ឯកឧត្តម ស្វាយ សំអ៊ាង លើកទឹកចិត្តដល់ប្រជាពលរដ្ឋជាម្ចាស់ក្បាលដីពាក់ព័ន្ធចូលរួមពិនិត្យផ្ទៀងផ្ទាត់ឲ្យបានច្បាស់លាស់ ជៀសវាងការប្រកែក តវ៉ា និងអាចឈានដល់វិវាទ

ភ្នំពេញ៖ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងដីរដ្ឋថ្នាក់ខេត្តស្ទឹងត្រែង បានបញ្ជាក់ថា ក្នុងរយៈពេល១៥ថ្ងៃ គឺចាប់ពីថ្ងៃទី៣០ ខែមករា ដល់ ថ្ងៃទី១៣ ខែកុម្ភៈ ឆ្នាំ២០២៤ សូមលើកទឹកចិត្តឲ្យបងប្អូនជាម្ចាស់ក្បាលដីពាក់ព័ន្ធទាំងអស់ចូលរួមក្នុងពិនិត្យ ផ្ទៀងផ្ទាត់ឲ្យបានច្បាស់លាស់ ជៀសវាងការប្រកែក តវ៉ា និងអាចឈានដល់វិវាទជាមួយអ្នកជាប់ព្រំដីជាមួយ។

ឯកឧត្ដមបានមានប្រសាសន៍បែបនេះ ក្នុងឳកាសអញ្ជើញជាអធិបតីក្នុងពិធីបិទផ្សាយជាសាធារណៈ នូវឯកសារនៃការវិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិថ្មី សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង នាថ្ងៃទី៣០ ខែមករា ឆ្នាំ២០២៤នេះ។

ឯកឧត្តម ស្វាយ សំអ៊ាង បន្ថែមថា បន្ទាប់ពីចប់ រយៈពេលបិទផ្សាយ ១៥ថ្ងៃ គណៈកម្មការរដ្ឋបាល នឹងធ្វើរបាយការណ៍បូកសរុបដើម្បីស្នើសុំគោលការណ៍ចេញប័ណ្ណ កម្មសិទ្ធជូនម្ចាស់ក្បាលដី ដែលយើងនឹងជួបគ្នាម្ដងទៀតនៅពេលរៀបចំពិធីចែកបណ្ណកម្មសិទ្ធិ។ ជាការពិតណាស់ ការទទួលបានប័ណ្ណកម្មសិទ្ធិដីធ្លី គឺជាឯកសាររដ្ឋបាលបញ្ជាក់ពីសិទ្ធិស្របច្បាប់ជាម្ចាស់លើក្បាលដីនីមួយៗ។

ឯកឧត្តមអភិបាលខេត្តបានបញ្ជាក់ថា រដ្ឋធម្មនុញ្ញ ឆ្នាំ១៩៩៣ មាត្រា៤៤ បានចែងថា “កម្មសិទ្ធឯកជនស្របច្បាប់ស្ថិតនៅក្រោមការគាំពារនៃច្បាប់ ដែលនឹងដកហូត កម្មសិទ្ធិអំពីជនណាមួយនោះបាន លុះត្រាតែប្រយោជន៍សាធារណៈតម្រូវឲ្យធ្វើ ក្នុងករណីដែលច្បាប់បានបញ្ញតិទុក ហើយត្រូវផ្ដល់សំណងជាមុន ដោយសមរម្យ និងយុត្តិធម៌”៕