លោកជំទាវ នាយឧត្តមសេនីយ៍ ដាំ ដារីនី៖ ការចូលរួមបរិច្ចាគឈាមគឺជាសកម្មភាពដ៏ល្អប្រពៃដែលប្រជាជនទូទៅ ត្រូវចូលរួមផ្តល់ឈាមដោយស្ម័គ្រចិត្តដើម្បីជួយសង្គ្រោះជនរងគ្រោះ ទាំងឡាយដែលត្រូវការឈាម

ភ្នំពេញ៖ លោកជំទាវ នាយឧត្តមសេនីយ៍ ដាំ ដារីនី រដ្ឋលេខាធិការក្រសួងការពារជាតិ បានលើកឡើងថា ការចូលរួមបរិច្ចាគឈាមគឺជាសកម្មភាពដ៏ល្អប្រពៃដែលប្រជាជនទូទៅ ត្រូវចូលរួមផ្តល់ឈាមដោយស្ម័គ្រចិត្តដើម្បីជួយសង្គ្រោះជនរងគ្រោះ ទាំងឡាយដែលត្រូវការឈាម។

ក្នុងឱកាសអញ្ជើញជាអធិបតី ក្នុងកម្មវិធីស្ម័គ្រចិត្តបរិច្ចាគឈាមតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិ លោកជំទាវ នាយឧត្តមសេនីយ៍ ដាំ ដារីនី បានថ្លែងអំណរគុណចំពោះ នាយទាហាន នាយទាហានរង និងពពលទាហានទាំងអស់ ដែលស្មគ្រ័ចិត្ត ក្នុងការបរិច្ចាគឈាម នេះបង្ហាញឱ្យឃើញពីការចូលរួមរបស់ បងប្អូន យោធិននៃកងយោធពលខេមរភូមិន្ទ ក្រៅពីការងារស្នូលដែលជាកម្លាំងដ៏មុតស្រួចក្នុងកិច្ចការពារជាតិ និងកសាងមាតុភូមិបងប្អូនបានចូលរួម ក្នុងកិច្ចការងារសង្គមជាពិសេស ការបរិច្ចាគឈាមក្នុងថ្ងៃនេះ គឺបានកើតឡើងពីការស្ម័គ្រចិត្តពិតប្រាកដ របស់បងប្អូនប្រកបដោយទឹកចិត្តមនុស្សធម៌។

លោកជំទាវក៏បានថ្លែងអំណរគុណដល់ លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមនិង សហការីដែលបានសហការរៀបចំពិធីបរិច្ចាគឈាមនេះឡើងក្នុងថ្ងៃនេះ។ ជាការពិត ការបរិច្ចាគឈាមមានអត្ថប្រយោជន៍ជួយដល់សង្គម ជួយអ្នកជំងឺដែលខ្វះឈាមបង្ហាញពីសាមគ្គីភាពនិងចូលរួមការងារសង្គមដើម្បីប្រទេសជាតិរបស់យើង ម្យ៉ាងវិញទៀតវាជាការរួមចំណែកយ៉ាងសំខាន់ក្នុងការជួយសង្គ្រោះជីវិតជនរងគ្រោះដែលកំពុងសម្រាកព្យាបាលនៅក្នុងមន្ទីរពេទ្យជាទង្វើប្រកបដោយមនុស្សធម៌ដែលឆ្លើយតបទៅនឹងតម្រូវការសង្គមយ៉ាងពិតប្រាកដផងដែរ។

លោកជំទាវ នាយឧត្តមសេនីយ៍បន្តថា កន្លងមកក្រសួង ការពារជាតិបានរៀបចំការបរិច្ចាគឈាមបានចំនួន២លើករួចមកហើយ គឺលើកទី១ នៅថ្ងៃទី៣១ ខែឧសភា ឆ្នាំ២០១៧ មានអ្នកចូលរួមបរិច្ចាគចំនួន ១៨០នាក់ និងលើកទី២ នៅថ្ងៃទី២០ ខែកុម្ភៈ ឆ្នាំ២០២០ មានចំនួនអ្នកបរិច្ចាគចំនួន ៥០០នាក់។ ការចូលរួមបរិច្ចាគឈាមនាថ្ងៃនេះមានគោលបំណង ដើម្បីបង្កើតទម្លាប់និងវប្បធម៌នៃការបរិច្ចាគឈាមដោយស្ម័គ្រចិត្ដ និងជំរុញដល់យោធិនទាំងអស់  ឱ្យចូលរួមសកម្មជាមួយនឹងសេវាកម្មជាតិផ្ដល់ឈាមនៅទូទាំងប្រទេស ដើម្បីធានាឱ្យមានការផ្គត់ផ្គង់ឈាម សម្រាប់អ្នកជំងឺដែលត្រូវការឈាមនៅតាមមន្ទីរពេទ្យទូទាំងប្រទេស ដោយមិនរើសអើង ឬប្រកាន់ជាតិ សាសន៍ ឬសាសនា។

