ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក ចុះពិនិត្យគម្រោងកែលម្អវិស័យធារាសាស្ត្រកញ្ចប់ទី១ ក្នុងខេត្តកំពង់ធំក្រោមហិរញ្ញប្បទានពីធនាគារអភិវឌ្ឍន៍អាស៊ី

ភ្នំពេញ៖ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានចុះធ្វើការត្រួតពិនិត្យលើកញ្ចប់ទី១ នៃគម្រោងកែលម្អវិស័យធារាសាស្រ្តរបស់ក្រសួងធនធានទឹក និងឧតុនិយមដែលទទួលហិរញ្ញប្បទានពីធនាគារអភិវឌ្ឍន៍អាស៊ី(ADB)រួមមានសំណង់ទំនប់បង្ហៀរប្រវែងបណ្តោយ ១,០០០មែត្រ និងអាងទឹកស្ទឹងជីនិតដែលទើបសាងសង់រួច។

ឯកឧត្តមរដ្ឋលេខាធិការ បានឱ្យដឹងថា ក្រសួងនឹងសហការយ៉ាងជិតស្និទ្ធជាមួយធនាគារអភិវឌ្ឍន៍អាស៊ី (ADB) ធ្វើការពន្លឿនកញ្ចប់សាងសង់ស្ពានប្រវែងបណ្តោយ ១,០០០មែត្រ បន្ថែមទៀតដែលត្រូវដាក់ពីលើទំនប់បង្ហៀរដែលទើបសាងសង់រួច ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋទៅគ្រប់ទិសទីពីភូមិមួយទៅភូមិមួយទៀត ជាពិសេសបង្កភាពងាយស្រួលដល់ការធ្វើដំណើររបស់សិស្សានុសិស្ស មនុស្សចាស់ជរា ស្ត្រីមានផ្ទៃពោះ និងក្រុមគ្រួសារអ្នកជំងឺ នារដូវវស្សាខាងមុខនេះ។

ជាមួយគ្នានោះ ឯកឧត្តមរដ្ឋលេខាធិការ ក៏បានបញ្ជាក់ពីកិច្ចសហការយ៉ាងជិតស្និទ្ធជាមួយក្រសួងសេដ្ឋកិច្ច និងហិរញ្ញវត្ថុ ធនាគារអភិវឌ្ឍន៍អាស៊ី (ADB) និងសហហិរញ្ញប្បទានពីធានាគារវិនិយោគអឺរ៉ុប (EIB) ក្នុងការពន្លឿនកិច្ចការលទ្ធកម្មលើកញ្ចប់ទី២ កញ្ចប់ទី៣ និងកញ្ចប់ទី៤ ឱ្យបានឆាប់ ដើម្បីដំណើរការធ្វើទំនើបកម្មវិស្វកម្មលើការសាងសង់ប្រព័ន្ធប្រឡាយមេស្ទឹងជីនិត ប្រព័ន្ធប្រឡាយរងទី២ ប្រព័ន្ធប្រឡាយរងទី៣ និងប្រព័ន្ធប្រឡាយជើងក្អែបដ៏មានសារសំខាន់សម្រាប់បងប្អូនប្រជាកសិករធ្វើការគ្រប់គ្រងទឹក ប្រើប្រាស់ទឹក និងបញ្ជាទឹកក្នុងតំបន់សន្ទុក តំបន់បារាយណ៍ តំបន់ចំការលើ តំបន់កំពង់ស្វាយ និងតំបន់ក្រុងស្ទឹងសែន ប្រកបដោយស័ក្តិសិទ្ធិភាព និងមាននិរន្តរភាព ៕