ប្រមុខការពារជាតិកម្ពុជា នឹងដឹកនាំគណៈប្រតិភូចូលរួមកិច្ចប្រជុំចង្អៀត រដ្ឋមន្ត្រីការពារជាតិអាស៊ាន នៅប្រទេសឡាវ ពីថ្ងៃទី៤-៦ ខែមីនា

ភ្នំពេញ៖ តបតាមការអញ្ជើញរបស់នាយឧត្តមសេនីយ៍ ចាន់សាម៉ន ចាន់យ៉ាឡា (ChansamoneChanyalath) ឧបនាយករដ្ឋមន្ដ្រី រដ្ឋមន្ត្រីក្រសួងការពារប្រទេសឡាវ និងជាប្រធានកិច្ចប្រជុំរដ្ឋមន្ត្រីការពារជាតិអាស៊ាន (ADMM) និងកិច្ចប្រជុំ ពាក់ព័ន្ធឆ្នាំ២០២៤ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងដឹកនាំប្រតិភូជាន់ខ្ពស់ក្រសួងការពារជាតិ អញ្ជើញចូលរួមកិច្ចប្រជុំចង្អៀត រដ្ឋមន្ត្រីការពារជាតិអាស៊ាន ដែលនឹងប្រព្រឹត្តទៅពីថ្ងៃទី០៤ ដល់ថ្ងៃទី០៦ ខែមីនា ឆ្នាំ២០២៤ នៅទីក្រុងហ្លួងព្រះបាង សាធារណរដ្ឋប្រជាធិបតេយ្យប្រជាមានិតឡាវ។

យោងតាមសេចក្ដីប្រកាសព័ត៌មានរបស់ក្រសួងការពារបានបញ្ជាក់ថា កិច្ចប្រជុំចង្អៀត រដ្ឋមន្ត្រីការពារជាតិអាស៊ាន ឆ្នាំ២០២៤ ក្រោមមូលបទ «អាស៊ាន៖ រួមគ្នាដើម្បីសន្តិភាព សន្តិសុខ និងភាពធន់» នឹងផ្តោតកិច្ចពិភាក្សាលើការពង្រឹកតួនាទី ADMM ក្រោយឆ្នាំ២០២៥ ដើម្បីឆ្លើយតបទៅនឹងបញ្ហាប្រឈមសន្តិសុខថ្មីៗ ទាំងក្នុងបច្ចុប្បន្ន និងអនាគត ដែលក្នុងនោះរួមមាន ការផ្លាស់ប្តូទស្សនស្តីពីទំនាក់ទំនងខាងក្រៅរបស់អាស៊ានជាមួយដៃគូ ខាងក្រៅការគិតគូលើការពង្រឹងឯកភាព និងមជ្ឈភាពអាស៊ាន និងការធ្វើឱ្យកាន់តែមានប្រសិទ្ធិភាពនូវកិច្ចសហប្រតិបត្តិការ ជាក់ស្តែងក្រោមយន្តការ ADMM និង ADMM-បូក ដែលមានស្រាប់។
ជាមួយគ្នានោះ រដ្ឋមន្ត្រីការពារជាតិអាស៊ាន ក៏នឹងផ្លាស់ប្ដូរ ទស្សនៈស្តីពីបញ្ហាតំបន់ និងអន្តរជាតិដែលជាផលប្រយោជន៍និងក្ដីបារម្ភរួមផងដែរ។

រដ្ឋមន្ត្រីការពារជាតិអាស៊ាន នឹងអនុម័ត «សេចក្ដីថ្លែងការណ៍រួម ស្ដីពីសមិទ្ធិផលនៃការអនុវត្តផែនការមេសហគមន៍ នយោបាយ-សន្តិសុខអាស៊ាន ២០២៥ របស់កិច្ចប្រជុំរដ្ឋមន្ត្រីការពារជាតិអាស៊ាន» (Joint Statement by the ASEAN Defence Ministers on ADMM’s Accomplishments of the Implementation of ASEAN Political-Security Community Blueprint 2025)។

ក្នុងឱកាសនៃកិច្ចប្រជុំចង្អៀតនេះ ឧបនាយករដ្ឋមន្ត្រី ទៀ សីហា គ្រោងនឹងមានជំនួបពិភាក្សាទ្វេភាគី ជាមួយសមភាគីអាស៊ានមួយចំនួន ដើម្បីពង្រឹងពង្រីកកិច្ចសហប្រតិបត្តិការពារជាតិដែលផ្តល់ផលប្រយោជន៍រួម ទាំងក្នុងក្របខ័ណ្ឌទ្វេភាគី និងពហុភាគី៕