អភិបាលខេត្តតាកែវ ចុះពិនិត្យមើលផលដំណាំកសិកម្ម របស់បងប្អូនប្រជាពលរដ្ឋ រងផលប៉ះពាល់ដោយសារជំនន់ទឹកភ្លៀង នៅភូមិសាស្រ្តស្រុកសំរោង និងស្រុកត្រាំកក់

ភ្នំពេញ៖ ឯកឧត្តម អ៊ូច ភា អភិបាលខេត្តតាកែវ និងជាប្រធានគណៈបញ្ជាការឯកភាពរដ្ឋបាលខេត្ត អមដំណើរដោយ លោក ញ៉ិប ស្រ៊ន ប្រធានមន្ទីរកសិកម្ម រុក្ខា ប្រមាញ់ និងនេសាទខេត្ត នាព្រឹកថ្ងៃអាទិត្យ ទី២២ ខែតុលា ឆ្នាំ២០២៣ បានចុះពិនិត្យផ្ទាល់ស្ថានភាពជំនន់ទឹកភ្លៀង នៅភូមិសាស្រ្តស្រុកសំរោង និងស្រុកត្រាំកក់ ជាពិសេសចុះពិនិត្យអំពីផលប៉ះពាល់នានា ដំណាំស្រូវ និងដំណាំកសិកម្មរួមផ្សំផ្សេងៗ របស់បងប្អូនប្រជាពលរដ្ឋ ដែលរងផលប៉ះពាល់ដោយសារជំនន់ទឹកភ្លៀង។ មានប្រសាសន៍នាឱកាសនោះដែរ ឯកឧត្តម អ៊ូច ភា អភិបាលខេត្ត បានធ្វើការណែនាំដល់ អាជ្ញាធរខេត្ត ក្រុង ស្រុក និងស្ថាប័នពាក់ព័ន្ធ ត្រូវតាមដានដោយយកចិត្តទុកដាក់ ជាបន្តទៅទៀត អំពីស្ថានភាពជំនន់ទឹកភ្លៀង និងសូមអោយបងប្អូនប្រជាពលរដ្ឋទាំងអស់ មេត្តាប្រុងប្រយ័ត្នខ្ពស់ និងចូលរួមសហការតាមការណែនាំរបស់អាជ្ញាធរ នៅអំឡុងពេលមានជំនន់ទឹកភ្លៀងកើតមានឡើង។ តាមការបញ្ជាក់ពី លោក ញ៉ិប ស្រ៊ន ប្រធានមន្ទីរកសិកម្ម រុក្ខា ប្រមាញ់ និងនេសាទខេត្តតាកែវ បានឱ្យដឹងថា គិតត្រឹមថ្ងៃទី២១ ខែតុលា ឆ្នាំ២០២៣ នៅទូទាំងខេត្តតាកែវ មានស្រុកចំនួន ៣ ដែលបានធ្វើអោយទឹកជន់លិចផ្ទៃដីកសិកម្ម របស់ពលរដ្ឋ ចំនួន ២,៨៨១ហិកតា មានជាង ៣៩៥៤គ្រួសារ ដែលរងផលប៉ះពាល់ ដោយក្នុងនោះដែរមាន៖ ១. ស្រុកបាទី មាន ០៦ឃុំ បានជន់លិចផ្ទៃដី ចំនួន ៤៨៦ហិកតា ស្មើនឹង ៦៥១គ្រួសារ។ ២. ស្រុកសំរោង មាន ០៨ឃុំ បានជន់លិចផ្ទៃដី ចំនួន ១,៤០១ហិកតា ស្មើនឹង ២៣៤៣គ្រួសារ។ ៣. ស្រុកត្រាំកក់ មាន ០៧ឃុំ បានជន់លិចផ្ទៃដី ចំនួន ៩៩៤ហិកតា ស្មើនឹង ៩៦០គ្រួសារ ៕