ឧត្តមសេនីយ៍ឯក សៀក សុជាតិ ជួបសំណេះសំណាលសួរសុខទុក្ខបងប្អូនពលករកម្ពុជា ដែលវិលត្រលប់មកស្រុកកំណើតថ្ងៃចូលឆ្នាំ និងសម្រួលការធ្វើដំណើរចូលចេញនៅច្រកទ្វារអន្តរជាតិអូស្មាច់
ភ្នំពេញ៖ នាព្រឹកថ្ងៃទី៥ ខែមេសា ឆ្នាំ២០២៤ នៅច្រកទ្វារអន្តរជាតិអូស្មាច់ ឯកឧត្តម ឧត្តមសេនីយ៍ឯក សៀក សុជាតិ រដ្ឋលេខាធិការក្រសួងការពារជាតិ ប្រធានក្រុមទី២ គណៈកម្មការចំពោះកិច្ចរាជរដ្ឋាភិបាលបានដឹកនាំសមាជិក គណៈកម្មការចំពោះកិច្ច និងស្ថាបន័ពាក់ព័ន្ធ ជួបជាមួយមន្ត្រីស្ថាប័នអន្តោប្រវេសន៍ភាគីថៃ និងជួបសំណេះសំណាលសួរសុខទុក្ខបងប្អូនពលករកម្ពុជា ដែលវិលត្រលប់មកស្រុកកំណើត អំឡុងពេលពិធីបុណ្យចូលឆ្នាំថ្មី ប្រពៃណីជាតិ។
ជាមួយគ្នានេះ ឯកឧត្តម ឧត្តមសេនីយ៍ឯក សៀក សុជាតិ ក៏បានសម្រួលដល់ដំណើរចូលចេញប្រទេសជូនពលករកម្ពុជា ក្នុងឱកាសបុណ្យចូលឆ្នាំប្រពៃណីជាតិខ្មែរ នាពេលខាងមុខ សំដៅយកចិត្តទុកដាក់សម្របសម្រួល និងសហការរៀបចំសណ្តាប់ធ្នាប់របៀបរៀបរយនៅបរិវេណប៉ុស្តិ៍ច្រកទ្វារចូល-ចេញប្រទេសឲ្យបានល្អ សំដៅបញ្ជៀសការកកស្ទះ និងបញ្ហាសុខភាពរបស់ពលករ និងអ្នកដំណើទូទៅជូនដល់ពួកគាត់។
នៅក្នុងឱកាសនោះ ឯកឧត្តម ឧត្តមសេនីយ៍ សៀក សុជាតិ បានណែនាំលោក ហោរ ជិនវិរយុទ្ធ អភិបាលរងខេត្តឧត្តរមានជ័យ និងស្ថាប័នពាក់ព័ន្ធច្រកទ្វារព្រំដែនរៀបចំបាយកកញ្ចប់ ទឹកសុទ្ធ និងរៀបចំទីស្នាក់ការជូនមន្ទីសុខាភិបាល របស់ខេត្តឧត្តរមានជ័យ នៅច្រកទ្វាអន្តជាតិអូស្មាច់ ត្រៀមជួយព្យាបាលសង្រ្គោះបន្ទាន់ និងសម្រួលដល់ការធ្វើដំណើរចូល-ចេញប្រទេសជូនពលករកម្ពុជាក្នុងឱកាសបុណ្យចូលឆ្នាំថ្មីប្រពៃណីជាតិខាងមុខ។
ឯកឧត្តម ឧត្តមសេនីយ៍ឯក សៀក សុជាតិ បានណែនាំថា ដើម្បីផ្ដល់ភាពងាយស្រួលក្នុងការធ្វើដំណើរចេញចូល ឆ្លងកាត់ព្រំដែនរបស់ពលករខ្មែរតាម ច្រកទ្វារព្រំដែន អភិបាល នៃគណៈអភិបាលខេត្តទាំងបី បន្ទាយមានជ័យ ឧត្តរមានជ័យ និង ព្រះវិហារ ជាសមាជិកគណៈកម្មការចំពោះកិច្ច ត្រូវដឹកនាំចាត់ចែងអនុវត្តតាមស្មារតីនៃសេចក្ដី សម្រេចលេខ៩៩ ស.ស.រ ចុះថ្ងៃទី ១៣ ខែកញ្ញា ឆ្នាំ២០២៣ របស់រាជរដ្ឋាភិបាល ឲ្យមានប្រសិទ្ធិភាព នូវកិច្ចការមួយចំនួនដូចខាងក្រោម៖
ទី១-អាជ្ញាធរសា្ថប័នពាក់ព័ន្ធ ប្រចាំនៅតាមបណ្តាច្រកទ្វារព្រំដែនទាំងអស់ ត្រូវបម្រើសេវា ជួយសម្របសម្រួលដល់ការធ្វើដំណើរចេញចូលប្រទេស ជូនប្រជាពលរដ្ឋ និងពលករកម្ពុជាក្នុង អំឡុងពេលនៃការវិលត្រឡប់របស់ពួកគាត់មកទឹកដីកម្ពុជា ដើម្បីចូលរួមអបអរសាទរពិធីបុណ្យ ចូលឆ្នាំថ្មីប្រពៃណីជាតិខ្មែរនាពេលខាងមុខនេះ។
