ក្រសួងបរិស្ថាន ដាក់ឱ្យប្រើប្រាស់ជាផ្លូវការ ផែនការយុទ្ធសាស្ត្រអភិវឌ្ឍន៍សហគមន៍មូលដ្ឋាន (២០២៤-២០២៨)

ភ្នំពេញ៖ នៅរសៀលទី២៩ ខែមករា ឆ្នាំ២០២៤ ក្រសួងបរិស្ថាន បានប្រកាសដាក់ឱ្យប្រើប្រាស់ជាផ្លូវការ «ផែនការយុទ្ធសាស្ត្រអភិវឌ្ឍន៍សហគមន៍មូលដ្ឋាន (២០២៤-២០២៨)»។ ផែនការយុទ្ធសាស្ត្រនេះត្រូវរៀបចំឡើងដោយអគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន។

ពិធីនេះបានធ្វើឡើងក្រោមអធិបតីភាពឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន, តំណាងក្រសួង-ស្ថាប័នពាក់ព័ន្ធ ព្រមទាំងថ្នាក់ដឹកនាំ មន្រ្តីរាជការនៃក្រសួងបរិស្ថាន តំណាងរដ្ឋបាលរាជធានី-ខេត្ត ដៃគូអភិវឌ្ឍន៍ និងវិស័យឯកជនជាច្រើនផងដែរ។

ក្នុងរយៈពេល ៣០ឆ្នាំកន្លងមកនេះ ចាប់តាំងពីការបង្កើតស្ថាប័នទទួលបន្ទុកវិស័យបរិស្ថាននៅឆ្នាំ១៩៩៣ វិស័យបរិស្ថានត្រូវបានទទួលការគាំទ្រយ៉ាងពេញទំហឹងពីរាជរដ្ឋាភិបាល ដោយមានកិច្ចសហការយ៉ាងជិតស្និទ្ធពីក្រសួង ស្ថាប័នពាក់ព័ន្ធ និងដៃគូអភិវឌ្ឍន៍ ព្រមទាំងការចូលរួមយ៉ាងសកម្មពីប្រជាពលរដ្ឋ លើការគ្រប់គ្រងបរិស្ថាន និងធនធានធម្មជាតិ។ បរិស្ថាន គឺជាសសរស្តម្ភដ៏សំខាន់មួយក្នុងចំណោមសសរស្តម្ភទាំង៤ (បរិស្ថាន សេដ្ឋកិច្ច សង្គម និងវប្បធម៌) ដែលជាអ្នកទ្រទ្រង់ដល់ការអភិវឌ្ឍប្រកបដោយចីរភាព។

ស្របពេលដែលប្រទេសកម្ពុជា សម្រេចបាននូវកំណើនសេដ្ឋកិច្ចដ៏ល្អប្រសើរ ក្រសួងបរិស្ថានបានបំពេញតួនាទី និងភារកិច្ចបានប្រសើរលើទិដ្ឋភាពសំខាន់ៗចំនួន៤ រួមមានទី១៖ ការកសាងរដ្ឋបាលទំនើប, ទី២៖ ការអភិរក្សជីវៈចម្រុះ និងការគ្រប់គ្រងធនធានធម្មជាតិ, ទី៣៖ ការអភិវឌ្ឍសហគមន៍មូលដ្ឋាន និងទី៤៖ ការលើកកម្ពស់ការរស់នៅប្រកបដោយចីរភាព។

ក្រសួងបរិស្ថានបានរៀបចំបង្កើតតំបន់ការពារធម្មជាតិចំនួន៧៣កន្លែង គ្រប់ដណ្តប់លើផ្ទៃដីប្រមាណ ៧,០៤៦,៨៦៣ហិកតា និងសហគមន៍តំបន់ការពារធម្មជាតិ ចំនួន ១៩៣សហគមន៍ គ្រួសារចូលរួមចំនួន ៧៣,១៤៩គ្រួសារ សមាជិកចំនួន ៣០៥,៦២១នាក់ គ្រប់គ្រងលើផ្ទៃដីព្រៃទំហំ ៣៣២,១០៨ហិកតា ដើម្បីការអភិរក្សជីវៈចម្រុះ ការគ្រប់គ្រងធនធានធម្មជាតិ-វប្បធម៌ ការចូលរួមលើកកម្ពស់សេដ្ឋកិច្ចជាតិ និងការអភិវឌ្ឍមូលដ្ឋានប្រកបដោយចីរភាព។

រាជរដ្ឋាភិបាលអាណត្តិទី៧ នៃរដ្ឋសភា ក្រោមការដឹកនាំប្រកបដោយបញ្ញាឈ្លាសវៃ និងគតិបណ្ឌិតរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានដាក់ចេញនូវ «យុទ្ធសាស្រ្តបញ្ចកោណ» ដំណាក់កាលទី១ ដើម្បីកំណើនសេដ្ឋកិច្ច បង្កើតការងារ ធានាសមធម៌ បង្កើនប្រសិទ្ធភាព និងរក្សាចីរភាព សំដៅឆ្លើយតបទៅនឹងបំណងប្រាថ្នារបស់ប្រជាជនឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៥០។

