នាយករដ្ឋមន្ត្រី ហ៊ុន ម៉ាណែត៖ អ្នកចោទរាជរដ្ឋាភិបាលថ្មីដេក មិនធ្វើការងារ គឺអ្នកនោះហើយដែលដេកលក់ពិតប្រាកដ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា អ្នកដែលចោទថារដ្ឋាភិបាលថ្មីដេក មិនធ្វើការងារអ្វី គឺអ្នកនោះហើយដែលដេកលក់ពិតប្រាកដ ព្រោះពួកគេដេកមិនបានមើលឃើញពីអ្វីដែលរដ្ឋាភិបាល កំពុងធ្វើ។
ក្នុងពិធីជួបសំណេះសំណាលជាមួយកម្មករ-កម្មការិនី ចំនួន ១៨១០៨ នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាថ្ងៃទី២១ វិច្ឆិកា សម្តេចធិបតី ហ៊ុន ម៉ាណែត នាយករដ្ឋមន្រ្ដីកម្ពុជាបានថ្លែងថា រាជរដ្ឋាភិបាលថ្មីដេក ប៉ុន្ដែដេក គឺដេកគិតគូរ ដើម្បីដោះស្រាយបញ្ហានានាដែលនៅសេសសល់ និងបង្កើននូវផលវិជ្ជមានជូនបងប្អូនកម្មករ-កម្មការិនី បន្ថែមទៀត។
សម្តេចធិបតី បញ្ជាក់ថា ជាក់ស្ដែងរាជរដ្ឋាភិបាលអាណត្តិទី៧ បាននិងកំពុងយកចិត្ត ទុកដាក់ចំពោះបងប្អូនកម្មករ-កម្មការិនី ដោយបានដាក់ចេញនូវគោលនយោបាយ ក៏ដូចជាយន្តការជាច្រើន ដូចជា គោលនយោបាយគាំពារសង្គម ការដំឡើងប្រាក់បៀវត្សអប្បបរមា ដល់ ២០៤ ដុល្លារក្នុងមួយខែ និងគោលនយោបាយលើកទឹកចិត្តដល់ស្ត្រីជាកម្មការិនីតាំងពីពេលមានផ្ទៃពោះ ពេលសម្រាល និងក្រោយ ពេលសម្រាលជាដើម។
សម្ដេចធិបតី អំពាវនាវឱ្យប្រជាពលរដ្ឋ ត្រូវជឿទុកចិត្ដរាជរដ្ឋាភិបាល ហើយក្នុងរយៈ២ ឬ៣ឆ្នាំខាងមុខ នឹងបង្ហាញសមត្ថភាព និងលទ្ធផលជូនប្រជាពលរដ្ឋបានឃើញជាក់ស្ដែងផងដែរ។ ឆ្លៀតក្នុងឱកាសនេះ សម្តេចធិបតី ហ៊ុន ម៉ាណែត ក៏បានអរគុណដល់ក្រសួងការងារ និងបណ្ដុះបណ្ដាលវិជ្ជាជីវៈ ដែលមិន បានរៀបចំគិតគូរដើម្បីតែល្អមើលប៉ុណ្ណោះទេ ប៉ុន្តែគឺបានរៀបចំផែនការអនុវត្តន៍ទៀតផង។ សម្ដេចធិបតីក៏បានជំរុញឱ្យក្រសួង បន្តតាមដានត្រួតពិនិត្យប្រកបដោយប្រសិទ្ធភាព ទៅលើកិច្ចការងារ ទាំងអស់នេះ៕
