នាយកដ្ឋានច្រកទ្វារទី២ បើកកិច្ចប្រជុំប្រចាំខែស្ដីពីការអនុវត្តការងារប្រចាំខែកញ្ញា និងលើកទិសដៅសម្រាប់ខែបន្ទាប់
ភ្នំពេញ៖ នាយកដ្ឋានច្រកទ្វារទី២ នាព្រឹកថ្ងៃពុធ ៥រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៤ ខែតុលា ឆ្នាំ២០២៣ បានបើកកិច្ចប្រជុំកិច្ចសហប្រតិបត្តិការប្រចាំ ខែកញ្ញា និងលើកទិសដៅការងារសម្រាប់ខែបន្ទាប់ ក្រោមអធិបតីភាព ឯកឧត្តម នាយឧត្តមសេនីយ៍ ពិន ពិសិដ្ឋ ឯកឧត្តម ឧត្តមសេនីយ៍ឯក យិន គារ អគ្គនាយករង នៃអគ្គនាយកដ្ឋានអន្តោប្រវេសន៍ និងលោកឧត្តមសេនីយ៍ឯក សារិន សារីណូ ប្រធាននាយកដ្ឋានច្រកទ្វារទី២។
ក្នុងកិច្ចប្រជុំនោះក៏មានការអញ្ជើញចូលរួមពីសំណាក់លោក-លោកស្រីអនុប្រធាននាយកដ្ឋាន លោកនាយ-នាយរងការិយាល័យ លោកនាយ-នាយរងប៉ុស្តិ៍ និងនាយផ្នែកមួយចំនួន។
ជាកិច្ចចាប់ផ្តើម ឯកឧត្តម នាយឧត្តមសេនីយ៍ ពិន ពិសិដ្ឋ អគ្គនាយករង បានមានប្រសាសន៍ស្វាគមន៍ និងបើកកិច្ចប្រជុំព្រមទាំងបានលើកឡើងនូវរបៀបវារៈនៃអង្គប្រជុំ និងបានអនុញ្ញាតអោយលោកវរសេនីយ៍ឯក ស្រ៊ី ម៉េងស្រ៊ាន់ ឡេីងអានរបាយការណ៍បូកសរុបការងារប្រចាំខែកញ្ញា និងលើកទិសដៅខែបន្ទាប់។
ក្រោយមកបានអនុញ្ញាតឱ្យប៉ុស្តិ៍នគរបាលច្រកទ្វារព្រំដែនអន្តរជាតិអូរយ៉ាដាវ និងប៉ុស្តិ៍នគរបាលច្រកទ្វារកំពង់ផែអន្តរជាតិឧកញ៉ាម៉ុង បានធ្វើសេចក្តីរាយការណ៍អំពីសភាពការណ៍ទូទៅ ការអនុវត្តការងារជំនាញផ្សេងៗ បញ្ហាប្រឈម និងសំណូមពរ ជូនអង្គប្រជុំជ្រាប។
ជាកិច្ចបន្ត ឯកឧត្តម ឧត្តមសេនីយ៍ឯក ប្រធាននាយកដ្ឋាន បានណែនាំឲ្យគ្រប់បណ្ដាប៉ុស្តិ៍ទាំងអស់យកចិត្តទុកដាក់រាល់ការងារដែលថ្នាក់ដឹកនាំបានប្រគល់ជូនជាពិសេសត្រូវមានការគ្រប់គ្រងឡើងវិញនូវការចូល-ចេញរបស់ភ្ញៀវកាស៊ីណូ និងបានណែនាំដល់នាយប៉ុស្តិ៍ទាំងអស់ធ្វើការដឹកនាំបញ្ជាកម្លាំងដោយផ្ទាល់ពេលទទួលបានការណែនាំការងារជំនាញពីថ្នាក់នាយកដ្ឋាន។ ត្រូវបន្តពង្រឹងការដឹកនាំការងារជំនាញ គោរពវិន័យឱ្យបានល្អ ជាពិសេសណែនាំមន្ត្រីឱ្យជៀសឆ្ងាយពីការប្រើប្រាស់គ្រឿងញៀន និងកុំលេងល្បែងស៊ីសងខុសច្បាប់ក្នុងកាស៊ីណូ។
មុនកិច្ចប្រជុំត្រូវបានបញ្ចប់ ឯកឧត្តម នាយឧត្តមសេនីយ៍ ប្រធានអង្គប្រជុំ បានអរគុណដល់ថា្នក់ដឹកនាំ និងមន្ត្រីក្រោមឱវាទទាំងអស់ដែលបានយកចិត្តទុកដាក់បំពេញការងារបានល្អដល់នាយកដ្ឋានក៏ដូចជាថ្នាក់ដឹកនាំ និងជាតិផងដែរ ៕
