់ ឧបករណ៍បច្ចេកទេសទំនើបៗផ្សេងៗ ដើម្បីគាំទ្រដល់ប្រតិបត្តិការរបស់កំពង់ផែឱ្យកាន់តែមាន ប្រសិទ្ធភាពប្រកបដោយស្តង់ដារខ្ពស់ ៕