លោកជំទាវ នាយឧត្តមសេនីយ៍ ដាំ ដារីនី បានបញ្ជាក់ថា “ការចូលរួមបរិច្ចាគឈាមគឺជាសកម្មភាពដ៏ល្អប្រពៃដែលប្រជាជនទូទៅ ជាពិសេស យុវជន យុវនារី ត្រូវចូលរួមផ្តល់ឈាមដោយស្ម័គ្រចិត្តឱ្យបានច្រើនដើម្បីជួយសង្គ្រោះជនរងគ្រោះ ទាំងឡាយដែលត្រូវការឈាម។ អំណោយឈាមរបស់បងប្អូន ក្នុងថ្ងៃនេះគឺជាអំណោយដែលមិន អាចកាត់ថ្លៃបាន ក្នុងការសង្គ្រោះដល់អាយុជីវិតអ្នកជំងឺបានទាន់ពេលវេលាពិសេស អ្នកជំងឺដែលត្រូវការឈាមជាចាំបាច់ ដូចជាជំងឺទាក់ទិននឹងការហូរឈាមតាមប្រដាប់រំលាយអាហារ ការវះកាត់ ជំងឺបេះដូង គ្រោះថ្នាក់ចរាចរណ៍ ការហូរឈាមមិនប្រក្រតីនៅមុន និងក្រោយពេលសំរាលកូន ជំងឺខ្សោយតំរង់នោម និងការព្យាបាលថែទាំជំងឺមហារីកជាដើម”។

លោកជំទាវ រដ្ឋលេខាធិការបានបន្តទៀតថា ជីវិតរបស់ប្រជាពលរដ្ឋខ្មែរ បានចាប់ផ្តើមកម្រើកឡើងជាមួយនឹងជីវភាពកាន់តែប្រសើរនៅក្រោយពេលដែលភ្លើងសង្គ្រាមនៅកម្ពុជាបាន បញ្ចប់ទាំងស្រុង ដោយនយោបាយ ឈ្នះ ឈ្នះ ដែលបានដាក់ចេញដោយ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី។ ការបញ្ចប់ភ្លើងសង្គ្រាមរយៈពេលប្រមាណ ជាងឆ្នាំមកនេះ បានផ្តល់ឱកាស ពេញលេញដល់រាជរដ្ឋាភិបាលរៀបចំដាក់ចេញគោលនយោបាយក្នុងការស្តារអភិវឌ្ឍន៍ ប្រទេសទាក់ទាញ អ្នកវិនិយោគមកបណ្តាក់ទុនបង្កើតការងារជូនប្រជាពលរដ្ឋ។
ក្នុងនីតិកាលទី៧ នេះរាជរដ្ឋាភិបាលដែលដឹកនាំដោយ  សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបន្តនិរន្តរភាពនៃការអភិវឌ្ឍ ដោយបានដាក់ ចេញនូវយុទ្ធសាស្ត្របញ្ចកោណដំណាក់កាលទី១ ជាកម្មវិធីនយោបាយ សម្រាប់ការកសាងនិងការពារ មាតុភូមិឆ្នាំ២០២៣ដល់២០២៨ ហើយមានមានគោលបំណងចម្បងដើម្បីអោយប្រទេសកម្ពុជាក្លាយជា ប្រទេស ដែលមានចំណូលខ្ពស់ឆ្នាំ២០៥០។ វិស័យសុខាភិបាលគឺជាវិស័យសាធារណៈមួយដែលបម្រើ អោយការថែទាំសុមាលភាពរបស់ប្រជាពលរដ្ឋក្នុងនោះរាជរដ្ឋាភិបាលបានកំណត់នូវទិសដៅជាយុទ្ធសាស្ត្រក្នុងការអនុវត្តនៅក្នុងកម្មវិធីនយោបាយនៅគ្រប់ដំណាក់កាលទាំងអស់ក្នុងការដឹកនាំ៕