រដ្ឋបាលខេត្តព្រះសីហនុ គាំទ្រយុវជនរៀបចំសង្ក្រាន្តយុវជនក្នុងខេត្ត

ព្រះសីហនុ÷រដ្ឋបាលខេត្តព្រះសីហនុ គាំទ្រយុវជនរៀបចំសង្ក្រាន្តយុវជនក្នុងខេត្ត ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីខ្មែរដែលនឹងឈានចូលមក ដល់ក្នុងពេលដ៏ខ្លីខាងមុខនេះ ពីថ្ងៃទី១៤ ដល់១៦ ខែមេសាឆ្នាំ២០២២ និងសំដៅជួយទ្រទ្រង់ដល់វិស័យអប់រំនៅក្នុងខេត្តព្រះសីហនុផងដែរ។

លោក ឡុង ឌីម៉ង់ អភិបាលរងខេត្តព្រះសីហនុបានថ្លែងនូវការគាំទ្រយ៉ាងពេញទំហឹង និងកោតសរសើរដោយស្មោះចំពោះប្អូនៗ និងក្មួយៗជាយុវជន សរុបចំនួន ១៨៤នាក់ ដែលបាន នាំគ្នាផ្តួចផ្តើម រៀបចំកម្មវិធី “សង្ក្រាន្តយុវជនវិទ្យាល័យខេត្តព្រះសីហនុ” នេះឡើង ដែលនេះ ពិតជាស្តែងឱ្យឃើញអំពីឆន្ទៈរបស់យុវជនជាទំពាំងស្នងឬស្សីក្នុងការស្វែងយល់ អភិវឌ្ឍន៍ និងអភិរក្សនូវទំនៀមទម្លាប់ ប្រពៃណី វប្បធម៌ជាតិខ្មែរដ៏ល្អផូរផង់ ជាកេរ្តិ៍តំណែលដ៏ឧត្តុងឧត្តមពីដូនតាយើងមក ។

ទន្ទឹមនឹងនេះលោកក៏បានថ្លែងនូវការកោត សរសើរ និងអរគុណចំពោះមន្ទីរ អប់រំយុវជន និងកីឡាខេត្ត និងសប្បុរសជន ដែលបានជួយគាំទ្រទាំងស្មារតី សម្ភារៈ និងថវិកា ដើម្បីជំរុញកម្មវិធីនេះឱ្យប្រព្រឹត្តទៅបានរលូន។
លោក អភិបាលរងខេត្ត បាន បញ្ជាក់ថា ខេត្តព្រះសីហនុ ក៏ដូចជាបណ្តារាជធានី-ខេត្តទូទាំងប្រទេស បានខកខានរៀបចំកម្មវិធីបុណ្យចូលឆ្នាំអស់រយៈពេល២ឆ្នាំ ដោយសារការរីករាលដាលនៃជំងឺកូវីដ-១៩ ហើយកាលពីថ្ងៃទី ៧ ខែមីនា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានប្រកាសថា កម្ពុជានឹងប្រារព្ធពិធីបុណ្យ ចូលឆ្នាំថ្មីប្រពៃណីជាតិខ្មែរ ឆ្នាំ ២០២២ ជាធម្មតាឡើងវិញ បន្ទាប់ពីរាជរដ្ឋាភិបាល បានសម្រេចបើកឱ្យដំណើរការប្រទេសឡើងវិញលើគ្រប់វិស័យ ជាមួយ នឹងការរស់នៅ និងបំពេញការងារជាមួយជំងឺកូវីដ១៩តាមគន្លងប្រក្រតីភាពថ្មី តាមរយៈការចាក់ស្រោចវ៉ាក់សាំងនៅទូទាំងប្រទេសបង្កើតភាពស៊ាំក្នុងសហគមន៍ ធ្វើឱ្យអត្រាចាក់វ៉ាក់សាំងបានកើនឡើងរហូតប្រមាណជាង ៩២ % លើចំនួនប្រជាជន ១៦លាននាក់។

លោកបានឲ្យដឹងថា ជាមួយនឹងភាពរីករាយនៃការអនុញ្ញាតឱ្យមានរៀបចំពិធី បុណ្យចូលឆ្នាំថ្មី ឆ្នាំ ខាល ២០២២ ខេត្តព្រះសីហនុ ពិតជាមានកិត្តិយសជាទីបំផុតដែលបានទទួលដំណឹងថាសម្តេចអគ្គមហាសេនាបតីតេជោ ហ៊ុន សែននាយក រដ្ឋមន្ត្រី និងសម្តេចកិត្តិព្រឹទ្ធបណ្ឌិត នឹងអញ្ជើញមកសម្រាកកម្សាន្ត ដើម្បីអបអរសាទរបុណ្យចូលឆ្នាំប្រពៃណីជាតិខ្មែរ ដែលនឹងញាំងឱ្យពិធីបុណ្យចូលឆ្នាំប្រពៃណីជាតិខ្មែរនៅខេត្តព្រះសីហនុកាន់តែមានភាពសប្បាយ រីករាយ និងមានអត្ថន័យដ៏ជ្រាលជ្រៅសម្រាប់រដ្ឋបាលខេត្ត និងប្រជាជននៃខេត្តព្រះសីហនុទាំងមូល។

លោកបានបន្ថែមថា ជាមួយនឹងភាពរីករាយនៃការប្រារព្ធពិធីបុណ្យចូលឆ្នាំប្រពៃណីជាតិនេះដែរ សូមបន្តចូលរួមទប់ស្កាត់នូវការរីករាលដាលនៃជំងឺកូវីដ-១៩ ជាពិសេសនៅតាមទីកន្លែងជួបជុំតាមទីសាធារណៈនានា ដោយ សូមចូលរួមឱ្យបានម៉ឺងម៉ាត់នូវវិធានការសុខាភិបាល និង៣កុំ ៣ការពារ ព្រមទាំងស្តង់ដារ SOP របស់ក្រសួងទេសចរណ៍ជាដើម៕