ស.ស.យ.ក. បានចូលរួមលើកកម្ពស់សមត្ថភាព ជំនាញ ផលិតភាព ចំណេះដឹង និងបំណិនជីវិតដល់យុវជន ដើម្បីឆ្លើយតបទៅនឹងតម្រូវការជាក់ស្ដែងនៃបរិបទសង្គម
ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា តែងមានប្រសាសន៍ថា “អនាគតសង្គមជាតិ និងសុភមង្គលរបស់ប្រជាជន ជាពិសេសប្រជាជនវ័យក្មេង គឺមានសារៈសំខាន់បំផុត ដែលមិនអាចបណ្តោយទៅតាមយថាហេតុ ឬឱ្យមានភាពចៃដន្យណាមួយកើតឡើងធ្វើឱ្យប៉ះពាល់នោះទេ»។
ដោយឈរលើទស្សនៈនេះ ក្រុមគ្រួសារ ស.ស.យ.ក. តែងបានបណ្តុះ ស្មារតីស្នេហាជាតិដល់ស្រទាប់យុវជន និងបន្តបេសកកម្មកៀរគរយុវជន ក៏ដូចជាគ្រប់កោសិកានៃសង្គម ឱ្យចូលរួមគិត ចូលរួមធ្វើ ចូលរួមទទួលខុសត្រូវ ចំពោះជោគវាសនាជាតិខ្លួន ដើម្បីភាពរុងរឿង ថ្កុំថ្កើងសង្គមជាតិយើង។
ស.ស.យ.ក. បានចូលរួមលើកកម្ពស់សមត្ថភាព ជំនាញ ផលិតភាព ចំណេះដឹង និងបំណិនជីវិតដល់យុវជន ដើម្បីឆ្លើយតបទៅនឹងតម្រូវ ការជាក់ស្ដែងនៃបរិបទសង្គម។
បន្ថែមពីនេះ ភាពជាសមាជិកន ស.ស.យ.ក. មិនត្រឹមតែទទួលបានឱកាសក្នុងការរៀនសូត្រប៉ុណ្ណោះទេ ប៉ុន្តែបានផ្ដល់ឱកាសឱ្យខ្លួនឯងបានចូលរួមអនុវត្ត កាតព្វកិច្ចជាពលរដ្ឋមួយល្អ ជាកោសិកាសង្គមដែលហ៊ានលះបង់ ប្រយោជន៍ផ្ទាល់ខ្លួន ជាចំណែកក្នុងការចូលរួមដោះស្រាយបញ្ហា សង្គម និងផ្តល់ភាពជាគំរូសម្រាប់យុវជនជំនាន់ក្រោយ ដោយឆន្ទៈ តបស្នងទៅកាន់សង្គមជាតិតាមលទ្ធភាព ជាជាងការរំពឹងថាប្រទេស ជាតិនឹងធ្វើអ្វីៗដើម្បីយើងទាំងអស់គ្នា។
លើសពីភាពជាសមាជិក ប៉ុន្តែយើងប្រៀបដូចជាក្រុមគ្រួសារ ដែលតែងផ្តល់ការលើកទឹកចិត្ត ដឹងទុក្ខធុរៈ ការគាំទ្រ ទាំងស្មារតី និងសម្ភារៈ ដែលប្រកាន់ខ្ជាប់នូវគោលការណ៍មនុស្សធម៌ ដោយមិន ប្រកាន់ពូជសាសន៍ ពណ៌សម្បុរ ឬនិន្នាការនយោបាយឡើយ៕