ទី២-ជំរុញឲ្យសមត្ថកិច្ចនៅចំណុចត្រួតពិនិត្យ និងច្រកត្រួតពិនិត្យពង្រឹងវិធានការត្រួតពិនិត្យ ការឆ្លងកាត់ព្រំដែនឲ្យបានហ្មត់ចត់ បង្កលក្ខណៈងាយស្រួល ដល់ការធ្វើដំណើរចេញចូលរបស់អាជីវករ និងពលករដែលកាន់ឯកសារឆ្លងដែនស្របច្បាប់ឲ្យបានឆាប់រហ័ស។ ទន្ទឹមនឹងនោះត្រូវចាត់វិធានការ ទប់ស្កាត់ការចេញចូលដោយប្រើប្រាស់ឯកសារឆ្លងដែនមិនប្រក្រតី។
ទី៣-ណែនាំដល់អាជ្ញាធរមានសមត្ថកិច្ច ឈរជើងនៅតាមបណ្តាច្រកទ្វារព្រំដែនទាំងអស់ត្រូវ បញ្ឈប់ជាបន្ទាន់នូវការចេញឯកសារឆ្លងដែនមិនប្រក្រតី មិនត្រូវយកកម្រៃក្រៅផ្លូវការពីពលករនៅ ពេលពួកគាត់ឆ្លងកាត់ចេញចូលតាមច្រកទ្វារព្រំដែន។
ទី៤-ត្រូវបិទច្រករបៀងខុសច្បាប់ទាំងអស់ ក្នុងដែនសមត្ថកិច្ចរបស់ខ្លួន ជាមួយនោះត្រូវចាត់វិធានការតាមផ្លូវច្បាប់ឲ្យបានម៉ឺងម៉ាត់ក្នុងការ បង្ក្រាបសកម្មភាពមខ្យល់ និងអ្នកសមគំនិតដែល អូសទាញប្រជាពលរដ្ឋឲ្យឆ្លងដែនខុសច្បាប់តាមគ្រប់រូបភាព។
ទី៥-ប្រមែប្រមូលព័ត៌មានពាក់ព័ន្ធនឹងការឆ្លងដែន របស់ពលករតាមបណ្ដាច្រកទ្វារព្រំដែន គ្រប់គ្រងឲ្យបាននូវលំហូរពលករចេញចូលឆ្លងកាត់ព្រំដែន និងខិតខំដោះស្រាយបញ្ហាប្រឈមនានា ដែលកើតមានឡើងជូនដល់ពួកគាត់។
ទី៦-ណែនាំដល់រដ្ឋបាល ក្រុង ស្រុក ធ្វើការផ្សព្វផ្សាយឲ្យបានទូលំទូលាយ ជាប់ជាប្រចាំជូន ដល់ប្រជាពលរដ្ឋ ក្នុងដែនសមត្ថកិច្ចរបស់ខ្លួន ពីការផ្តល់សេវាប័ណ្ណព្រំដែនជូនពួកគាត់ដោយគ្មាន ការរើសអើង និងមិនយកកម្រៃក្រៅផ្លូវការ ព្រមទាំងផ្សព្វផ្សាយឲ្យពួកគាត់យល់ដឹងពីបែបបទនីតិវិធីន ការឆ្លងកាត់ព្រំដែន នៅពេលធ្វើដំណើរចេញចូលឆ្លងកាត់ព្រំដែន ត្រូវមានឯកសារស្របច្បាប់។
ទី៧-ត្រូវរៀបចំយន្តការដឹកនាំត្រូតពិនិត្យ ការអនុវត្តវិធានការដែលបានដាក់ចេញ និងឲ្យមានមន្ត្រីទទួលបន្ទុក តាមដានកិច្ចការច្បាស់លាស់។ ត្រូវមានកម្មវិធីចុះត្រួតពិនិត្យជាក់ស្ដែងក្នុងការអនុវត្ត តួនាទី ភារកិច្ច ទទួលខុសត្រូវរបស់មន្ត្រីច្រកទ្វារព្រំដែន ដើម្បីក្រើនរំលឹកលើកទឹកចិត្តកែលម្អ និង ដោះស្រាយភាព មិនប្រក្រតី ដែលកើតមានឡើងតាមអភិក្រមការងារ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។
ទី៨-ត្រូវធ្វើរបាយការណ៍ប្រចាំខែ ត្រីមាស ឆមាស និងឆ្នាំ ពីសភាពការណ៍ និងការដោះស្រាយ បញ្ហាដំណើរចេញចូលរបស់ពលករខ្មែរ តាមច្រកព្រំដែនមក ក្រុមការងារទី២ គណៈកម្មការចំពោះកិច្ច និងត្រូវរាយការណ៍បន្ទាន់ ដើម្បីមានវិធានការដឹកនាំ និងណែនាំទាន់ពេលវេលាក្នុងករណីចាំបាច់ ៕
