ឧត្តមសេនីយ៍ឯក សំ ស៊ីយ៉ាន ដឹកនាំកិច្ចប្រជុំបូកសរុបលទ្ធផលការងារប្រចាំខែតុលា និងលើកទិសដៅការងារបន្ត របស់នាយកដ្ឋាននគរបាលការពារ
ភ្នំពេញ៖ នាព្រឹកថ្ងៃចន្ទ ១កើត ខែកត្តិក ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១៣ ខែវិច្ឆិកា ឆ្នាំ២០២៣ នាយកដ្ឋាននគរបាលការពារ បានបើកកិច្ចប្រជុំបូកសរុបលទ្ធផលការងារប្រចាំខែតុលា និងលើកទិសដៅការងារប្រចាំខែវិច្ឆិកា ឆ្នាំ២០២៣ ក្រោមអធិបតីភាព ឯកឧត្តម ឧត្តមសេនីយ៍ឯក សំ ស៊ីយ៉ាន ប្រធាននាយកដ្ឋាននគរបាលការពារ ដោយមានការចូលរួមពីលោក-លោកស្រីអនុប្រធាននាយកដ្ឋាន លោកនាយការិយាល័យ និងប្រធានអង្គភាព។
ក្នុងឱកាសនោះ ឯកឧត្តម ឧត្តមសេនីយ៍ឯកប្រធាននាយកដ្ឋាន ក៏បានបន្តដឹកនាំកិច្ចប្រជុំផ្សព្វផ្សាយត្រួតពិនិត្យការងារការពារសុវត្ថិភាព សន្តិសុខ សណ្តាប់ធ្នាប់ ពិធីពិសារអាហារសាមគ្គី ដើម្បីអបអរសាទរជោគជ័យនៃការធ្វើជាម្ចាស់ផ្ទះរៀបចំព្រឹត្តិការណ៍កីឡាអាស៊ីអាគ្នេយ៍លើកទី៣២ និងកីឡាជនពិការលើកទី១២ ឆ្នាំ២០២៣ ដែលត្រូវរៀបចំឡើងនៅពហុកីឡដ្ឋានជាតិមរតកតេជោ និងផែនការការពារព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នាពេលខាងមុខនេះ។
ឯកឧត្តម ឧត្តមសេនីយ៍ឯក សំ ស៊ីយ៉ាន បានថ្លែងការកោតសរសើរ ក៏ដូចជាអរគុណដល់ថ្នាក់ដឹកនាំ និងមន្រ្តី នៃនាយកដ្ឋាននគរបាលការពារទាំងអស់ ដែលកន្លងមកបានខិតខំបំពេញភារកិច្ចបានល្អជូនអង្គភាព ពិសេសរក្សាបានសុវត្ថិភាព សន្តិសុខ សណ្តាប់ធ្នាប់ នៅតាមបណ្តាស្ថានទូត និវេសនដ្ឋាន និងក្រសួង ស្ថានប័នរដ្ឋ។
ដោយឡែកសម្រាប់កម្មវិធីខាងលើ ឯកឧត្តមប្រធាននាយកដ្ឋាន ក៏បានណែនាំឲ្យកម្លាំងទាំងអស់ យកចិត្តទុកដាក់ខ្ពស់បន្ថែមទៀត ប្រកបដោយស្មារតីទទួលខុសត្រូវ សំដៅធ្វើយ៉ាងណារក្សាការពារសុវត្ថិភាព សន្តិសុខ សណ្តាប់ធ្នាប់ ជូនថ្នាក់ដឹកនាំ និងភ្ញៀវកិត្តិយសចូលរួមពិធីទទួលបានភាពជោគជ័យ ៕
