ម៉ិកស៊ិក៖ មន្ត្រីម៉ិកស៊ិក និងអ៊ុយក្រែនកាលពីថ្ងៃសៅរ៍ បានជំរុញឱ្យអ៊ីស្រាអែល បើកច្រករបៀងមនុស្សធម៌ ទៅកាន់តំបន់ហ្គាហ្សា ដើម្បីអនុញ្ញាតឲ្យប្រជាជនចេញ ខណៈប្រទេសទាំងពីរ ធ្វើមាតុភូមិនិវត្តន៍ពលរដ្ឋរបស់ពួកគេ ចេញពីតំបន់នោះ។
ឆ្លើយតបនឹងការអំពាវនាវពីក្រុមគ្រួសាររបស់ Barbara Lango ដែលជាជនជាតិម៉ិកស៊ិកធ្វើការឱ្យក្រុមជំនួយ Medecins Sans Frontieres (Doctors Without Borders) រដ្ឋមន្ត្រីការបរទេសម៉ិកស៊ិក លោកស្រី Alicia Barcena បានឲ្យដឹងថា លោកស្រីបានទាក់ទងជាមួយទីភ្នាក់ងារជំនួយ និងការងាររបស់អង្គការសហប្រជាជាតិ (UNRWA) ដើម្បីសុំជំនួយ។
លោកស្រី Alicia Barcena បានឲ្យដឹងនៅក្នុងការបង្ហោះនៅលើប្រព័ន្ធផ្សព្វផ្សាយសង្គម X ថាយើងកំពុងព្យាយាមនាំនាងចេញតាមរយៈប្រទេសអេហ្ស៊ីប ប៉ុន្តែអ៊ីស្រាអែលមិនអនុញ្ញាតឱ្យមានច្រករបៀងមនុស្សធម៌ ហើយក៏មិនអនុញ្ញាតឱ្យនរណាម្នាក់ចេញដែរ។
លោកស្រីបានបន្ថែមថា នេះគឺជាការអំពាវនាវជាបន្ទាន់ដល់អ៊ីស្រាអែល ពីព្រោះសូម្បីតែសង្រ្គាមក៏មានច្បាប់ដែរ។
អ្នកឃ្លាំមើលសិទ្ធិមនុស្សអ៊ុយក្រែន លោក Dmytro Lubinets បានឲ្យដឹងថា ក្រសួងការបរទេសអ៊ុយក្រែន បានផ្ញើលិខិតតវ៉ាទៅកាន់អ៊ីស្រាអែល បន្ទាប់ពីពលរដ្ឋអ៊ុយក្រែនមិនត្រូវបានអនុញ្ញាតឱ្យជម្លៀសចេញពីតំបន់ហ្គាហ្សាកាលពីថ្ងៃសៅរ៍។
លោក Dmytro Lubinets បានបន្តថា យើងមិនយល់ពីមូលហេតុដែលពលរដ្ឋអ៊ុយក្រែនមិនត្រូវបានអនុញ្ញាតឱ្យជម្លៀសចេញ ក៏ដូចជាពលរដ្ឋដទៃទៀតនៃបណ្តាប្រទេសក្រៅ។ ជាពិសេស ដូចដែលមនុស្សគ្រប់គ្នាសង្កត់ធ្ងន់ ស្ត្រីនិងកុមារគឺជាមនុស្សដំបូងគេដែលស្នើសុំឱ្យមានការជម្លៀស។
ដោយឡែក ស្ថានទូតអ៊ុយក្រែនប្រចាំនៅអ៊ីស្រាអែល បាននិយាយនៅលើបណ្តាញសង្គមថា ពលរដ្ឋអ៊ុយក្រែន ២០៧ នាក់ រួមទាំងកុមារ ៦៣ នាក់ ត្រូវបានជម្លៀសចេញពីទីក្រុង Tel Aviv ទៅកាន់ប្រទេសរ៉ូម៉ានី កាលពីថ្ងៃសៅរ៍ ហើយជើងហោះហើរមួយផ្សេងទៀតដើម្បីយកមនុស្ស ១៥៥ នាក់ចេញពីអ៊ីស្រាអែល ត្រូវបានគ្រោងសម្រាប់ថ្ងៃអាទិត្យ។
ប្រធានាធិបតីអ៊ុយក្រែនលោក Volodymyr Zelenskiy បានថ្កោលទោសការវាយប្រហារដោយក្រុមហាម៉ាសលើអ៊ីស្រាអែល ដោយអំពាវនាវឱ្យមានសាមគ្គីភាពពិភពលោកជាមួយអ៊ីស្រាអែល។
ក្រសួងការបរទេសរបស់ប្រទេសម៉ិកស៊ិកក៏បានថ្កោលទោសការវាយប្រហាររបស់ក្រុមហាម៉ាសផងដែរ ហើយប្រធានាធិបតី Andres Manuel Lopez Obrador បានបញ្ជាក់ថាលោកចង់រក្សាប្រទេសរបស់លោកអព្យាក្រឹតក្នុងជម្លោះ។
កាលពីថ្ងៃព្រហស្បតិ៍ រដ្ឋាភិបាលម៉ិកស៊ិកបានឲ្យដឹងថា ពលរដ្ឋខ្លួនរាប់រយនាក់នៅតែរង់ចាំការចេញពីអ៊ីស្រាអែល។
ប្រភព៖ Reuters
ប្រែសម្រួលដោយ៖ {ឡាយ លីហួ}
