ឧត្តមសេនីយ៍ឯក អ៊ួន សារឿន៖ វិស័យហ្វឹកហ្វឺន ពិតជាមានសារៈសំខាន់ចាំបាច់ក្នុងកងពលខេមរភូមិន្ទ ដែលជាកិច្ចការអាទិភាពត្រូវដំណើរការជាប្រចាំ

ភ្នំពេញ៖ ថ្លែងក្នុងពិធីបិទវគ្គបណ្តុះបណ្តាលយោធាចារ្យបំពេញក្របខ័ណ្ឌ និងបិទវគ្គបំប៉នគ្រូបង្គោល នៅថ្ងៃទី៦ ខែតុលា ឆ្នាំ២០២៣ មូលដ្ឋានកងយោធពលខេមរភូមិន្ទ តេជោសែន ភ្នំធំម្រះព្រៅ ឧត្តម ឧត្តមសេនីយ៍ឯក អ៊ួន សារឿន មេបញ្ជាការរងកងទ័ពជើងគោក បានមានប្រសាសន៏ថា វិស័យហ្វឹកហ្វឺន ពិតជាមានសារៈសំខាន់ចាំបាច់ក្នុងកងពលខេមរភូមិន្ទ ដែលជាកិច្ចការត្រូវអនុវត្តជាប្រចាំ ។

ក្នុងន័យនេះ ឧត្តមសេនីយ៍ឯក អ៊ួន សារឿន បានមានប្រសាសន៍បន្ថែមទៀតថា វិស័យហ្វឹកហ្វឺន គឺជាការងារដ៏មានសារៈសំខាន់ចាំបាច់ ក្នុងកងយោធពលខេមរភូមិន្ទ ដើម្បីឆ្លើយតបទៅនឹងការអនុវត្តផែនការ កែទម្រង់របស់ខ្លួន ពោលគឺការងារហ្វឹកហ្វឺនជាកិច្ចការអាទិភាពដែលត្រូវដំណើរការជាប្រចាំ ដើម្បីចូលរួមចំណែកអនុវត្តគោលនយោបាយ និងយុទ្ធសាស្ត្រការពារជាតិរបស់រាជរដ្ឋាភិបាលឱ្យទទួលបានជោគជ័យ។

ឧត្តមសេនីយ៍ឯក អ៊ួន សារឿន បានថ្លែងអំណរដោយស្មោះស្ម័គ្រដល់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ដោយសម្តេចបានចូលរួមកែរទម្រង់ហេដ្ឋារចនាសម្ព័ន្ធ រឹង និងទន់ ក្នុង ខភម ពិសេសយកចិត្តទុកដាក់ទៅលើការងារហ្វឹកហ្វឺន ដោយបានបង្កើតឲ្យមានសាលាពហុជំនាញ និងសាលាបណ្តុះបណ្តាលគ្រប់កម្រិត ដើម្បីកសាងធនធានមនុស្សក្នុង ខភម ឲ្យកាន់តែរីកចម្រើន ។ ព្រមទាំងបានថ្លែងអំណរគុណ ដល់នការជួយឧបត្ថម្ភរបស់ក្រសួងការពារជាតិ អគ្គបញ្ជាការ មេបញ្ជាការកងទ័ពជើងគោក និងកងពលតូចលេខ៧០ សាលានាយទាហានសកម្ម និងវិទ្យាស្ថានកងទ័ពជើងគោក បានចាត់បញ្ជូនយោធាចារ្យជួយបង្ហាត់បង្រៀន និងខិតខំប្រឹងប្រែងផ្ទេរចំណេះដឹងដល់សិក្ខាកាមវគ្គទាំងពីរនេះ ទទួលបានលទ្ធផលល្អប្រសើរទាំងបរិមាណ និងគុណភាព និងបានធ្វើឲ្យវគ្គហ្វឹកហ្វឺនទាំងពីរវគ្គបានដំណើរការហ្វឹកហ្វឺន តាមការរំពឹងទុក ។

របាយការណ៍ផ្តល់ដោយ ឧត្តមសេនីយ៍ទោ អ៊ូ សុភា នាយសេនាធិការរង នាយការិយាល័យហ្វឹកហ្វឺន កងទ័ពជើងគោក បានឲ្យដឹងថា វគ្គហ្វឹកហ្វឺនដែលបានដំណើរការ និងបានបិទវគ្គបញ្ចប់នៅថ្ងៃនេះមានចំនួន ០២វគ្គ៖ ទី១.វគ្គហ្វឹកហ្វឺនបណ្តុះបណ្តាលយោធាចារ្យបំពេញក្របខណ្ឌបណ្តាសាលា មានរយៈពេល ០៤ខែ ដោយចាប់ផ្តើមប្រមូលផ្តុំពីថ្ងៃទី១៥ ខែមិថុនា រហូតដល់ថ្ងៃទី០៦ ខែតុលា ឆ្នាំ២០២៣ មានកម្មសិក្សាការីចំនួនរួម ៩២នាក់ ។ ជាលទ្ធផលបញ្ចប់វគ្គហ្វឹកហ្វឺនសិក្ខាកាមទទួលបាននិទ្ទេស- ល្អណាស់ ០១នាក់ និទ្ទេសល្អ ០១នាក់ និទ្ទេសល្អបង្គួរ ៥១នាក់ និងនិទ្ទេសមធ្យម ០១នាក់ ។ ទី២.វគ្គហ្វឹកហ្វឺនបំប៉នគ្រូបង្គោល សិក្សារយៈពេល ០៣ខែ ដោយចាប់ផ្ដើមប្រមូលផ្តុំពីថ្ងៃទី១៥ ខែកក្កដា រហូតដល់ថ្ងៃទី០៦ ខែតុលា ឆ្នាំ២០២៣ មានកម្មសិក្សាការីសរុបចំនួន ៨១នាក់ ។ លទ្ធផលបញ្ចប់វគ្គហ្វឹកហ្វឺន សិក្ខកាមទទួលបាននិទ្ទេស- ល្អណាស់ ០១នាក់ – ល្អ ២៧នាក់
– ល្អបង្គួរ ៣៣នាក់ ។