អភិបាលរងខេត្តតាកែវ ជំរុញអាជ្ញាធរមូលដ្ឋានពន្លឿនការចុះស្រង់ទិន្នន័យក្នុងមូលដ្ឋានរបស់ខ្លួនឱ្យបានឆាប់ ដើម្បីជាធាតុចូលក្នុងការអភិវឌ្ឍនៅមូលដ្ឋាន
ភ្នំពេញ៖ លោក ញ៉ែម ស្រស់ អភិបាលរងខេត្តតាកែវបានធ្វើការជម្រុញដល់អាជ្ញាធរមូលដ្ឋានក្រុង-ស្រុកឃុំ-សង្កាត់ និងភូមិ ត្រូវពន្លឿនការចុះស្រង់ទិន្នន័យនានាក្នុងមូលដ្ឋានរបស់ខ្លួន ផ្ញើមកអគ្គនាយកដ្ឋានរដ្ឋបាល នៃក្រសួងមហាផ្ទៃ អោយបានឆាប់ ដើម្បីជាធាតុចូលដ៏សំខាន់ក្នុងការរៀបចំគោលនយោបាយ និងអភិវឌ្ឍនៅរដ្ឋបាលនៅថ្នាក់ក្រោមជាតិអោយកាន់តែរីកចម្រើនបន្ថែមទៀត។
លោកបានថ្លែងបែបនេះក្នុងឱកាសបើកកិច្ចប្រជុំពិភាក្សា ស្ដីពីសំណើសុំផ្ដល់នូវទិន្នន័យសម្រាប់គាំទ្រដល់ការសិក្សាស្រាវជ្រាវ ក្នុងការរៀបចំគោលនយោបាយនានាពាក់ព័ន្ធ និងរដ្ឋបាលថ្នាក់ក្រោមជាតិ កិច្ចប្រជុំនេះធ្វើឡើងនៅសាលប្រជុំសាលាខេត្តតាកែវ នាព្រឹកថ្ងៃទី៣០ ខែមករា ឆ្នាំ២០២៤នេះ។
លោកអភិបាលរងខេត្តតាកែវបានមានប្រសាសន៍ថា ការប្រមូលទិន្ន័យនៅតាមមូលដ្ឋាននេះ ពិតជាមានសារៈសំខាន់ណាស់ ក្នុងការធ្វើជាមូលដ្ឋានគ្រឹះក្នុងការសិក្សាស្រាវជ្រាវ វិភាគ វាយតម្លៃ ដើម្បីមានព័ត៌មានគ្រប់ជ្រុងជ្រោយក្នុងការរៀបចំគោលនយោបាយអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិ ដើម្បីឆ្លើយតបចំពោះតម្រូវការនានារបស់ប្រជាពលរដ្ឋ។ ក្នុងន័យនេះ អាជ្ញាធរមូលដ្ឋាន រួមនឹងស្ថាប័នពាក់ព័ន្ធ ត្រូវយកចិត្តទុកដាក់ និងពន្លឿនការស្រង់ទិន្នន័យនៅតាមមូលដ្ឋាន របស់ខ្លួន ផ្ញើមកកាន់រដ្ឋបាលខេត្ត ដើម្បីខេត្តផ្ញើបន្តទៅកាន់អគ្គនាយកដ្ឋានរដ្ឋបាល នៃក្រសួងមហាផ្ទៃ។
លោក ញ៉ែម ស្រស់ អភិបាលរងខេត្តតាកែវបានមានប្រសាសន៍បញ្ជាក់ថារាជរដ្ឋាភិបាលកម្ពុជា នីតិកាលទី៧នេះ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានយកចិត្តទុកដាក់ និងធ្វើកំណែទម្រង់នៅរដ្ឋបាលថ្នាក់ក្រោមជាតិ តាមរយៈការអភិវឌ្ឍផ្នែកហេដ្ឋានរចនាសម្ព័ន្ធ ការលើកកម្ពស់ការផ្តល់សេវាសាធារណជូនប្រជាពលរដ្ឋ ប្រកបដោយតម្លាភាព និងប្រសិទ្ធភាពខ្ពស់ តាមរយៈយន្តការច្រកចេញចូលតែមួយ និងការអភិវឌ្ឍមូលដ្ឋាន ហេតុនេះ រដ្ឋបាលស្រុកនីមួយៗ ត្រូវលើកកម្ពស់ការអនុវត្តនូវគោលការណ៍សំខាន់ៗនៃអភិបាលកិច្ចល្អ ដោយត្រូវធ្វើយ៉ាងណាឲប្រជាពលរដ្ឋបានចូលរួមក្នុងដំណើរការនៃការធ្វើសេចក្តីសម្រេច និងអនុវត្តសេចក្តីសម្រេចនោះ ព្រមទាំងត្រូវមាន គណនេយ្យភាពចំពោះប្រជាពលរដ្ឋ និងអ្នកពាក់ព័ន្ធនានាផងដែរ៕
