សម្ដេចធិបតី ស្នើឲ្យធនាគារ និងគ្រឹះស្ថានហិរញ្ញវត្ថុ យកចិត្តទុកដាក់សម្រួលឥណទាន ដើម្បីសម្រាលការលំបាករបស់អតិថិជន
ភ្នំពេញ៖ សម្តេចមហាបវធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានស្នើឲ្យធនាគារ និងគ្រឹះស្ថានហិរញ្ញវត្ថុ យកចិត្តទុកដាក់សម្រួលឥណទាន ដើម្បីសម្រាលការលំបាករបស់អតិថិជន ។
ក្នុងអញ្ជើញសម្ពោធដាក់ឲ្យប្រើប្រាស់ជាផ្លូវការ នូវស្ពានកោះនរា ដែលជាស្ពានប្រអប់បេតុង ខ្សែកាបឆ្លងកាត់ទន្លេបាសាក់ ភ្ជាប់រវាងតំបន់អភិវឌ្ឍន៍កោះពេជ្រ និងតំបន់អភិវឌ្ឍន៍កោះនរា នារសៀលថ្ងៃទី១៥ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បញ្ជាក់ថា «ឥលូវរាជរដ្ឋាភិបាល, ធនាគារជាតិ បានអនុញ្ញាតបន្ធូរលក្ខខណ្ឌមួយចំនួន ជូនវិស័យធនាគារ ក៏ដូចជាក្រុមហ៊ុនមួយចំនួន ចឹងសូមធ្វើយ៉ាងម្ដេចប្រតិបត្ដិករ នៅក្នុងវិស័យនេះ ដែលបានការសម្រាលហើយ សូមធ្វើយ៉ាងណាជួយសម្រាលទៅដល់អតិថិជនផង ទៅតាមលទ្ធភាពធ្វើបាន នៅក្នុងលក្ខណៈប្រុងប្រយ័ត្ន»។
សម្តេចធិបតីបន្ថែមថា អ្វីដែលរាជរដ្ឋាភិបាល បានផ្ដល់គោលការណ៍ សង្ឃឹមថា ប្រតិបត្ដិករទាំងនៅក្នុងវិស័យធនាគារ, អចលនទ្រព្យ ក៏ដូចជាវិស័យផ្សេងៗ ដែលអាចបានផល សូមធ្វើការគិតគូរវិធានការយ៉ាងណា ដើម្បីជួយសម្រាលបន្ដ ទៅដល់បងប្អូនប្រជាពលរដ្ឋរបស់យើង ដែលត្រូវការកម្ចី។
សម្តេចធិបតីលើកឡើងថា យើងត្រូវជួយគ្នានៅក្នុងការលំបាក ហើយពិតណាស់ ត្រូវមានការប្រុងប្រយ័ត្ន ព្រោះមិនចង់ឲ្យដួលរំលំ ដោយជួយសម្រួលយ៉ាងណា ក្នុងលក្ខខណ្ឌមួយសមស្រប ដោយមិនធូរពេក និងមិនលំបាកពេក ៕
