នាយកនៃមជ្ឈមណ្ឌលបណ្តុះបណ្តាលវិជ្ជាជីវៈខេត្តរតនគីរីថា ការបណ្តុះបណ្តាលជំនាញវិជ្ជាជីវៈដល់យុវជនផ្តោតលើការអនុវត្តន៍ផ្ទាល់ រួមទាំងការពិសោធន៍ជាក់ស្តែង

ភ្នំពេញ៖ លោក សែម ប៉ាត នាយកនៃមជ្ឈមណ្ឌលបណ្តុះបណ្តាលវិជ្ជាជីវៈខេត្តរតនគីរីបានលើកឡើងថា ការបណ្តុះបណ្តាលជំនាញវិជ្ជាជីវៈ និងបច្ចេកទេសវគ្គ១របស់វិទ្យាស្ថានបានផ្តោតលើការរៀនទ្រឹស្តីក្នុងថ្នាក់ និងការអនុវត្តន៍ផ្ទាល់ ជាគោល។

លោកបន្តថា តាមរយៈវិធីសាស្រ្តទាំងនេះសិក្ខាកាមដែលជាយុវជនអាចមានចំណេះជំនាញពិត បូករួមទាំងទ្រឹស្តី បន្ទាប់ពីបញ្ជប់វគ្គសិក្សារយៈពេល៤ខែ។ ដំណាក់កាលនីមួយៗទាំងនេះរបស់វិទ្យាស្ថានគឺត្រូវបានបង្រៀនដោយលោកគ្រូមានបទពិសោធន៍ មានវិធីសាស្រ្តបង្រៀនប្រកបដោយវិជ្ជាជីវៈ ដែលអាចធ្វើឱ្យសិក្ខាកាមមានភាពរីករាយក្នុងការសិក្សារៀនសូត្រ។

លោកបន្ថែមថា សម្រាប់វិទ្យាស្ថានការអនុវត្តន៍ផ្ទាល់ក្នុងរោងជាងគឺជាវិធីសាស្រ្តក្នុងការបង្រៀនដ៏សំខាន់មួយបន្ទាប់ពីការសិក្សាទ្រឹស្តីក្នុងថ្នាក់។ មកទល់ពេលនេះមានសិស្សបានចូលរោងជាងអនុវត្តន៍ផ្ទាល់រួចហើយ។ តាមរយៈការយកចិត្តទុកដាក់រៀនសូត្ររបស់យុវជននេះលោកសង្ឃឹមថាការបណ្តុះបណ្តាលជំនាញវិជ្ជាជីវៈរបស់ពួកគេនឹងទទួលបានលទ្ធផលល្អ មានសមត្ថភាពបន្ទាប់ពីរៀនចប់រយៈពេល៤ខែខាងមុខ។

លោកបន្ថែមថា ការបណ្តុះបណ្តាលជំនាញវិជ្ជាជីវៈវគ្គទី១ដែលបានចាប់ផ្តើមកាលពីថ្ងៃទី១៥ មករា ២០២៤ កន្លងទៅ បានកំពុងដំណើរការយ៉ាងរលូន។ យុវជនបានមកទទួលការបណ្តុះបណ្តាលគ្រប់ៗគ្នា។ ដោយឡែកត្បិតការបណ្តុះបណ្តាលកំពុងដំណើរមែនតែការចុះឈ្មោះចូលរៀនជំនាញវិជ្ជាជីវៈនៅតែបន្តទទួលពាក្យដដែល។ សម្រាប់យុវជនដែលមកពីគ្រួសារក្រីក្រ និងគ្រួសារងាយរងហានិភ័យនៅតែបន្តអាចមកចុះឈ្មោះចូលរៀន និងទទួលបានប្រាក់ឧបត្ថម្ភដដែល។

គូរបញ្ជាក់ផងដែរថាកម្មវិធីបណ្តុះបណ្តាលថ្នាក់ជាតិស្តីពី ការបណ្តុះបណ្តាលជំនាញវិជ្ជាជីវៈ និងបច្ចេកទេស១,៥ លាននាក់ដល់យុវជនមកពីគ្រួសារក្រីក្រ និងគ្រួសារងាយរងហានិភ័យដែលបានបើកជាផ្លូវការកាលពីខែវិច្ឆិកា ឆ្នាំ២០២៣នោះ បានបោះជំហ៊ានមួយដំណាក់កាលទៀតហើយពោលគឺកាលពីថ្ងៃទី១៥ ខែមករា ឆ្នាំ២០២៤ កន្លងទៅថ្មីៗនេះក្រសួងការងារ និងបណ្តុះបណ្តាលវិជ្ជាជីវៈបានប្រកាសបើកបវេសនកាលការបណ្តុះបណ្តាលជំនាញវិជ្ជាជីវៈវគ្គដំបូងជាផ្លូវការ៕