អភិបាលរងខេត្តព្រះសីហនុ ណែនាំដល់កីឡាករចំណុះទូកទាំងអស់ត្រូវគោរពវិន័យ ធ្វើយ៉ាងណារក្សាអោយបាននូវសេចក្ដីថ្លៃថ្នូរ និងមិនត្រូវបង្កភាពអនាធិបតេយ្យឡើយ

ភ្នំពេញ៖ នារសៀលថ្ងៃទី២៥ ខែវិច្ឆិកា ឆ្នាំ២០២៣ លោក ឡុង ឌីម៉ង់ អភិបាលរង នៃគណៈអភិបាលខេត្តព្រះសីហនុ និងជាប្រធានក្រុមការងារដឹកនាំកីឡាករចំណុះទូក ង «ព្រះសីហនុសែនជ័យបារមីជំទាវម៉ៅ» របស់ខេត្តព្រះសីហនុ បានអញ្ជើញជួបសំណេះសំណាលជាមួយកីឡាករចំណុះឱ្យទូក នៅទីតាំងស្នាក់អាស្រ័យបណ្តោះអាសន្នរបស់កីឡាករចំណុះទូក។

មានប្រសាសន៍សំណេះសំណាល លោកអភិបាលរងខេត្ត បានធ្វើការផ្តាំផ្ញើថា ជ័យជំនះជាការសំខាន់ ហើយអ្វីដែលសំខាន់មួយទៀតគឺការគោរពវិន័យ ធ្វើយ៉ាងណារក្សាអោយបាននូវសេចក្ដីថ្លៃថ្នូរ សណ្ដាប់ធ្នាប់ របៀបរៀបរយ និងមិនត្រូវបង្កភាពអនាធិបតេយ្យឡើយ។ កីឡាករចំណុះទូកទាំងអស់ត្រូវស្តាប់ និងធ្វើតាមតាមការណែនាំរបស់គណៈកម្មការគ្រប់គ្រងទូក និងថែរក្សាសុខភាពឱ្យបានខ្ជាប់ខ្ជួន។

ឆ្លៀតក្នុងឱកាសនេះ លោកអភិបាលរងខេត្ត ក៏បាននាំយកនូវ ម្ហូបអាហារ ភេសជ្ជៈ និងថវិកា ដែលជាអំណោយឧបត្ថម្ភពី ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ដើម្បីផ្គត់ផ្គង់ និងលើកទឹកចិត្តដល់កីឡាករមុន និងក្នុងពេលប្រកួតផងដែរ ៕