នាយករដ្ឋមន្រ្តីថៃ ផ្ញើលិខិតអបអរសាទរ ជូនចំពោះសម្តេចតេជោ ហ៊ុន សែន ក្នុងឱកាសត្រូវបានបោះឆ្នោតជ្រើសរើសជា ប្រធានព្រឹទ្ធសភា នីតិកាលទី៥

ភ្នំពេញ៖ នាយករដ្ឋមន្រ្តីថៃ ឯកឧត្ដម Srettha Thavisin បានផ្ញើសារលិខិតអបអរសាទរ ជូនចំពោះសម្តេចអគ្គមហាសេនាបតីតេជោ ហ៊ុន សែន ក្នុងឱកាសសម្តេចត្រូវបានបោះឆ្នោតជ្រើសរើស ជាប្រធានព្រឹទ្ធសភា នីតិកាលទី៥ ក្នុងសម័យប្រជុំដំបូងព្រឹទ្ធសភា នីតិកាលទី៥ នៅថ្ងៃទី៣ ខែមេសា ឆ្នាំ២០២៤ ក្រោមព្រះរាជាធិបតីដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

នាយករដ្ឋមន្រ្តីថៃ ឯកឧត្ដម Srettha Thavisin បានបញ្ជាក់ក្នុងលិខិតទាំងស្រុងយ៉ាងដូច្នេះថា៖  «ខ្ញុំសូមអបអរសាទរយ៉ាងស្មោះស្ម័គ្រចំពោះសម្ដេចតេជោ ដែលត្រូវបានបោះឆ្នោតជ្រើសតាំងជាប្រធានព្រឹទ្ធសភា នៃព្រះរាជាណាចក្រកម្ពុជា។ ការជាប់ឆ្នោតរបស់សម្ដេច បានឆ្លុះបញ្ចាំងពីការទុកចិត្តរបស់ប្រជាជនកម្ពុជាចំពោះការដឹកនាំរបស់សម្ដេច និងសុភវិនិយច្ឆ័យនៅក្នុងលើកកម្ពស់ សនិ្តភាព ស្ថិរភាព និងភាពរុងរឿងនៃប្រទេសជាតិ»។
«ខ្ញុំមានជំនឿចិត្តថាទំនាក់ទំនងទ្វេភាគីរវាងថៃ និងកម្ពុជានឹងបន្តរីកចម្រើនទៅមុខ។ តាំងនាម ឱ្យប្រជាជននៃព្រះរាជាណាចក្រថៃ ខ្ញុំសូមជូនពរឱ្យ សម្ដេច និងសម្ដេចកិត្តិព្រឹទ្ធបណ្ឌិត ព្រមទាំងប្រជាជនកម្ពុជាមានសុភមង្គល និងសុខភាពល្អ។ សូមសម្ដេចតេជោទទួលយកការគោរពរាប់អានពីខ្ញុំ»៕