សូមបង្កើនការប្រុងប្រយ័ត្ន! ភ្លៀងធ្លាក់មួយមេលាយឡំជាមួយខ្យល់កន្ត្រាក់ និងផ្គររន្ទះ បណ្ដាលឲ្យផ្ទះពលរដ្ឋជាង ១០ខ្នង នៅខេត្តបាត់ដំបង រងការខូចខាត
ភ្នំពេញ៖ ភ្លៀងធ្លាក់មួយមេលាយឡំជាមួយខ្យល់កន្ត្រាក់ និងផ្គររន្ទះ បានបណ្តាលឱ្យលំនៅដ្ឋានរបស់ប្រជាពលរដ្ឋ នៅស្រុកមោងឫស្សី ខេត្តបាត់ដំបង ខូចខាតចំនួន១១ខ្នង ស្លាកគណបក្សចំនួន០៨ និងសត្វគោ០២ក្បាលបានងាប់ កាលថ្ងៃទី២៨ ខែមីនា ឆ្នាំ២០២៤។
ប្រភពពីសមត្ថកិច្ចបានឱ្យដឹងថា ហេតុការណ៍គ្រោះថ្នាក់បង្កឡើងដោយគ្រោះធម្មជាតិខាងលើ បានកើតឡើងកាលពីវេលាម៉ោង១៦៖១០នាទីថ្ងៃទី២៨មីនា ឆ្នាំ២០២៤ នៅក្នុងឃុំចំនួន០៤រួមមាន៖ ឃុំព្រៃតូច ឃុំគារ ឃុំកកោះ និងឃុំព្រៃស្វាយ ក្នុងស្រុកមោងឫស្សី នៃខេត្តបាត់ដំបង។
ប្រភពដដែលបានឱ្យដឹងបន្តថា ឃុំដែលរងគ្រោះក្នុងហេតុការណ៍ភ្លៀងធ្លាក់លាយឡំជាមួយខ្យល់កន្ត្រាក់ និងផ្គររន្ទះខាងលើរួមមាន៖ ឃុំព្រៃតូច ប៉ើងដំបូលចំនួន៥ខ្នង និងរលំស្លាកគណបក្សប្រជាជនចំនួន០៥ ឃុំគារ ប៉ើងដំបូលចំនួន០៥ខ្នង និងងាប់សត្វគោ០២ក្បាល និងរលំស្លាកគណបក្សប្រជាជនចំនួន០១ ឃុំកកោះ រលំឃ្លាំងដាក់អីវ៉ាន់០១ខ្នង ទំហំ៣៥ម៉ែត្រ×៧០ម៉ែត្រ ឃុំព្រៃស្វាយ រលំស្លាកគណបក្សប្រជាជនកម្ពុជា០២ស្លាក។ នៅក្នុងគ្រោះធម្មជាតិនេះដែរ មិនបណ្តាលឱ្យមានគ្រោះថ្នាក់អាយុជីវិត ឬមានរបួសដល់មនុស្សឡើយ។
សូមជម្រាបថា កាលពីថ្ងៃទី២៨ ខែមីនា ឆ្នាំ២០២៤ ក្រសួងធនធានទឹក និងឧតុនិយម បានចេញសេចក្តីជូនដំណឹងថា សម្ពាធទាបបន្តគ្របដណ្ដប់មកលើព្រះរាជាណាចក្រកម្ពុជា ប្រទេសថៃ ឈូងសមុទ្ទថៃ ភាគកណ្តាលនៃអាងទន្លេមេគង្គ និងសមុទ្ទចិនខាងត្បូង។ ស្ថានភាពបែបនេះនឹងធ្វើឱ្យចាប់ពីថ្ងៃទី២៨ ដល់ថ្ងៃទី៣០ ខែមីនា ឆ្នាំ២០២៤ តំបន់វាលទំនាប អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់ គ្របដណ្ដប់លើផ្ទៃដីប្រមាណពី១០ទៅ២៥ភាគរយ។ ចំពោះ តំបន់ខ្ពង់រាប អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់ គ្របដណ្ដប់លើផ្ទៃដីប្រមាណពី២០ទៅ៣០ភាគរយ។ រីឯតំបន់មាត់សមុទ្ទ អាចមានភ្លៀងធ្លាក់គ្របដណ្ដប់លើផ្ទៃដីប្រមាណពី១០ដល់២០ភាគរយ៕