ឯកឧត្តម អូស្មាន ហាស្សាន់ អញ្ជើញផ្សព្វផ្សាយសេចក្តីសម្រេចមហាសន្និបាតវិសាមញ្ញតំណាងទូទាំងប្រទេសគណបក្សប្រជាជនកម្ពុជា នៅក្នុងមូលដ្ឋានខណ្ឌឫស្សីកែវ

ភ្នំពេញ៖ កាលពីរសៀលថ្ងៃទី២៣ ខែធ្នូ ឆ្នាំ២០២៣នេះ ឯកឧត្តម អូស្មាន ហាស្សាន់ សមាជិកគណៈអចិន្រ្តៃយ៍នៃគណៈកម្មាធិការកណ្តាល និងជាប្រធានគណៈចលនាសាសនិកឥស្លាមរបស់គណបក្សជាជនកម្ពុជា បានអញ្ជើញជាអធិបតីក្នុងពិធីប្រជុំផ្សព្វផ្សាយសេចក្តីសម្រេចចិត្តនៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា នៅមជ្ឈមណ្ឌលម៉ូឌែន៥ ក្នុងមូលដ្ឋានខណ្ឌឫស្សីកែវ ដែលមានថ្នាក់ដឹកនាំ គណៈចលនាសាសនិកឥស្លាម សហគមន៍ មកពីរាជធានី ខេត្ត ទាំង២៥ ចំនួ១១០០នាក់ ។

ថ្លែងទៅកាន់អង្គប្រជុំ ឯកឧត្តម អូស្មាន ហាស្សាន់ បានបញ្ជាក់អំពីការសម្រេចរបស់មហាសន្និបាតគណបក្សក្រោមវត្តមានរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្ស និងសម្តេចអនុប្រធានទាំង៤រូប ដោយអង្គសន្និបាត ជ្រើសតាំងសម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាជាអនុប្រធានគណបក្សប្រជាជនកម្ពុជា។

ក្នុងនាមប្រធានគណៈចលនា ឯកឧត្តម បានមានប្រសាស៍ថា គណៈចលនារាជធានី ខេត្ត គ្រប់លំដាប់ថ្នាក់ ត្រូវបន្តពង្រីក ពង្រឹង តាមគោលការណ៍ដែលបានកំណត់ អនុវត្តដោយជោគជ័យនូវកម្មវិធីនយោបាយ និងការងារនានារបស់គណបក្ស ដោយប្រកាន់នូវ គោលការណ៍សមូហភាពដឹកនាំ បុគ្គលទទួលខុសត្រូវ តាមរបៀបរបបការងារ ច្បាស់លាស់ ដោយត្រូវសាមគ្គីភាពឯកភាពផ្ទៃក្នុង និងត្រូវផ្សារភ្ជាប់ជាមួយប្រជាជន គ្រប់កាលៈទេសៈ។ ខិតខំថែរក្សាកម្លាំងនយោបាយគណបក្ស ជាពិសេសកម្លាំងប្រជាជន ដែលបានបោះឆ្នោតគាំទ្រគណបក្សយើងឱ្យបានស្ថិតស្ថេរគង់វង្ស ដោយត្រូវយកចិត្តទុកដាក់ថែទាំទាំងស្មារតី និងសម្ភារឱ្យបានជាប់ជាប្រចាំ ដើម្បីធានាការដឹកនាំ របស់គណបក្សទាំងក្នុងពេលបច្ចុប្បន្ន និងអនាគតយូរអង្វែងតទៅមុខទៀត។

ត្រូវបន្តជំរុញសកម្មភាពពង្រឹងពង្រីកសមាជិកបក្សឱ្យបានជាប់ជាប្រចាំដោយ សហការណ៍ជាមួយគណបក្សមូលដ្ឋាន ជំរុញការងារអប់រំនយោបាយ សតិអារម្មណ៍ ការងារចលនាមហាជន ការចិញ្ចឹមចលនានៅមូលដ្ឋានឱ្យបានទូលំទូលាយ ស៊ីជម្រៅ ជាពិសេសយុវជនដែលគ្រប់អាយុបោះឆ្នោត ។ ចំពោះលទ្ធផលមហាសន្និបាតវិសាមញ្ញតំណាងទូទាំងប្រទេសរបស់គណបក្ស ថា្នក់ដឹកនាំគណៈចលនារាជធានី-ខេត្ត ត្រូវបន្តផ្សព្វផ្សាយឱ្យបានទូលំ ទូលាយដល់សហគមន៍ ។

ជាមួយនេះដែរ ឯកឧត្តម អូស្មាន ហាស្សាន់ ក៏បានបញ្ជាក់ទៅកាន់ អង្គប្រជុំ អំពីការសម្រេចបោះឆ្នោតជ្រើសរើសជ្រើសតាំងបន្ថែមសមាជិកគណៈកម្មាធិការកណ្ដាលចំនួន៤៩៦រូបដែលធ្វើឲ្យបរិមាណសមាជិកគណៈកម្មាធិការកណ្ដាលរបស់គណបក្សប្រជាជនកម្ពុជា មានចំនួនសរុប១៣១២រូប និងការសម្រេចបញ្ចូលសមាជិកគណ:អចិន្ត្រៃយ៍នៃគណៈកម្មាធិការកណ្តាលរបស់គណបក្សចំនួន២៣រូបបន្ថែមទៀតផងដែរ។

ឯកឧត្តម អូស្មាន ហាស្សាន់ សមាជិកគណៈអចិន្រ្តៃយ៍នៃគណៈកម្មាធិការកណ្តាល និងជាប្រធានគណៈចលនាសាសនិកឥស្លាមរបស់គណបក្សប្រជាជនកម្ពុជា បានថ្លែងអំណរគុណចំពោះការចូលរួមពីសំណាក់ ឯកឧត្តម លោកជំទាវ លោក លោកស្រី យុវជន មកពីរាជធានី-ខេត្ត តំណាងសហគមន៍ ដែលបានរួមគ្នាបន្តថែរក្សាសុខ សន្តិភាព ស្ថិរភាពសង្គម និងការអភិវឌ្ឍប្រទេសជាតិឱ្យមានការរីកចម្រើក ជាពិសេសក្នុងអាណត្តិទី៧នេះក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះជាណាចក្រកម្ពុជា និងជាអនុប្រធានគណបក្សប្រជាជនកម្ពុជា៕