ភ្នំពេញ៖ អ្នកវិភាគសេដ្ឋកិច្ច និងអ្នកស្រាវស្រាវជ្រាវនៅកម្ពុជាបានចាត់ទុកថា ទំនាក់ទំនងពាណិជ្ជកម្មរវាងចិននិងកម្ពុជា គឺជាគំរូដ៏ល្អមួយសម្រាប់ពិភពលោក ព្រោះទំនាក់ទំនងនេះបាននាំមកនូវផលប្រយោជន៍ទៅវិញទៅមក។
ឯកឧត្តមបណ្ឌិតគីសេរីវឌ្ឍន៍អ្នកវិភាគសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជាបានប្រាប់អ្នកសារព័ត៌មានវិទ្យុមិត្តភាពកម្ពុជាចិនកាលពីពេលថ្មីៗនេះថា ការអភិវឌ្ឍប្រទេសចិនបានផ្តល់កាលានុវត្តភាពដល់កម្ពុជាក៏ដូចជាពិភពលោកទាំងមូល។ ចិនយកចិត្តទុកដាក់លើពហុនិយមមានន័យថាជាការចងមេត្រីភាពជាមួយគ្នាតួយ៉ាងដូចជាគំនិតផ្តួចផ្តើម ខ្សែក្រវាត់និងផ្លូវរបស់ប្រធានរដ្ឋចិនគឺមានសារសំខាន់ណាស់ក្នុងការរួមចំណែកអភិវឌ្ឍន៍ ,ចែករំលែកនូវសហគមន៍ជោគវាសនារួម ហើយពិភពលោកដើរទៅជាមួយគ្នាពុំមានការបែងចែក។
ឯកឧត្តមបណ្ឌិតបន្តថាថា កម្ពុជានិងចិនមានទំនាក់ទំនងជាមួយគ្នាលើគ្រប់វិស័យ ហើយបានបន្តបង្កើនកម្លាំងពង្រីកឥទ្ធិពលជាលំដាប់ ប្រែជាមិត្តដែកថែប និងពន្លាតកិច្ចសហប្រតិបត្តិការត្បូងពេជ្រឆកោណសម្រាប់ផ្តល់ប្រយោជន៍កាន់តែច្រើនដល់ប្រជាជន។
លោកបណ្ឌិតបញ្ជាក់ថា៖ « ចំណូលដែលបានមកពីការនាំចេញរបស់កម្ពុជា គឺបានរួមចំណែកពីប្រទេសចិនផងដែរ ។ បើយើងនិយាយពីទំនាក់ទំនងរបស់ប្រទេសទាំងពីរវិញគឺកម្ពុជាបានក្លាយជាដៃគូយុទ្ធសាស្ត្រគ្រប់ជ្រុងជ្រោយ ក្លាយជាមិត្តដែកថែប ហើយបច្ចុប្បន្នក្លាយជាមិត្តឆកោណត្បូងពេជ្រមួយទៀត ដោយបានសហការគ្នាលើវិស័យចំនួន៦ ។ អ៊ីចឹងកិច្ចសហប្រតិបត្តិការសេដ្ឋកិច្ចនៃប្រទេសទាំងពីរទីមួយលើវិស័យវិនិយោគរបស់ចិនចូលមកកម្ពុជាបានបង្កើតការងារ ផលិតកម្មក្នុងប្រទេស វិស័យទេសចរណ៍ សុទ្ធតែបានជួយជំរុញកំណើនសេដ្ឋកិច្ចកម្ពុជា»។
ជាមួយគ្នានេះឯកឧត្តមបណ្ឌិតបញ្ជាក់ថា តាមរយៈកិច្ចព្រមព្រៀងពាណិជ្ជកម្មសេរីរវាងកម្ពុជានិងចិន ព្រមទាំងទំនាក់ទំនងល្អរវាងប្រទេសទាំងពីរបានក្លាយជាដៃគូដ៏រឹងមាំ ហើយមិត្តត្បូងពេជ្រឆកោណនេះ នឹងក្លាយជាគំរូមួយសម្រាប់ពិភពលោក។
