ឯកឧត្តមសន្តិបណ្ឌិត ឡូយ សុផាត ចុះជួបសំណេះសំណាលសួរសុខទុក្ខ ដល់មន្ត្រីជលផល ឆ្មាំទន្លេអភិរក្សសត្វផ្សោត និងសហគមន៍នេសាទ នៅឃុំអូរម្រះ ស្រុកសៀមបូក

ភ្នំពេញ៖ នៅព្រឹកថ្ងៃទី១៥ ខែកុម្ភ:ឆ្នាំ២០២៤ ឯកឧត្តមសន្តិបណ្ឌិត ឡូយ សុផាត តំណាងរាស្រ្តមណ្ឌលខេត្តស្ទឹងត្រែង និងជាប្រធានគណៈកម្មការទី៣ នៃរដ្ឋសភា អញ្ជើញចុះជួបសំណេះសំណាលសួរសុខទុក្ខជាមួយមន្ត្រីជលផល ឆ្មាំទន្លេអភិរក្សសត្វផ្សោត អាជ្ញាធរមូលដ្ឋាន និងសហគមន៍នេសាទ ក្នុងការបំពេញភារកិច្ចលើការងារអភិរក្ស និងអភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ ក្នុងឃុំអូរម្រះ ស្រុកសៀមបូក ខេត្តស្ទឹងត្រែង។

ក្នុងឱកាសនោះ ឯកឧត្តមសន្តិបណ្ឌិត ឡូយ សុផាត បានលើកឡើងថា ពីរបីឆ្នាំកន្លងមកនេះ ក្រោយមានការការពារបានហ្មត់ចត់ ឃើញថាមានការថយចុះនៃការប្រើប្រាស់មង ហើយមន្ត្រីជលផល ឆ្មាំទន្លេអភិរក្សសត្វផ្សោត អាជ្ញាធរមូលដ្ឋាន និងសហគមន៍នេសាទ ត្រូវមានការអប់រំប្រជាពលរដ្ឋឱ្យយល់ជ្រាបនៃការនេសាទត្រីដោយខុសច្បាប់ ផលលំបាកនៃការបំផ្លាញធនធានធម្មជាតិ នាំគ្នាអភិរក្សនៃត្រីមេពូជ សត្វផ្សោតទឹកសាបទន្លេមេគង្គ ត្រីបបែលយក្សទំងន់ជាង៣០០គីឡូក្រាម ត្រូវបានទទួលស្គាល់ជាផ្លូវការថាជាត្រីទឹកសាបដ៍ធំបំផុតនៅលើពិភពលោក ក្នុងគោលបំណងដើម្បីស្តាជីវភាពរបស់ប្រជាពលរដ្ឋ និងការទាក់ទាញទេសចរណ៍មកដំណើរកំសានទស្សនា នៅឃុំអូរម្រះ ស្រុកសៀមបូកនេះ។

នាឱកាសនោះដែល ឯកឧត្តមសន្តិបណ្ឌិត ឡូយ សុផាត បានលើកទឹកចិត្តឱ្យប្រជាពលរដ្ឋរស់នៅតំបន់ស្រុកសៀមបូកនេះ ប្រែក្លាយពីការនេសាទខុសច្បាប់ ការបំផ្លាញធនធានធម្មជាតិ មកប្រកបមុខរបរ កសិកម្ម កសិឧស្សាហកម្ម ដោយសារតំបន់នេះមានទន្លេមេគង្គជាប្រព័ន្ធស្រោចស្រពដ៏សំខាន់។

លោក ស្រី វិចិត្រ នាយខណ្ឌរដ្ឋបាលជលផលបានគូសបញ្ជាក់ថា៖ ឆ្មាំទន្លេអភិរក្សសត្វផ្សោតទន្លេមេគង្គបានកំពុងប្រចាំការនៅតាមប៉ុស្តិ៍ល្បាត កោះសំពាយ សៀមបូក ត្បូងខ្លា កោះជ្រឹមដែលមានទីតាំងនៅតាមដងទន្លេមេគង្គ ដែលជាដែនជម្រកសត្វផ្សោត និងមានការជួយជ្រោមជ្រែងពីអង្គការ WWF និងរដ្ឋបាលជលផលថ្នាក់ជាតិ ផងដែរ ៕