សម្តេច ម៉ែន សំអន ណែនាំដល់ក្រុមការងារបក្សចុះមូលដ្ឋានខេត្តក្រចេះ ត្រូវអនុវត្តន៍ភារកិច្ចសំខាន់ ៣
ភ្នំពេញ៖សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានណែនាំដល់ក្រុមការងារគណបក្ស ចុះមូលដ្ឋានខេត្តក្រចេះ ត្រូវអនុវត្តន៍ភារកិច្ចសំខាន់ ៣ គឺ គាំទ្រ និងចូលរួមជាមួយ អង្គការចាត់តាំងគណបក្សនៅមូលដ្ឋានដើម្បី៖
១- ពង្រឹងអង្គការចាត់តាំងគណបក្សនៅថ្នាក់ក្រោមជាតិ ទាំងវិស័យនយោបាយ សតិអារម្មណ៍ ចាត់តាំង និងហិរញ្ញវត្ថុ។ ពង្រឹងគណបក្សលើវិស័យនយោបាយ គឺធ្វើឲ្យអង្គការចាត់តាំងគណបក្សគ្រប់ថ្នាក់បានយល់ជ្រួតជ្រាបច្បាស់អំពីកម្មវិធីនយោបាយ គោលនយោបាយ គោលការណ៍ និងសេចក្តីសម្រេចនានារបស់គណបក្ស ហើយផ្អែកលើមូលដ្ឋាន នោះដាក់ចេញនូវផែនការ និងវិធានការនានាដើម្បីដឹកនាំអនុវត្តឲ្យទៅជាសកម្មភាពជាក់ស្តែងប្រកបដោយប្រសិទ្ធភាព ។
២- រៀបចំផែនការសកម្មភាព ដើម្បីអនុវត្តផែនការឆ្ពោះទៅកាន់ការបោះឆ្នោតនីមួយៗ តាមសេចក្តីសម្រេចរបស់ គណៈអ ចិន្ត្រៃយ៍គណៈកម្មាធិការកណ្តាល។
៣- ធ្វើជាស្នូលនៃសាមគ្គីភាព ឯកភាពផ្ទៃក្នុងរបស់ គណបក្ស និងធ្វើជាគំរូដល់សមាជិក និងអ្នកគាំទ្រគណបក្ស ក៏ដូចជា មហាជនទូទៅ ព្រមទាំងខិតខំកសាងទំនាក់ទំនងល្អជាមួយ មហាជន និងធ្វើអំពើល្អជាមួយប្រជាជនគ្រប់មជ្ឈដ្ឋាន សំដៅលើកកម្ពស់ប្រជាប្រិយភាពរបស់គណបក្សក៏ដូចជាដើម្បីទាក់ទាញការគាំទ្របន្ថែមទៀតពីសំណាក់មហាជន ចំពោះ គណបក្សប្រជាជនកម្ពុជា ។
ចំណុចសំខាន់ៗទាំង៣ ខាងលើនេះ គឺជាប្រសាសន៍ណែនាំរបស់ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា ក្នុងឱកាសអញ្ជើញជាអធិបតីភាពក្នុងពិធីប្រកាសប្រធាន អនុប្រធានទី១ ក្រុមការងារគណបក្ស ប្រជាជនកម្ពុជា ចុះមូលដ្ឋានខេត្តក្រចេះ នៅព្រឹកថ្ងៃទី០៣ ខែមករា ឆ្នាំ២០២៤ នាសាលមហោស្រពខេត្តក្រចេះ ។
តាមរយៈសេចក្តីសម្រេចដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស និងគណៈអចិន្ត្រៃយ៍គណៈកម្មាធិការកណ្តាលនៃគណបក្សប្រជាជនកម្ពុជា ត្រូវបានតែងតាំង ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន សមាជិកគណៈកម្មការកណ្តាល ជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានខេត្តក្រចេះ,
ឯកឧត្តម សរ ចំរុង សមាជិកគណៈកម្មការកណ្តាល ជាអនុប្រធានទី១ ក្រុមការងារគណបក្សចុះមូលដ្ឋានខេត្តក្រចេះ។
បន្ទាប់ពីទទួលបានសេចក្តីសម្រេចនេះរួចមក ឯកឧត្តម ប្រធានក្រុមការងារ បានសំដែងនូវអំណរគុណយ៉ាងជ្រាលជ្រៅបំផុតចំពោះថ្នាក់ដឹកនាំគណបក្សប្រជាជនកម្ពុជា ដែលបានផ្តល់សេចក្តីទុកចិត្តដល់ថ្នាក់ដឹកនាំចុះមូលដ្ឋានខេត្តក្រចេះ និងផ្តល់ការទទួលខុសត្រូវចូលរួមចំណែកក្នុងការដឹកនាំការងារគណបក្ស ការពារ គណបក្ស និងចូលរួមកសាងសមិទ្ធិផលនិងស្នាដៃថ្មីៗផ្សេងទៀត ជូនជាតិមាតុភូមិ ៕
