ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា រាជរដ្ឋាភិបាលកំពុងជួយដោះស្រាយបញ្ហាជូនប្រជាពលរដ្ឋ ជាបន្តបន្ទាប់ មិនបានដេកមើលការលំបាករបស់ប្រជាពលរដ្ឋឡើយ ។
ក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតភូមិឱភាសាំង ឃុំកណ្តឹង ស្រុកបាទី ខេត្តតាកែវ នាថ្ងៃទី១១ ខែមេសា ឆ្នាំ២០២៤ សម្ដេចធិបតីបានឱ្យដឹងថា ជាការពិតណាស់ បញ្ហាផ្ទះបុរីមានបញ្ហាគាំងដោយសារបញ្ហាកូវីដ តែរាជរដ្ឋាភិបាលក៏កំពុងខិតខំដោះស្រាយជាបន្តបន្ទាប់ ជាលំដាប់លំដោយ គ្រាន់តែយូរ ឬឆាប់ប៉ុណ្ណោះ។ យើងមិនអាចយករូបមន្តសម្លាប់មេមាន់នោះទេ យើងត្រូវធ្វើយ៉ាងម៉េចឱ្យមេមាន់នៅរស់ ដើម្បីមានពងមាន់សម្រាប់បង្កើនចំនួនមេមាន់ ឬយកពងមាន់ខ្លះមកធ្វើម្ហូបអាហារជាដើម។
សម្ដេចបញ្ជាក់ថា «រាជរដ្ឋាភិបាលមិនបានដេកមើលការលំបាករបស់ប្រជាជននោះទេ, ក្រសួងរៀបចំដែនដី នគរូបនីយកម្ម និងសំណង់ ដែលមានឧបនាយករដ្ឋមន្ត្រី សាយ សំអាល់ ជារដ្ឋមន្ត្រីក្រសួងនេះ បាននិងកំពុងធ្វើការប្រចាំថ្ងៃជាមួយបុរី ជាមួយប្រជាពលរដ្ឋដែលជាអ្នកទិញ ដើម្បីដោះស្រាយបន្តិចម្ដងៗ ក្នុងនោះមានប្រជាពលរដ្ឋរាប់ម៉ឺននាក់ដែលបាននិងកំពុងដោះស្រាយជាបន្តបន្ទាប់»។
សម្ដេចធិបតី បានអំពាវនាវឱ្យប្រជាពលរដ្ឋជឿទុកចិត្តលើរាជរដ្ឋាភិបាល ការខិតខំដោះស្រាយបញ្ហាជូនប្រជាពលរដ្ឋ គឺជាគោលដៅធំបំផុត ហើយធ្វើយ៉ាងម៉េចឱ្យក្រុមហ៊ុនអភិវឌ្ឍន៍មានលំនឹងក្នុងការបន្តកសាង-ប្រគល់ផ្ទះជូនអតិថិជនរបស់ខ្លួន។
សម្ដេចធិបតី ហ៊ុន ម៉ាណែតបន្ថែមថា វិបត្តិសេដ្ឋកិច្ចបានធ្វើឱ្យប៉ះពាល់ជាសាកល ក្នុងនោះមានក្រុមហ៊ុនបរទេសជាច្រើនត្រូវបានបិទ ឬបិទសាខា។ ប៉ុន្តែមកដល់ពេលនេះ ក៏មានក្រុមហ៊ុនបុរីលំនៅដ្ឋានខ្លះក៏បានបន្តដំណើរការគម្រោងរបស់ខ្លួនឡើងវិញបណ្ដើរៗហើយ ហើយសម្ដេចធិបតីមានជំនឿថា ទៅថ្ងៃខាងមុខវិស័យចលនទ្រព្យនឹងមានកំណើនឡើងវិញ ខណៈឥឡូវនេះក៏នៅតែមានក្រុមហ៊ុនអន្តរជាតិពីខាងក្រៅរៀបចំគម្រោងអភិវឌ្ឍន៍វិស័យអចលនទ្រព្យនៅកម្ពុជាទៀតដែរ ហើយគម្រោងអភិវឌ្ឍន៍ទាំងនោះនឹងកាន់តែរឹងមាំ និងមានភាពធន់នឹងវិបត្តិសេដ្ឋកិច្ច ដូច្នេះសូមប្រជាពលរដ្ឋជឿទុកចិត្តលើដំណោះស្រាយរបស់រាជរដ្ឋាភិបាល៕
