អគ្គលេខាធិការអាស៊ាន ចូលរួមកិច្ចប្រជុំរដ្ឋមន្ត្រីអាស៊ាន ស្តីពីកសិកម្ម និងរុក្ខាប្រមាញ់ លើកទី៤៥ នៅទីក្រុងគូឡាឡាំពួ និងកិច្ចប្រជុំ២ផ្សេងទៀត

ភ្នំពេញ៖ តបតាមការអញ្ជើញរបស់លោក ដាតុ Seri Haji Mohamad Bin Sabu រដ្ឋមន្ត្រីកសិកម្ម និងសន្តិសុខស្បៀងរបស់ម៉ាឡេស៊ី នាព្រឹកថ្ងៃទី០៤ ខែតុលា ឆ្នាំ២០២៣ ឯកឧត្តមបណ្ឌិត កៅ គឹមហួន អគ្គលេខាធិការអាស៊ាន បានអញ្ជើញចូលរួមកិច្ចប្រជុំរដ្ឋមន្ត្រីអាស៊ានស្តីពីកសិកម្ម និងរុក្ខាប្រមាញ់ លើកទី៤៥ នៅទីក្រុងគូឡាឡាំពួ ប្រទេសម៉ាឡេស៊ី។

កិច្ចប្រជុំនេះ ត្រូវបានធ្វើឡើងជារៀងរាល់ឆ្នាំដើម្បីពិភាក្សាពីវឌ្ឍនភាព និងកាលានុវត្តភាព នៅក្នុងកិច្ចសហប្រតិបត្តិការអាស៊ានស្តីពីស្បៀង កសិកម្ម និងរុក្ខាប្រមាញ់ ឆ្ពោះទៅសំរេចបាននូវសន្តិសុខស្បៀង ការទទួលបានទីផ្សារកាន់តែប្រសើរ ព្រមទាំងផលិតភាព និងភាពធន់ផ្នែកកសិកម្មជាដើម។

បន្ទាប់មកនៅរសៀលថ្ងៃទី៤ ខែតុលា ឆ្នាំ២០២៣ នៅទីក្រុងគូឡាឡាំពួ ប្រទេសម៉ាឡេស៊ី ឯកឧត្តមបណ្ឌិត កៅ គឹមហួន បានអញ្ជើញចូលរួមក្នុងកិច្ចរដ្ឋមន្ត្រីអាស៊ាន-ជប៉ុន ស្តីពីកសិកម្ម និងរុក្ខាប្រមាញ់។

នៅក្នុងកិច្ចប្រជុំនោះ អាស៊ាន និងជប៉ុន បានពិភាក្សាគ្នាអំពីវឌ្ឍនភាព ក្នុងការអនុវត្តផែនការកិច្ចសហប្រតិបត្តិការ MIDORI រវាងអាស៊ាន និងជប៉ុន (AJMCP) ដែលត្រូវបានដាក់ចេញកាលពីឆ្នាំមុន។

AJMCP ស្វែងរកការចូលរួមចំណែកដើម្បីសំរេចបាននូវសន្តិសុខស្បៀងរបស់អាស៊ាន តាមរយៈការបង្កើត និងផ្សព្វផ្សាយបច្ចេកវិទ្យានានា ការអភិវឌ្ឍធនធានមនុស្ស និងតាមរយៈការគាំទ្រការអនុវត្តគោលការណ៍ ណែនាំថា្នក់តំបន់របស់អាស៊ាន ជាដើម។

លុះដល់ល្ងាចថ្ងៃទី៤ ខែតុលា ឆ្នាំ២០២៣ នៅទីក្រុងគូឡាឡាំពួ ប្រទេសម៉ាឡេស៊ី ឯកឧត្តមបណ្ឌិត កៅ គឹមហួន បានបន្ដអញ្ជើញផ្តល់សន្ទរកថាស្វាគមន៍ ក្នុងការដាក់ដំណើរកម្មវិធីថ្នាក់តំបន់ស្បៀងអាហារ នវានុវត្តន៍អាស៊ាន-CGIAR ដែលមានការចូលរួមពីបណ្តារដ្ឋមន្ត្រីកសិកម្ម និងរុក្ខាប្រមាញ់អាស៊ាន និងដៃគូអភវិឌ្ឍន៍មួយចំនួន។

កម្មវិធីថ្នាក់តំបន់នេះ ស្របគ្នាជាមួយគោលបំណងរបស់អាស៊ាន ក្នុងការបង្កើនផលិតភាពផ្នែកកសិកម្ម និងកាត់បន្ថយការបាត់បង់ស្បៀង និងកាកសំណល់ស្បៀងនៅក្នុងអាស៊ាន តាមរយៈការប្រើប្រាស់ការស្រាវជ្រាវដោយបច្ចេកវិទ្យាទំនើបចុងក្រោយ និងនវានុវត្តន៍ដែលនឹងពង្រឹងភាពធន់ នៃប្រព័ន្ធកសិកម្ម ៕