ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក ដឹកនាំកិច្ចប្រជុំពិភាក្សាពីវឌ្ឍនភាពការងារ អាជ្ញាធរទន្លេសាប
ភ្នំពេញ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប នាថ្ងៃទី១២ ខែតុលា ឆ្នាំ២០២៣ បានអញ្ជើញដឹកនាំកិច្ចប្រជុំពិភាក្សាពីវឌ្ឍនភាពការងារ និងទិសដៅអនុវត្តបន្តឆ្នាំ២០២៣ ដោយមានការចូលរួមពីឯកឧត្តម លោក លោកស្រី អនុប្រធានអាជ្ញាធរទន្លេសាប អគ្គលេខាធិការ អគ្គលេខាធិការរង ថ្នាក់ដឹកនាំ និងមន្ត្រីបច្ចេកទេស នៃនាយកដ្ឋានចំណុះអគ្គលេខាធិការដ្ឋានអាជ្ញាធរទន្លេសាបទាំងអស់។
ឯកឧត្តម សរ គឹមសាន្ត អគ្គលេខាធិការ អាជ្ញាធរទន្លេសាបបានធ្វើសេចក្តីរាយការណ៍សង្ខេបជូនអង្គប្រជុំ និងបានឱ្យដឹងថា អគ្គលេខាធិការដ្ឋាន អាជ្ញាធរទន្លេសាបមាននាយកដ្ឋានចំនួន ០៤ ៖ ទី១)នាយកដ្ឋានរដ្ឋបាល ផែនការ និងសហប្រតិបត្តិការ ទី២)នាយកដ្ឋានធនធានធម្មជាតិ ទី៣)នាយកដ្ឋានត្រួតពិនិត្យការធ្វើអាជីវកម្ម និងអភិរក្ស ទី៤)នាយកដ្ឋាននីតិកម្ម និងផ្សព្វផ្សាយ ជាសេនាធិការសម្រាប់ការងារគ្រប់គ្រង អភិរក្ស និងអភិវឌ្ឍន៍តំបន់ទន្លេសាបប្រកបដោយចីរភាព។
ក្នុងឱកាសនោះ ឯកឧត្តមរដ្ឋមន្រ្តីបានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង ក្រោមកិច្ចសហការល្អពីគ្រប់ភាគីពាក់ព័ន្ធ និងសមិទ្ធផលដែលអាជ្ញាធរទន្លេសាបបានបំពេញនាពេលកន្លងមក ស្របតាមយុទ្ធសាស្ត្រចតុកោណ ដំណាក់កាលទី៤ និងយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តមរដ្ឋមន្រ្តី និងជាប្រធានអាជ្ញាធរទន្លេសាប បានមានប្រសាសន៍រម្លឹកអំពីបេសកកម្មស្នូលរបស់អាជ្ញាធរទន្លេសាប និងបានបញ្ជាក់ថា អាជ្ញាធរទន្លេសាប ជាអង្គភាពថ្នាក់ជាតិដែលមានភារកិច្ចសិក្សាស្រាវជ្រាវ និងសម្របសម្រួលក្នុងការគ្រប់គ្រង អភិរក្ស និងអភិវឌ្ឍន៍តំបន់ទន្លេសាបឱ្យមានប្រសិទ្ធភាព ដើម្បីធានាបាននូវផលប្រយោជន៍ប្រកបដោយនិរន្តរភាព។
ទន្ទឹមគ្នានេះដែរ ឯកឧត្តមរដ្ឋមន្ត្រីបានផ្តាំផ្ញើដល់ថ្នាក់ដឹកនាំ និងអគ្គលេខាធិការដ្ឋានអាជ្ញាធរទន្លេសាបបន្តយកចិត្តទុកដាក់អនុវត្តការងារឱ្យកាន់តែសកម្ម និងមានប្រសិទ្ធភាពថែមទៀត ដើម្បីនាំមកនូវជោគជ័យ និងសមិទ្ធផលថ្មីៗបន្ថែមទៀត ជូនស្ថាប័ន ក៏ដូចជារាជរដ្ឋាភិបាល និងប្រទេសជាតិ។
ឯកឧត្តមរដ្ឋមន្រ្តីក៏បានស្នើឱ្យពិនិត្យឡើងវិញនូវការបំពេញតួនាទីភារកិច្ចនាពេលកន្លងមក និងឆ្លុះបញ្ចាំងនូវចំណុចខ្លាំងនិងចំណុចខ្សោយក៏ដូចជាបញ្ហាប្រឈមចំពោះមុខ ដើម្បីរួមគ្នាគិតរួមគ្នាដោះស្រាយឱ្យបានទាន់ពេលវេលា ធ្វើយ៉ាងណាឱ្យការអនុវត្តផែនការសកម្មភាពឆ្នាំ២០២៣ បានជោគជ័យ។
គួរបញ្ជាក់ថា អាជ្ញាធរទន្លេសាបដែលបានបង្កើតឡើងតាំងពីឆ្នាំ២០០៩ គឺជាសេនាធិការឱ្យរាជរដ្ឋាភិបាល ដែលមានអាណត្តិការងារ ក្នុងការសម្របសម្រួលដល់ការគ្រប់គ្រង អភិរក្ស និងអភិវឌ្ឍន៍តំបន់ទន្លេសាប។ជាមួយដំណើការអនុវត្តការងារ អាជ្ញាធរទន្លេសាបក៏មានសមាសភាពជាក់ស្តែងមកពីបណ្តាក្រសួងស្ថាប័នចំនួន២៣ និងខេត្តជាប់បឹងទន្លេសាបចំនួន ៨ផងដែរ៕
