ប្រមុខរាជរដ្ឋាភិបាល ឲ្យអាជ្ញាធរថ្នាក់ក្រោមជាតិ លុបបំបាត់ និងបង្ក្រាបមេក្លោងចែកចាយគ្រឿងញៀន នៅតាមមូលដ្ឋាន ឃុំ-សង្កាត់
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំឲ្យអាជ្ញាធរថ្នាក់ក្រោមជាតិ លុបបំបាត់បញ្ហាគ្រឿងញៀន ដោយធ្វើការបង្ក្រាបមេក្លោង ចែកចាយគ្រឿងញៀននៅតាមមូលដ្ឋាន ឃុំ-សង្កាត់។
ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផ្សព្វផ្សាយផែនការយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់លើកទី៩ នារសៀលថ្ងៃទី២០ ខែកុម្ភៈ ឆ្នាំ២០២៤ សម្ដេចធិបតី ហ៊ុន ម៉ាណែត បានស្នើគណៈបញ្ជាការឯកភាពរាជធានី-ខេត្ត ទាំងអស់ ត្រូវយកចិត្តទុកដាក់លើបញ្ហានេះ ដោយត្រូវចាត់វិធានការទាំងរដ្ឋបាល និងវិធានការច្បាប់ ចំពោះទីតាំងឡាយណាដែលអនុញ្ញាតឱ្យមានការចែកចាយ និងប្រើប្រាស់គ្រឿងញៀន ជាពិសេស ត្រូវក្ដាប់ឱ្យបានអត្ដសញ្ញាណម្ចាស់ទីតាំងពិតប្រាកដ និងត្រូវចាត់វិធានឱ្យដល់ឬសគល់។
សម្ដេចធិបតីបញ្ជាក់ថា «ខ្ញុំសូមស្នើដល់អាជ្ញាធរថ្នាក់ក្រោមជាតិគ្រប់លំដាប់ថ្នាក់ ត្រូវធ្វើការលុបបំបាត់ដោយត្រូវបង្ក្រាបមេក្លោងបណ្ដាញចែកចាយគ្រឿងញៀន នៅតាម ឃុំ-សង្កាត់ និងត្រូវសហការជាមួយ ឪពុកម្ដាយ អាណាព្យាបាល ប្រមូលអ្នកញៀនចេញពីសហគមន៍ ដើម្បីមកទទួលការបន្សាប ព្យាបាល ទាំងនៅតាមមជ្ឈមណ្ឌលរដ្ឋ និងឯកជន»។
សម្ដេចលើកឡើងថា ឆ្នាំ២០២៣ និងដើមឆ្នាំ ២០២៤នេះ កម្ពុជា នៅតែរងការប៉ះពាល់ពីការជួយដូរគ្រឿងញៀនខុសច្បាប់ពីសំណាក់ក្រុមជនឧក្រិដ្ឋ ខណៈបញ្ហាគ្រឿងញៀននេះក៏បានរីករាលដាលទៅដល់តំបន់ជនបទមួយចំនួនក្នុងប្រទេសកម្ពុជា ៕
