បរទេស៖ យោងតាមប្រធានសេដ្ឋវិទូរបស់មូលនិធិរូបិយវត្ថុអន្តរជាតិបានឱ្យដឹងថា ប្រទេសបារាំងនឹងពិបាកក្នុងការបំពេញតាមគោលដៅកាត់បន្ថយឱនភាពថវិការបស់ខ្លួនមកត្រឹម ២.៧% នៅឆ្នាំ២០២៧។
លោក Pierre-Olivier Gourinchas បានឲ្យដឹងនៅលើវិទ្យុ France Inter កាលពីថ្ងៃសៅរ៍ថា គោលដៅ នឹងពិបាកបន្តិចក្នុងការសម្រេចបាន ក្រោមគោលនយោបាយបច្ចុប្បន្នរបស់រដ្ឋាភិបាល
រដ្ឋាភិបាលរបស់ប្រធានាធិបតីបារាំង លោក Emmanuel Macron គ្រោងនឹងកាត់បន្ថយការចំណាយក្នុងប៉ុន្មានឆ្នាំខាងមុខ ប៉ុន្តែឱនភាពថវិកាទំនងជាមិនធ្លាក់ចុះក្រោមដែនកំណត់របស់សហភាពអឺរ៉ុប ៣% នៃ GDP រហូតដល់ឆ្នាំ២០២៧ នេះបើយោងតាមការព្យាករណ៍។
រដ្ឋមន្ត្រីហិរញ្ញវត្ថុបារាំង លោក Bruno Le Maire រំពឹងថាឱនភាពនៅឆ្នាំក្រោយនឹងមានចំនួន ៤.៤% ខណៈដែលគាត់ស្វែងរកការសន្សំចំនួន ១៦ ពាន់លានអឺរ៉ូនៅក្នុងថវិកាដែលរដ្ឋាភិបាលកំពុងធ្វើការដើម្បីទទួលបានការយល់ព្រមពីសមាជិកសភា។
ភាគច្រើននៃការសន្សំនេះគឺដោយសារតែការដកជំនួយថាមពលពិសេសសម្រាប់គ្រួសារ។
ប្រទេសបារាំងបានគេចពីការផ្លាស់ប្តូរការវាយតម្លៃ ឬទស្សនវិស័យពីសេវាវិនិយោគរបស់ Moody’s កាលពីថ្ងៃសុក្រ។
ទោះជាយ៉ាងណាក៏ដោយ Fitch Ratings នឹងពិនិត្យមើលការវាយតម្លៃរបស់ប្រទេសបារាំងនៅថ្ងៃទី២៧ ខែតុលា ហើយ S&P Global Ratings ដែលមានទស្សនវិស័យអវិជ្ជមានលើការវាយតម្លៃរបស់ប្រទេសនេះក៏នឹងមកដល់ក្នុងពេលឆាប់ៗនេះផងដែរ។
ប្រភព៖ Reuters
ប្រែសម្រួលដោយ៖ ឡាយ លីហួ