អនុលោមតាមយុទ្ធសាស្រ្តខាងលើ និងឈរលើមូលដ្ឋាននៃគោលនយោបាយ និងយុទ្ធសាស្រ្តដែលមានជាធរមានព្រមទាំងក្របខណ្ឌអនុសញ្ញាជាតិពាក់ព័ន្ធ ក្រសួងបរិស្ថាន បានរៀបចំ «យុទ្ធសាស្រ្តចក្រាវិស័យបរិស្ថាន(២០២៤-២០២៨)» ដោយបានអនុញ្ញាតដាក់ឱ្យប្រើប្រាស់ជា ផ្លូវការតាមលិខិតលេខ ១១៧០ សជណ.ដប ចុះថ្ងៃទី៦ ខែវិច្ឆិកា ឆ្នាំ២០២៣ របស់ទីស្ដីការគណៈរដ្ឋមន្ត្រី និងសម្ពោធដាក់ឱ្យប្រើប្រាស់ កាលពីថ្ងៃទី១៥ ខែវិច្ឆិកា ឆ្នាំ២០២៣កន្លងទៅ។ ការរៀបចំយុទ្ធសាស្រ្តចក្រា វិស័យបរិស្ថាន ដើម្បីតម្រង់ទិស និងចង្អុលបង្ហាញអាទិភាពការងារក្នុងការលើកកម្ពស់កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឍប្រកបដោយចីរភាព ក្នុងមុំចំនួន៣ គឺ «ភាពស្អាត ភាពបៃតង និង ចីរភាព» សំដៅឆ្ពោះទៅសម្រេចការអភិវឌ្ឍប្រកបដោយអព្យាក្រឹតកាបូននៅឆ្នាំ២០៥០។

ក្រសួងបរិស្ថានបានកំណត់ការអនុវត្តយុទ្ធសាស្រ្តដោយឈរលើ «សុក្រឹតកម្មបរិស្ថានកិច្ច» ប្រកបដោយប្រសិទ្ធភាព និងប្រសិទ្ធផលដើម្បីឆ្លើយតបទៅនឹង «យុទ្ធសាស្រ្តបញ្ចកោណ» ដែលមានខ្លឹមសារបញ្ជាក់យ៉ាងច្បាស់នៅក្នុងបញ្ចកោណទី៤ «ការអភិវឌ្ឍប្រកបដោយភាពធន់ ចីរភាព និងបរិយាបន្ន» ក្នុងនោះមុំទី២ «ការគ្រប់គ្រងធនធានធម្មជាតិ បេតិកភណ្ឌវប្បធម៌ និងទេសចរណ៍ប្រកបដោយចីរភាព» និងមុំទី៥ «ការធានា ចីរភាពបរិស្ថាន និងការរៀបចំខ្លួន ឆ្លើយតបទៅនឹងការប្រែប្រួលអាកាសធាតុ ព្រមទាំងការលើកកម្ពស់សេដ្ឋកិច្ចបៃតង» ដើម្បីចូលរួមសម្រេចគោលដៅ «យុទ្ធសាស្រ្តចក្រាវិស័យបរិស្ថាន» និងគោលនយោបាយរបស់រាជរដ្ឋាភិបាលកម្ពុជា អគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន បានរៀបចំផែនការយុទ្ធសាស្រ្តអភិវឌ្ឍន៍សហគមន៍មូលដ្ឋាន(២០២៤-២០២៨) ប្រកបដោយភាពច្បាស់លាស់ និងគ្រប់ជ្រុងជ្រោយ ដោយមានការចូលរួមពិគ្រោះយោបល់ពីស្ថាប័នពាក់ព័ន្ធ ទាំងថ្នាក់ជាតិ ថ្នាក់ក្រោមជាតិ អង្គការដៃគូវិស័យឯកជន និងសហគមន៍មូលដ្ឋាន ដើម្បីការឯកភាពគ្នាទាំងផ្នែកគោលនយោបាយយុទ្ធសាស្រ្ត និងបច្ចេកទេស ក្នុងគោលបំណងដើម្បីឱ្យផែនការយុទ្ធសាស្រ្តនេះ ប្រកបដោយសុក្រឹតភាព តម្លាភាព ភាពជាម្ចាស់ និងប្រសិទ្ធភាពខ្ពសក្នុងគោលដៅការគ្រប់គ្រងធនធានធម្មជាតិ ការលើកកម្ពស់សេដ្ឋកិច្ចមូលដ្ឋាន និងរួមចំណែកការធានាចីរភាពបរិស្ថាន។
ផែនការយុទ្ធសាស្រ្តនេះត្រូវបានថ្នាក់ដឹកនាំ និងក្រុមការងារក្រសួងបរិស្ថានពិនិត្យ និងផ្តល់យោបល់ ព្រមទាំងទទួលបានការឯកភាពពីរដ្ឋមន្រ្តីក្រសួង បរិស្ថាន កាលពីថ្ងៃទី១០ ខែមករា ឆ្នាំ២០២៤។ ដើម្បីផ្សព្វផ្សាយឱ្យបានទូលំទូលាយ និងបង្កើនកិច្ចសហការពីគ្រប់ស្ថាប័នពាក់ព័ន្ធ អគ្គនាយកដ្ឋានសហគមន៍មូលដ្ឋាន សហការ និងគាំទ្រដោយអង្គការរីខូហ្វកម្ពុជា(RECOFTC) តាមរយៈគម្រោង «ភ្ជាប់បណ្តាញសហគមន៍តំបន់ការ ពារធម្មជាតិសម្រាប់លើកកម្ពស់ជីវភាពសហគមន៍មូលដ្ឋាន និងការអភិរក្សធនធានធម្មជាតិ» ក្រោមការគាំទ្រមូលនិធិផាកាដ (Packard Foundation)៕