រដ្ឋបាលខេត្តស្ទឹងត្រែង ឧបត្ថម្ភការស្នាក់នៅ និងអាហារដល់បក្ខជនជួបការលំបាកជីវភាព មកចូលរួមប្រឡងបាក់ឌុប

ភ្នំពេញ៖ ក្នុងឱកាសដ៏មានសារៈសំខាន់នេះ រដ្ឋបាលខេត្តស្ទឹងត្រែង បានជម្រាបជូនដំណឹងដល់មាតាបិតា អាណាព្យាបាល មន្ទីរជំនាញពាក់ព័ន្ធ គណៈគ្រប់គ្រងវិទ្យាល័យ និងបេក្ខជនដែលត្រូវមកចូលរួម ប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ថ្ងៃទី៦ ខែវិច្ឆិកា ឆ្នាំ២០២៣នេះ ហើយមាន លំនៅឋាននៅឆ្ងាយពីក្រុងស្ទឹងត្រែង ត្រូវមកស្នាក់នៅក្នុងទីរួមខេត្តស្ទឹងត្រែង ដើម្បីចូលរួមប្រឡង មេត្តាជ្រាបថា ក្នុងការរួមចំណែកសម្រួលមួយផ្នែកដល់ការលំបាករបស់បេក្ខជន រដ្ឋបាលខេត្តស្ទឹងត្រែង បានសម្រេចជួយសម្រួល និងឧបត្ថម្ភការស្នាក់នៅ និងអាហារដល់បេក្ខជនជួបការលំបាកជីវភាពមកពី មូលដ្ឋានឆ្ងាយពីក្រុងស្ទឹងត្រែង មានដូចខាងក្រោម៖

១-ការឧបត្ថម្ភខាងលើនេះជូនដល់បេក្ខជនដែលជួបការលំបាកមកពីមូលដ្ឋានឆ្ងាយៗ ពីក្រុងស្ទឹងត្រែង ត្រូវមកស្នាក់នៅដើម្បីចូលរួមប្រឡង ចំនួន ០២យប់ ៣ថ្ងៃ ចាប់ពីថ្ងៃទី៥ ដល់ថ្ងៃទី៧ ខែវិច្ឆិកា ឆ្នាំ២០២៣។

២-រដ្ឋបាលខេត្តនឹងពិនិត្យរៀបចំសម្រួលថ្លៃបន្ទប់ស្នាក់នៅផ្ទះសំណាក់ ឬសណ្ឋាគារ ដែលបង្កលក្ខណៈងាយស្រួលដល់ការធ្វើដំណើរមកប្រឡងបាន ក្នុងករណីដែលមានការស្ទាក់ឆ្ងាយពី មណ្ឌលប្រឡង និងមានលក្ខណៈប្រមូលផ្ដុំបាននោះ រដ្ឋបាលខេត្តនឹងចាត់តាំងឱ្យមានមធ្យោបាយ សម្រាប់ដឹកជញ្ជូនរួម ធ្វើដំណើរទៅ-មកកន្លែងស្នាក់នៅ និងងមណ្ឌលប្រឡងទាំងពីរក្នុងទីរួមខេត្ត។

៣-ដើម្បីមានភាពងាយស្រួល សូមមាតាបិតា អាណាព្យាបាល និងបេក្ខជនចូលរួម ប្រឡងខាងលើ ធ្វើការទំនាក់ទំនងទៅលោកគ្រូ អ្នកគ្រូ គណៈគ្រប់គ្រងវិទ្យាល័យសាមី ដើម្បីចុះឈ្មោះ នឹងទទួលបានព័ត៌មានអំពីការជួយសម្របសម្រួលនេះបានទាន់ពេលវេលា។

៤-ក្នុងករណ៏ចាំបាច់ សូមមេត្តាទំនាក់ទំនងផ្ទាល់ទៅមន្ទីរអប់រំ យុវជននិងកីឡាខេត្ត ឬមករដ្ឋបាលខេត្ត តាមរយៈលេខទូរស័ព្ទ ០៩៧ ៩១២ ៧០០០ ឬ ០១២ ៤៦៩ ៤៩២។

៥-ដើម្បីធានាដល់ការងារសម្របសម្រួលនេះ រដ្ឋបាលខេត្ត សូមស្នើមន្ទីរអប់រំ យុវជន និងកីឡាខេត្ត ជួយប្រមូលព័ត៌មានជាក់លាក់ពីមូលដ្ឋានក្រុង ស្រុក ពិសេសពីតាមវិទ្យាល័យដែលមាន បេក្ខជនចូលរួមប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ថ្ងៃទី៦ វិច្ឆកា ២០២៣នេះ រួចបញ្ជូនមករដ្ឋបាលខេត្ត និងសូមគ្រប់ផ្នែកមានសមត្ថកិច្ចជួយការពារសុវត្ថិភាពតាមកន្លែងស្នាក់នៅ ប្រមូលផ្តុំ និងបង្កលក្ខណៈដល់បេក្ខជនបានចូលរួមប្រឡងគ្រប់ៗគ្នាតាមគោលការណ៍ជាធរមាន។

សេចក្តីដូចបានជម្រាបជូនដំណឹងខាងលើ សូមមេត្តាទទួលជ្រាប និងទទួលបានជោគជ័យក្នុង ការរៀបចំការប្រឡងសញ្ញាបត្រមធ្យមសិក្សាទុតិយភូមិ ថ្ងៃទី៦ និងថ្ងៃទី៧ខែវិច្ឆិកា ឆ្នាំ២០២៣ នេះ ៕