រដ្ឋបាលខេត្តកំពង់ធំ រៀបចំពិធីបើកសន្និបាតប្រចាំឆ្នាំ២០២៣ និងកំណត់ទិសដៅការងារសម្រាប់ឆ្នាំ២០២៤
ភ្នំពេញ៖ នៅព្រឹកថ្ងៃទី២០ ខែធ្នូ ឆ្នាំ២០២៣ រដ្ឋបាលខេត្តកំពង់ធំ បានរៀបចំពិធីបើកសន្និបាតប្រចាំឆ្នាំ២០២៣ ដើម្បីរួមគ្នាពិនិត្យវាយតម្លៃសមិទ្ធផល បញ្ហាប្រឈម និងកំណត់ទិសដៅការងារសម្រាប់ឆ្នាំ២០២៤ ឲ្យកាន់តែមានប្រសិទ្ធភាពថែមទៀត។
ពិធីនេះប្រព្រឹត្តិទៅក្រោមអធិបតីភាពឯកឧត្តម ឈុន ឈន់ ប្រធានក្រុមប្រឹក្សាខេត្តកំពង់ធំ និងឯកឧត្តម ងួន រតនៈ អភិបាលខេត្តកំពង់ធំ ដោយមានការអញ្ជើញចូលរួមពីថ្នាក់ដឹកនាំខេត្ត ក្រុងស្រុក ឃុំសង្កាត់ មន្ទីរអង្គភាពជុំវិញខេត្ត និងកងកម្លាំងទាំងបី នៅសាលប្រជុំសាលាខេត្តកំពង់ធំ។
ឯកឧត្តម ងួន រតនៈ អភិបាលខេត្ត បានថ្លែងថា អង្គសន្និតបាតរបស់យើងនាពេលនេះ ពិតជាមានអត្ថន័យ និងជាឱកាសដ៏មានសារៈសំខាន់សម្រាប់យើងទាំងអស់គ្នា សម្រាប់ធ្វើការវាយតម្លៃអំពីលទ្ធផលការងារដែលរដ្ឋបាលខេត្ត បានខិតខំប្រឹងប្រែង សម្រេចបាន និងរួមគ្នាពិនិត្យវាយតម្លៃអំពីបញ្ហាប្រឈម ដែលនៅសេស សល់សម្រាប់ជាមូលដ្ឋានក្នុងការកំណត់ទិសដៅការងារសម្រាប់អនុវត្តកម្មវិធីកំណែទម្រង់នានារបស់រាជរដ្ឋាភិបាលឲ្យកាន់តែមានប្រសិទ្ធភាព។
ឯកឧត្តមអភិបាលខេត្ត បានបន្តទៀតថា ឆ្នាំនេះអង្គសន្និបាតនឹងធ្វើការបែងចែកក្រុមពិភាក្សាជា ០៨ក្រុម ដើម្បីពិភាក្សាលើប្រធានបទសំខាន់ៗ ក្នុងគោលបំណងប្រមូលធាតុចូលពីសមាជិកនៃអង្គសន្និបាតទៅលើរបាយការណ៍ និងទិសដៅ ព្រមទាំងគោលការណ៍សំខាន់ៗ សម្រាប់អនុវត្តក្នុងឆ្នាំ២០២៤ បន្តទៅទៀត។ ហើយលទ្ធផលសម្រេចបានគួជាទីមោទនៈក្នុងឆ្នាំ២០២៣កន្លងមក គឺជាលទ្ធផលនៃកិច្ចខិតខំអស់ពីកម្លាំងកាយចិត្ត ដោយឈរលើស្មារតីទទួល ខុសត្រូវខ្ពស់ក្នុងការខិតខំបំពេញការងារតាមតួនាទី ភារកិច្ច ប្រកបដោយ ឆន្ទៈម្ចាស់ការ ភក្ដីភាព មនសិការ វិជ្ជាជីវៈ និងវប្បធម៌សេវាសាធារណៈ ពីសំណាក់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រមទាំងការចូលរួមពីដៃគូអភិវឌ្ឍន៍ សប្បុរសជន អ្នកពាក់ព័ន្ធនានា និងជាពិសេស គឺការសហការ និងការចូលរួមពីប្រជាពលរដ្ឋ។
លើសពីនេះទៀត ទោះជាយ៉ាងនេះក្តី យើងក៏នៅមានបញ្ហាប្រឈមមួយចំនួន ដែលរដ្ឋបាលថ្នាក់ក្រោមជាតិរបស់យើង និងគ្រប់ភាគីពាក់ព័ន្ធទាំងអស់ ត្រូវតែសហការគ្នាដោះស្រាយ និងខិតខំពង្រឹងការអនុវត្តតួនាទីភារកិច្ចរបស់ខ្លួនឲ្យបានខ្ជាប់ខ្ជួនថែមទៀត។
សូមបញ្ជាក់ផងដែរថា៖ ប្រធានបទដែលត្រូវលើកយកមកពិភាក្សាក្នុងអង្គសន្និបាតឆ្នាំនេះ រួមមាន០៨ប្រធានបទសំខាន់ៗរួមមាន៖
ប្រធានបទទី១៖ ការបង្រ្កាបទបល្មើសគ្រឿងញៀន
ប្រធានបទទី២៖ ការបង្រ្កាបទបល្មើសចោរកម្ម
ប្រធានបទទី៣៖ ការបង្រ្កាបទបល្មើសព្រៃឈើ
ប្រធានបទទី៤៖ ការបង្រ្កាបទបល្មើសនេសាទ
ប្រធានបទទី៥៖ ការដោះស្រាយទំនាស់ដីធ្លីក្រៅប្រព័ន្ធតុលាការ
ប្រធានបទទី៦៖ ការដោះស្រាយទំនាស់ដីធ្លីក្នុងប្រព័ន្ធតុលាការ
ប្រធានបទទី៧៖ ការផ្តល់សេវាតាមរយៈយន្តការច្រកចេញចូលតែមួយ
ប្រធានបទទី៨៖ ការផ្តល់សេវាតាមរយៈមន្ទីរ អង្គភាពជំនាញ ៕