លោកទឹម វនប្រធានការិយាល័យស្រាវជ្រាវ និងអភិវឌ្ឍន៍ នៃមជ្ឈមណ្ឌលតំបន់អាស៊ីអាគ្នេយ៍សម្រាប់ការអភិវឌ្ឍអប់រំបច្ចេកទេស នៃក្រសួងអប់រំ យុវជន និងកីឡា និងជានិស្សិតបរិញ្ញាបត្រជាន់ខ្ពស់ផ្នែកគ្រប់គ្រងពាណិជ្ជកម្ម នៃសកលវិទ្យាល័យ Hitotsubashi ICS ប្រទេសជប៉ុនបានវាយតម្លៃខ្ពស់ចំពោះទំនាក់ទំនងពាណិជ្ជកម្មរវាងចិននិងកម្ពុជាដែលមិនមានប្រទេសណាអាចធ្វើបានឡើយ។
លោកទឹម វនបញ្ជាក់ថា ៖ « ប្រទេសចិនបាន និងកំពុងវិនិយោគច្រើនក្នុងប្រទេសកម្ពុជាលើផ្នែកហេដ្ឋារចនាសម្ព័ន្ធ ការផលិត និងវិស័យអចលនទ្រព្យ។ ការវិនិយោគនេះ ជួយជំរុញកំណើនសេដ្ឋកិច្ចកម្ពុជាផ្ដល់ឱកាសការងារជូនប្រជាពលរដ្ឋ កាត់ថ្លៃបន្ថយផលិត និងដឹកជញ្ជូន ។ល។»
លោកបញ្ជាក់ថា ប្រទេសចិនបានផ្តួចផ្តើមនូវគម្រោងអភិវឌ្ឍន៍ជាច្រើនក្នុងប្រទេសកម្ពុជាដូចជាការអភិវឌ្ឍវិស័យដឹកជញ្ជូនដូចជា ផ្លូវល្បឿនលឿន ព្រលានយន្តហោះ កំពង់ផែ តំបន់សេដ្ឋកិច្ចពិសេស ។ល។ គម្រោងទាំងនេះ រួមចំណែកដល់ការអភិវឌ្ឍសេដ្ឋកិច្ចសង្គមកម្ពុជា និងធ្វើឱ្យឡើងនូវហេដ្ឋារចនា សម្ព័ន្ធផ្សេងៗក្នុងប្រទេស។ ការផ្លាស់ប្ដូរវប្បធម៌ ជួយពង្រឹងការយល់យោគគ្នាបានល្អ នឹងរឹតបណ្ដឹងនូវកិច្ចសហប្រតិបត្តិការការទូតកាន់តែប្រសើរឡើងរវាងប្រទេសទាំងពីរ។»
បើតាមលោកទឹម វន៖ប្រទេសកម្ពុជា និងចិនបានពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ សហប្រតិបត្តិយ៉ាងជិតស្និតលើបញ្ហាក្នុងតំបន់ និងអន្តរជាតិ។ ភាពជាដៃគូនេះ ជួយធ្វើឱ្យប្រសើរឡើងនូវទីតាំងភូមិសាស្ត្រនយោបាយក្នុងប្រទេសកម្ពុជា។
សូមបញ្ជាក់ថា ទាំងទំនាក់ទំនងការទូត ពាណិជ្ជកម្ម និងវិស័យផ្សេងៗទៀត គឺកម្ពុជា និងចិនបានបោះជំហានទៅមុខគ្រប់កាលៈទេសៈ។ ដូច្នេះហើយបណ្តាប្រទេសផ្សេងៗគួរតែយកគំរូតាមប្រទេសទាំងពីរក្នុងការដឹកនាំប្រទេសជាតិឱ្យរីកចម្រើន និងនាំមកនូវផលប្រយោជន៍ទៅវិញទៅមក៕
