គណៈប្រតិភូគណៈកម្មការទី៣ នៃរដ្ឋសភា ចុះពិនិត្យសិក្សាប្រព័ន្ធធារាសាស្ត្រទំនប់ពហុបំណងសេកសក ស្រុករតនមណ្ឌល
ភ្នំពេញ៖ នាព្រឹកថ្ងៃទី២១ ខែមីនា ឆ្នាំ២០២៤ គណៈប្រតិភូគណៈកម្មការផែនការ វិនិយោគ កសិកម្ម រុក្ខាប្រមាញ់នេសាទ អភិវឌ្ឍន៍ ជនបទ បរិស្ថាន ធនធានទឹក និងឧតុនិយម នៃរដ្ឋសភា ដឹកនាំដោយឯកឧត្តមសន្តិបណ្ឌិត ឡូយ សុផាត ប្រធានគណៈកម្មការ បានអញ្ជើញចុះពិនិត្យសិក្សាប្រព័ន្ធធារាសាស្ត្រទំនប់ពហុបំណងសេកសក ស្ថិតនៅភូមិទឹកសាប ឃុំផ្លូវមាស ស្រុករតនមណ្ឌល ចុះពិនិត្យមើលសំណង់ស្ទាក់ទឹកកង្ហត ស្ថិតនៅភូមិទួលអណ្តែត ឃុំចែងមានជ័យ ស្រុកបាណន់ និងចុះពិនិត្យសិក្សាកសិដ្ឋានចិញ្ចឹមសត្វគោ ស្ថិតក្នុងភូមិរស្មីសឹង្ហា ឃុំរស្មីសឹង្ហា ស្រុករតនមណ្ឌល ខេត្តបាត់ដំបង។
តាមប្រសាសន៍លោកប្រធានមន្ទីរធនធានទឹកខេត្តបាត់ដំបង បានមានប្រសាសន៍ថា ប្រព័ន្ធធារាសាស្រ្តទំនប់ពហុបំណងសេកសក មានទីតាំងសំណង់មេស្ថិតនៅក្នុងឃុំផ្លូវមាស ស្រុករតនមណ្ឌល ខេត្តបាត់ដំបង។
គម្រោងនេះ ក្រសួងធនធានទឹក និងឧតុនិយម បានអនុវត្តដោយលើកទំនប់តភ្ជាប់ពីភ្នំមួយទៅភ្នំមួយ (ភ្នំដីប៉ាង ទៅភ្នំកូប) ដើម្បីបង្កើតជាអាងទឹក ដែលមានសមត្ថភាពស្តុកទឹកបានចំនួន២៨៦លានម៉ែត្រគូប។ ទឹកដែលប្រមូលស្តុកទុកនេះ នឹងត្រូវទម្លាក់តាមដងស្ទឹងសង្កែ រួចបន្តចែកចាយតាមប្រឡាយមេ ប្រឡាយរង ទៅស្រោចស្រពលើផ្ទៃដីស្រូវវស្សាចំនួន ៤៧.០០០ហិកតា និងស្រូវប្រាំងចំនួន ១២.០០០ ហិកតា នៅក្នុងស្រុករតនមណ្ឌល បាណន់ សង្កែ និងស្រុកមោងឫស្សី។
គម្រោងនេះ ក៏អាចទាញយកថាមពលវារីអគ្គិសនី ចំនួន ១៣,១០ មេហ្គាវ៉ាត់ ព្រមទាំងកាត់បន្ថយទឹកជំនន់ និងផ្តល់ទឹកសម្រាប់ការប្រើប្រាស់ដល់ក្រុងបាត់ដំបងផងដែរ។ ចំពោះប្រព័ន្ធធារាសាស្រ្តកង្ហតក្នុងពេលកន្លងមកទ្វារទឹកដែលស្ថិតនៅលើដងប្រឡាយមេ ចំនួន ៦កន្លែង ប្រើប្រាស់សន្លឹកសន្ទះទ្វារធ្វើពីបេតុង ដោយសន្ទះទ្វារនីមួយៗមានទម្ងន់០៦តោន ហើយបានធ្វើការផ្លាស់ប្តូរសន្ទះទ្វារទឹកដែលធ្វើពីដែកវិញ ដោយសន្ទះទ្វារនីមួយៗមានទម្ងន់ត្រឹមតែ ២,៥តោន ប៉ុណ្ណោះ ដើម្បីងាយស្រួលដល់ការបិទបើកបញ្ជាបែងចែកទឹក។ ការរៀបចំទ្វារទឹកនេះ ក៏ជាការត្រៀមលក្ខណៈឲ្យបានល្អប្រសើរក្នុងការផ្គត់ផ្គង់ទឹកដល់ដីស្រែប្រជាកសិករសម្រាប់ការបង្កបង្កើនផលស្រូវវស្សាដើមរដូវនាពេលដ៏ខ្លីខាងមុខនេះ។
ឯកឧត្តមសន្តិបណ្ឌិត ឡូយ សុផាត ក៏បានបង្ហាញនូវក្តីសង្ឃឹម និងជំនឿជឿជាក់យ៉ាងមុតមាំថា ប្រព័ន្ធធារាសាស្ត្រទំនប់ពហុបំណងសេកសក និងសំណង់ស្ទាក់ទឹកកង្ហតនឹងអាចផ្តល់ទឹកស្រោចស្រពដល់ប្រជាកសិករនៅស្រុកទាំង៤ខាងលើបានគ្រប់គ្រាន់ ពិសេសតាមរយៈទិសដៅជាយុទ្ធសាស្រ្ត និងផែនការសកម្មភាពជាអាទិភាពដែលក្រសួងបានដាក់ចេញសម្រាប់នីតិកាលទី៧នៃរដ្ឋសភា ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងធ្វើឲ្យវិស័យធនធានទឹក ដើរតួនាទីកាន់តែសំខាន់ថែមទៀត ក្នុងដំណើរការទ្រទ្រង់ការអភិវឌ្ឍសេដ្ឋកិច្ចសង្គមប្រកបដោយចីរភាព ៕
