សម្តេច ម៉ែន សំអន ថ្លែងកោតសសើរដល់នារីទាំងក្នុងប្រព័ន្ធ និងក្រៅប្រព័ន្ធ បានចូលរួមចំណែកយ៉ាង សំខាន់ក្នុងកិច្ចអភិវឌ្ឍជាតិ

ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន សមាជិកឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បានអញ្ជើញអធិបតីក្នុងពិធីជួបសំណេះសំណាលជាមួយថ្នាក់ដឹកនាំ និងសមាជិក សមាជិកា នៃសាខា សមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងកិច្ចការនារី និង បុគ្គលិក និងស្រ្តីផ្នែក សេវាកម្សាន្តក្នុង សេដ្ឋកិច្ចក្រៅប្រព័ន្ធ ប្រមាណជិត ១.០០០នាក់ ដើម្បីអបអរសាទរ ខួបលើកទី១១៣ ទិវាអន្តរជាតិនារី ៨ មីនា ២០២៤ ក្រោមមូលបទ «ស្រ្តីនិងក្មេងស្រីក្នុងបរិវត្តកម្មឌីជីថល» ដែលបាន រៀបចំឡើងនៅក្រសួងកិច្ចកានារី រាជធានីភ្នំពេញ កាលពីរសៀលថ្ងៃសុក្រ ១៣កើត ខែផល្គុន ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២២ ខែមីនា ឆ្នាំ២០២៤។

ថ្លែងក្នុងឱកាសនោះ សម្តេចកិត្តិសង្គហបណ្ឌិតបានពាំនាំនូវការផ្តាំផ្ញើសាកសួរសុខទុក្ខ និងសេចក្តី នឹករលឹកពីសំណាក់ សម្តេច អគ្គមហាសេនាបតីតេជោ ហ៊ុន សែន ប្រធានក្រុមឧត្តម ប្រឹក្សាផ្ទាល់ ព្រះមហាក្សត្រ និងសម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង ជាប្រធានកិត្តិយសសមាគមនារីកម្ពុជា ដើម្បីសន្តិភាពនិងអភិវឌ្ឍន៍ និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនដល់សមាជិក-សមាជិកាទាំងអស់ដែលបានអញ្ជើញចូលរួមក្នុងកម្មវិធីថ្ងៃនេះ។

សម្តេចកិត្តិសង្គហបណ្ឌិត បានថ្លែងកោតសសើរដល់នារីទាំងក្នុងប្រព័ន្ធ និងក្រៅប្រព័ន្ធ បានចូលរួម ចំណែកយ៉ាងសំខាន់ក្នុងកិច្ចអភិវឌ្ឍជាតិ។ សម្តេចកិត្តិសង្គហបណ្ឌិតក៏បានផ្តាំផ្ញើរដល់នារីទាំងអស់ត្រូវ ចូលរួមថែរក្សាឱ្យបាននូវសន្តិភាព ត្រូវតែ ពង្រឹងសមត្ថភាពខ្លួនឯងទាំងចំណេះដឹង និងជំនាញ ជាពិសេស ពាក់ព័ន្ធ និងបច្ចេកវិទ្យាព័ត៌មានវិទ្យា នៅក្នុងយុគ្គឌីជីថលនេះ សម្រាប់បំពេញភារកិច្ចប្រចាំថ្ងៃ ដោយ ស្មារតីទទួលខុសត្រូវខ្ពស់ ហើយត្រូវបន្ត រក្សាប្រពៃណីថ្លៃថ្នូររបស់ស្រ្តីខ្មែរ ដើមី្បលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរឱ្យបាន គង់វង្ស។

គួររំលឹកផងដែរថា៖ ទិវាអន្តរជាតិនារីលើកទី១១៣ គឺដើម្បីរំលេចសក្តានុពល និងភាពចាំបាច់ នៃការ លើកកម្ពស់ការចូលរួម និងភាពជាតំណាងរបស់ស្រ្តី និងក្មេងស្រីក្នុងយុគសម័យឌីជីថល ប្រកបដោយ ប្រសិទ្ធភាព សុវត្ថិភាព និងធានាបាននូវសិទ្ធិ ព្រមទាំងឱកាសពេញលេញ ក្នុងការទទួលបានជម្រើស និង ភាពជាតំណាងប្រកបដោយសក្តានុពល ក្នុងការចូលរួមចំណែកអភិវឌ្ឍន៍សេដ្ឋកិច្ច និងសង្គមជាតិប្រកប ដោយចីរភាព និងបរិយាបន្ន។

នៅក្នុងកម្មវិធីនោះផងដែរ បុគ្គលិក និងស្រ្តីផ្នែកសេវាកម្សាន្តក្នុងសេដ្ឋកិច្ចក្រៅប្រព័ន្ធចំនួន ជាង ៤០០នាក់ ក្នុងម្នាក់ៗទទួលបានថិវិកា ១០ម៉ឺនរៀល អាវយឺត ១ សាប៊ូ ២ដុំ និងផលិតផលរ៉េវ៉ាឡន ១ឃីត។ ចំណែកឯមន្ត្រីរាជការនៃក្រសួងកិច្ចការនារី ជាង ៥០០នាក់ ក៏ទទួលបានការហូបអាហារ សាមគ្គីរួមគ្នាផងដែរ ៕