ក្រសួងកសិកម្ម និងធនាគារវីង ចុះMOUដើម្បីផ្ដល់កម្ចីឥណទានសម្បទានដល់ប្រជាកសិករ ក្នុងគោលបំណងអាចឱ្យប្រជាកសិករខ្មែរទទួលបានកម្ចីឥណទានដែលមានការប្រាក់ទាប

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ រួមជាមួយធនាគារវីង បានចុះអនុស្សារណៈយោគយល់គ្នា(MOU) ក្នុងការសហការគ្នា ដើម្បីផ្ដល់កម្ចីឥណទានសម្បទានដល់ប្រជាកសិករ ក្នុងគោលបំណងអាចឱ្យប្រជាកសិករខ្មែរទទួលបានកម្ចីឥណទានដែលមានការប្រាក់ទាប ពោលគឺត្រឹមតែចន្លោះពី៧ទៅ៨ភាគរយក្នុងមួយឆ្នាំ។

អនុស្សរណៈយោគយល់គ្នានេះ ត្រូវបានចុះហត្ថលេខាដោយ ឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកឧត្ដម គិត ម៉េង អគ្គនាយកធនាគារវីង នៅក្រសួងកសិកម្ម នាថ្ងៃទី១៤ ខែវិច្ឆិកា ឆ្នាំ២០២៣។

ឯកឧត្ដម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា តាមរយៈកិច្ចសហការគ្នារវាងក្រសួង និងធនាគារវីងនេះ នឹងដាក់ចេញឥណទានសម្បទានក្នុងទំហំទឹកប្រាក់សរុបប្រមាណ៥លានដុល្លារអាមេរិក សម្រាប់ផ្ដល់ជូនសហគមន៍កសិកម្ម សហគ្រាសធុនតូច និងមធ្យមក្នុងវិស័យកសិកម្ម ព្រមទាំងប្រជាកសិករអាចស្នើសុំកម្ចីជាលក្ខណៈឥណទានសម្បទាននេះ។

ឯកឧត្ដមរំពឹងថា តាមរយៈអនុស្សារណៈយោគយល់គ្នារវាងក្រសួងកសិកម្ម និងធនាគារវីងនេះ នឹងធ្វើឱ្យសហគ្រាស គ្រឹះស្ថានមីក្រូហិរញ្ញវត្ថុ ឬធនាគារ អាចគិតគូរពិចារណា និងដើរតាមធនាគារវីង សម្ដៅជួយជ្រោមជ្រែងដល់ប្រជាកសិករ ឬសហគមន៍បន្ថែមទៀត។

ឯកឧត្ដមរដ្ឋមន្រ្តីថា បច្ចុប្បន្នតម្រូវការឥណទានក្នុងវិស័យកសិកម្មកំពុងជារឿងចាំបាច់ខ្លាំង ដើម្បីអាចឱ្យប្រជាកសិករ ឬសហគមន៍ អាចយកសាច់ប្រាក់ក្នុងវិនិយោគបន្ថែម ឬប្រើប្រាស់ជាទុនបង្វិលសម្រាប់ដោះស្រាយការលក់ដូរផលិតផលឱ្យបានទាន់ពេលវេលា។

បើតាមឯកឧត្ដម គិត ម៉េង អគ្គនាយកធនាគារវីង បានបញ្ជាក់ថា បច្ចុប្បន្នធនាគារវីងមានអតិថិជនសរុបប្រមាណ១៧លាននាក់ ដែលកំពុងប្រតិបត្តិក្នុងចរន្តប្រព័ន្ធធនាគារវីង ហើយមានគណនីប្រមាណ៦លានគណនី ដែលបានចុះបញ្ជីក្នុងប្រព័ន្ធរបស់ធនាគារវីង។

ឯកឧត្ដមអគ្គនាយកធនាគារវីង រំពឹងថា៖ ឥណទានសម្បទាននេះនឹងជួយជំរុញកំណើនសេដ្ឋកិច្ចបន្ថែមទៀត ជាពិសេសនឹងជួយបំពេញតម្រូវការរបស់សហគ្រាសធុនតូច និងមធ្យមក្នុងវិស័យកសិកម្មរបស់កម្ពុជា៕