WB អនុម័តឥណទានបន្ថែម ៣៥លានដុល្លារដល់កម្ពុជា សម្រាប់កែលម្អផ្លូវថ្នល់ដែលធន់ នឹងការប្រែប្រួលអាកាសធាតុ
ភ្នំពេញ៖ ធនាគារពិភពលោក បានអនុម័តឥណទានបន្ថែមចំនួន៣៥លានដុល្លារដល់កម្ពុជា សម្រាប់ការកែលម្អផ្លូវថ្នល់នៅតាមតំបន់ជនបទក្នុងខេត្តចំនួន៣ ដែលមានភាពធន់នឹងការប្រែប្រួលអាកាសធាតុ។ ឥណទាននេះនឹងគាំទ្រដល់គម្រោងកែលម្អការតភ្ជាប់ផ្លូវនៅកម្ពុជា ដែលមានគោលបំណងកែលម្អផ្លូវដែលធន់នឹងអាកាសធាតុសម្រាប់ពលរដ្ឋតាមជនបទ ធ្វើដំណើរទៅកាន់ទីផ្សារ ទៅរកសេវាសុខភាព និងទៅសាលារៀនក្នុងខេត្តចំនួន៣ រួមមាន៖ ខេត្តក្រចេះ កំពង់ចាម និងខេត្តត្បូងឃ្មុំ។
បើតាមសេចក្តីប្រកាសព័ត៌មានរបស់ធនាគារពិភពលោក នៅថ្ងៃទី១៦ ខែមីនា ឆ្នាំ២០២៣ បានបញ្ជាក់ថា ខេត្តទាំង៣មានប្រជាជនសរុបជាង២លាននាក់ ក្នុងនោះ ៨០ភាគរយរស់នៅក្នុងតំបន់ជនបទ។ ទឹកប្រាក់៣៥លានដុល្លារថ្មីនេះ គឺជាឥណទានបន្ថែមពីលើទឹកប្រាក់១០០លានដុល្លារដំបូង ដែលត្រូវបានអនុម័តនៅក្នុងខែកក្កដា ឆ្នាំ២០២០។ ឥណទានបន្ថែមនេះ ក៏នឹងជួយដល់ចំណាយផ្សេងៗទៀត លើសពីការកសាងផ្លូវ ពិសេសផ្តោតលើការចុះកិច្ចសន្យាការងារសាងសង់ផ្លូវថ្នល់។ ការផ្ដល់ឥណទានបន្ថែមរបស់ World Bank គឺក្រោយពីស្ថាប័នមួយនេះ មើលឃើញពីបញ្ហាអតិផរណាខ្ពស់ និងតម្លៃធាតុចូលសំខាន់ៗ វត្ថុធាតុដើមបានកើនឡើងក្នុងរយៈពេល៣ឆ្នាំចុងក្រោយ រួមមានប្រេងឥន្ធនៈ និងប៊ីតុង ដែលបណ្តាលឱ្យមានការចំណាយខ្ពស់ជាងការប៉ាន់ស្មានពីមុន ពិសេសនៅឆ្នាំ២០១៩ មុនពេលគម្រោងកែលម្អការតភ្ជាប់ផ្លូវនៅកម្ពុជា បានអនុម័តដំបូង។
សេចក្តីប្រកាសព័ត៌មានបានឱ្យដឹងបន្តថា បច្ចុប្បន្ន ការងារជួសជុលផ្លូវកំពុងដំណើរការលើផ្លូវជាតិ និងផ្លូវខេត្តគោលដៅក្នុងប្រវែង១៣០គីឡូម៉ែត្រ និងផ្លូវជនបទគោលដៅចំនួន១៤២គីឡូម៉ែត្រ ក្នុងចំណោម២៧០គីឡូម៉ែត្រ។
អ្នកស្រី ម៉ាយ៉ាម ស្លីម Maryam Salim តំណាងធនាគារពិភពលោកប្រចាំប្រទេសកម្ពុជា បានឱ្យដឹងក្នុងសេចក្តីប្រកាសព័ត៌មានថា«លទ្ធភាពទទួលបានសេវាសុខភាព និងទៅសាលារៀន និងការផ្លាស់ប្ដូរទំនិញទៅកាន់ទីផ្សារ ជាពិសេសក្នុងរដូវវស្សា បានបង្កបញ្ហាប្រឈមយ៉ាងខ្លាំងសម្រាប់ប្រជាជនកម្ពុជានៅតាមតំបន់ជនបទ»។
អ្នកស្រីបានបន្ថែមថា«ស្ថានភាពផ្លូវមិនល្អ ការរំខានដែលបណ្តាលមកពីទឹកជំនន់ និងថ្លៃដឹកជញ្ជូនខ្ពស់ គឺជាឧបសគ្គចម្បងក្នុងការទទួលបានការថែទាំសុខភាព និងការថែទាំសង្គ្រោះបន្ទាន់សម្រាប់ស្ត្រីដែលមានផ្ទៃពោះ»។ សូមជម្រាបថា គម្រោងនេះបាននិងកំពុងទទួលការអនុវត្តគម្រោង ដោយក្រសួងសាធារណការ និងដឹកជញ្ជូន និងក្រសួងអភិវឌ្ឍន៍ជនបទកម្ពុជា៕
