រដ្ឋមន្ត្រីកិច្ចការនារី សំណូមពរឲ្យថ្នាក់ដឹកនាំសាលា លោកគ្រូ-អ្នកគ្រូ និងអ្នកពាក់ព័ន្ធ លើកកម្ពស់ការចូលរួមរបស់ស្រ្តី និងក្មេងស្រី នៅក្នុងវិស័យឌីជីថល

ភ្នំពេញ៖ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី និងឯកឧត្តម ត្រាក់ ថៃសៀង រដ្ឋលេខាធិការក្រសួងសាធារណៈការ និងដឹកជញ្ជូន នៅថ្ងៃទី២៨ ខែមីនា ឆ្នាំ២០២៤ បានអញ្ជើញចូលរួមក្នុងពិធីសម្ពោធដាក់ឱ្យប្រើប្រាស់ជាផ្លូវការអគារបណ្តុះបណ្តាលឌីជីថលចំនួន១ខ្នង ០១ជាន់ ០២បន្ទប់ ស្ថិតក្នុងបរិវេណសាលាបឋមសិក្សាអង្គបឹងចក សង្កាត់កំបូល ខណ្ឌកំបូល រាជធានីភ្នំពេញ។

អគារបណ្តុះបណ្តាលឌីជីថលនេះ សាងសង់ឡើងក្នុងគោលបំណង គឺអភិវឌ្ឍន៍មូលធនមនុស្ស និងការបណ្តុះបណ្តាលពលរដ្ឋម្នាក់ៗ ឱ្យក្លាយជាពលរដ្ឋឌីជីថល។ ពលរដ្ឋឌីជីថល សំដៅលើពលរដ្ឋគ្រប់រូប ដែលចេះប្រើប្រាស់បច្ចេកវិទ្យាឌីជីថល ក្នុងការកិច្ចការ និងការរស់នៅប្រចាំថ្ងៃ។

ការកសាងអគារបណ្តុះបណ្តាលឌីជីថល នៅក្នុងបឋមសិក្សាអង្គបឹងចក នាឱកាសនេះ គឺជាជំហានចាប់ផ្តើមមួយដ៏មានសារសំខាន់ ដែលឆ្លើយតបនឹងតម្រូវការចាំបាច់ លើការអប់រំបណ្ដុះបណ្ដាលជំនាញឌីជីថល ព្រមទាំងរួមចំណែកកសាងមូលដ្ឋានគ្រឹះផ្នែកឌីជីថល សម្រាប់សិស្សានុសិស្ស ដើម្បីត្រៀមខ្លួនក្នុងការចាប់យកកាលានុវត្តភាព និងទាញយកផលប្រយោជន៍ជា អតិបរមាពីបដិវត្តន៍ឧស្សាហកម្ម៤.០។

នៅក្នុងឱកាសនេះ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានសំណូមពរដល់ថ្នាក់ដឹកនាំសាលា លោកគ្រូ អ្នកគ្រូ និងអ្នកពាក់ព័ន្ធនានា សូមចូលរួមយកចិត្តទុកដាក់ខ្ពស់ ចំពោះការអនុវត្តតាមកម្មវិធីសិក្សារបស់ក្រសួងអប់រំ យុវជន និងកីឡា និងធ្វើយ៉ាងណាជួយដល់កុមារ ទទួលបាននូវគុណវុឌ្ឍិមួយ ដែលស្របតាមបរិវត្តកម្ម ក្នុងយុគសម័យឌីជីថល ដែលបានផ្លាស់ប្តូរអត្ថន័យពីអក្ខរកម្មបែបប្រពៃណី ទៅរកអក្ខរកម្មឌីជីថល(Digital literacy) ដែលជាបំណិនជីវិត (life skill) ដ៏ចាំបាច់សម្រាប់ការសិក្សា ការរស់នៅ និងការបំពេញការងារនៅក្នុងសង្គមសតវត្សទី២១។ ជាពិសេសសំណូមពរដល់គណៈគ្រប់គ្រងនិងអ្នកពាក់ព័ន្ធ យកចិត្តទុកដាក់ដល់យុវជនក្រៅសាលា ជាពិសេសយុវជនដែលបានបាត់បង់ឱកាសសិក្សា ដោយសារកត្តាខ្វះខាតជីវភាព សេដ្ឋកិច្ចគ្រួសារខ្សត់ខ្សោយ និងកត្តាចំណាកស្រុកជាដើម ដោយទាក់ទាញដល់យុវជន ចូលមកទទួលសេវាកម្មបណ្តុះបណ្តាល និងកម្មវិធីអភិវឌ្ឍន៍ សមត្ថភាពយ៉ាងសម្បូរបែប ដូចជា កម្មវិធីបណ្តុះបណ្តាលវិជ្ជាជីវៈ ការស្វែងរកព័ត៌មានការងារ ការប្រឹក្សាអាជីព ការតម្រង់ទិសការសិក្សា កម្មវិធីកុំព្យូទ័រ និងជំនាញផ្សេងៗ។ល។

មជ្ឈមណ្ឌលឌីជីថល គឺជាសាលាដែលនឹងផ្តល់ការអប់រំ និងចំណះដឹងផ្នែកឌីជីថល ដល់ប្រជាជនគ្រប់រូប ជាកម្មវិធី នឹងធ្វើឱ្យមានភាពលេចធ្លោរផ្នែកឌីជីថល និងឈានមុខក្នុងវិស័យឌីជីថល ក្នុងសហគមន៍យើង ក៏ដូចជាអ្នកចូលរួមទទួលផលទាំងអស់ និងកម្មវិធីនឹងផ្តល់ជូននូវចំណេះដឹងឌីជីថល ហើយម្នាក់ៗដែលចូលរួមក្នុងកម្មវិធីនេះ នឹងយកចំណេះដឹងនិងគុណតម្លៃនេះ ទៅអភិវឌ្ឍជាប្រចាំ ដើម្បីធ្វើឱ្យប្រសើរឡើងនូវអនាគតរបស់ខ្លួនម្នាក់ៗ និងដើម្បីសហគមន៍របស់យើងទាំងអស់គ្នា ៕