ប្រមុខរាជរដ្ឋាភិបាល ឲ្យក្រសួងពាក់ព័ន្ធទាំងអស់ គិតគូរបង្កើតការងារ និងលើកកម្ពស់សេដ្ឋកិច្ច ជូនពលរដ្ឋនៅតំបន់រុនតាឯក
សៀមរាប៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានណែនាំឱ្យក្រសួងស្ថាប័នពាក់ព័ន្ធទាំងអស់ គិតគូររៀបចំលើកកម្ពស់សេដ្ឋកិច្ច និងបង្កើតការងារជូនពលរដ្ឋនៅតំបន់រុនតាឯក ។
ក្នុងឱកាសអញ្ជើញសំណេះសំណាលជាមួយប្រជាពលរដ្ឋរស់នៅភូមិធម្មជាតិរុនតាឯក និងតំបន់ពាក់ស្នែង សរុបជិត ៣ពាន់នាក់ នៅថ្ងៃទី៨ ខែធ្នូនេះ សម្តេចធិបតីបញ្ជាក់ថា «ប្រជាពលរដ្ឋនៅទីនេះ ហើយសេដ្ឋកិច្ចកើនជ្រុងមួយដែលសំខាន់ គឺតាមរយៈការបង្កើតការងារ នេះគឺជាយុទ្ធសាស្រ្តមួយសំខាន់របស់រាជរដ្ឋាភិបាលក្នុងអាណត្តិទី៧នេះ។ សេដ្ឋកិច្ចកើន មិនអាចកើនគ្រាន់ថាចំណូលពីប្រេងឡើងនោះទេ ត្រូវតែផ្តល់ផលលាភដល់ប្រជាពលរដ្ឋ គឺត្រូវតែបង្កើនការងារឱ្យជីវភាពរស់នៅរបស់ប្រជាពលរដ្ឋបានកើននៅគ្រប់វិស័យ អ៊ីចឹងសូមគិតគូរកន្លែងនេះ។ សូមប្រគល់ភារកិច្ចនេះឱ្យក្រសួងកសិកម្ម ក្រសួងទេសចរណ៍ អាជ្ញាធរមូលដ្ឋាន ក្រសួងពាក់ព័ន្ធទាំងអស់ ដើម្បីគិតគូរប្រទាក់ក្រឡាកន្លែងនេះ ជាមួយនឹងសក្តានុពលរបស់ខេត្តរបស់យើង»។
សម្តេចធិបតី បានណែនាំឲ្យពិនិត្យលទ្ធភាព ផ្តល់ការបណ្តុះបណ្តាលវិជ្ជាជីវៈ ដល់ប្រជាពលរដ្ឋនៅក្នុងតំបន់នេះ ជាពិសេសយុវជន។
សម្តេចបន្ថែមថា «លោកតាលោកយាយ រាជរដ្ឋាភិបាលមិនអាចជប់ការងារស្អែកបានទេ មិនអាចលើករោងចក្រស្អែកមកបានទេ តែនៅក្នុងផែនការ ដើម្បីធ្វើចំពោះមុខការងារដែលមានស្រាប់ការងារនៅក្នុងខេត្តយើង ជួយសម្រួល ការដឹកជញ្ជូន កាត់បន្ថយថ្លៃ។ ទី២ខិតខំភ្ជាប់សក្តានុពលនៅកន្លែងនេះ ហើយនឹងការអភិវឌ្ឍន៍មិនមែនតែរុនតាឯកទេ សូម្បីតែស្រុកបន្ទាយស្រី ស្រុកអង្គរធំ ឱ្យទៅជាតំបន់អភិវឌ្ឍន៍ ព្រោះសៀមរាបមិនអាចរីកតែក្រុងសៀមរាបទេ ត្រូវតែរីកគ្រប់ស្រុកទាំងអស់តាមសក្តានុពលរបស់ខ្លួន»។
សូមជម្រាបថា បច្ចុប្បន្ននេះ ប្រជាពលរដ្ឋស្ម័គ្រចិត្តប្តូរទីលំនៅចេញពីតំបន់រមណីយដ្ឋានអង្គរទៅរស់នៅតំបន់អភិវឌ្ឍន៍រុនតាឯកមានចំនួន ៥,៨៦៥គ្រួសារ និងតំបន់អភិវឌ្ឍន៍ពាក់ស្នែងចំនួន ៤,០៣២គ្រួសារ។ គ្រួសារប្រជាពលរដ្ឋបានចាកចេញទៅរស់នៅតំបន់អភិវឌ្ឍន៍រុនតាឯក ចំនួន ៤,៧៣០ខ្នងផ្ទះ ស្មើនឹង ៤៧,៧៩ភាគរយ នៃចំនួនគ្រួសារដែលបានចាប់ឆ្នោតសរុប និងបានរៀបចំរួចរាល់នូវបណ្ណកម្មសិទ្ធិចំនួន៤,៥៥៤បណ្ណ៕
