ចិនព្រមានប្រឆាំង «សង្រ្គាមត្រជាក់ថ្មី» ក្នុងអំលុងកិច្ចប្រជុំកំពូលជាមួយអាស៊ាន នៅទីក្រុងហ្សាការតា

ភ្នំពេញ៖ ឯកឧត្តម លី ឈាំង (Li Qiang) នាយករដ្ឋមន្ត្រីនៃសាធារណរដ្ឋប្រជាមានិតចិន បានឲ្យដឹងនៅថ្ងៃពុធនេះថា វាជារឿងដ៏សំខាន់មួយក្នុងការចៀសវាង «សង្រ្គាមត្រជាក់ថ្មី» នៅពេលដោះស្រាយបញ្ហាជម្លោះរវាងប្រទេសនិងប្រទេស ស្របពេលដែលក្រុមមេដឹកនាំពិភពលោក កំពុងជួបប្រជុំគ្នានៅទីក្រុងហ្សាការតានៃប្រទេសឥណ្ឌូណេស៉ី ចំពោះមុខការកើនឡើងនៃកិច្ចប្រឹងប្រែងប្រកួតប្រជែងភូមិសាស្រ្តនយោបាយ នៅទូទាំងតំបន់​ឥណ្ឌូ-ប៉ាស៉ីហ្វិក រវាងកំពូលមហាអំណាច។

ថ្លែងក្នុងអំលុងកិច្ចប្រជុំកំពូលប្រចាំឆ្នាំ ដែលមានការចូលរួមពីសំណាក់ក្រុមប្រទេសជាសមាជិកអាស៊ាន ព្រមទាំងប្រទេសចិន ជប៉ុន និងកូរ៉េខាងត្បូង ឯកឧត្តម លី ឈាំង (Li Qiang) បានលើកឡើងថា បណ្តាប្រទេសទាំងអស់ត្រូវដោះស្រាយភាពខ្វែងគំនិតគ្នា និងបញ្ហាជម្លោះឱ្យបានត្រឹមត្រូវ។

នៅក្នុងកិច្ចប្រជុំនោះ ឯកឧត្តម លី ឈាំង (Li Qiang) នាយករដ្ឋមន្រ្តីចិន បានសង្កត់ធ្ងន់ដូច្នេះថា «ពេលនេះវាជារឿងសំខាន់ខ្លាំងណាស់ ក្នុងការប្រឆាំងចំពោះការប្រកាន់បក្ខពួកនិយម ការប្រឈមមុខគ្នារវាងប្លុក ហើយនិងសង្រ្គាមត្រជាក់ថ្មី»។

អាស៊ានដែលកន្លងមកបានព្រមានជារឿយៗ អំពីគ្រោះថ្នាក់នៃការត្រូវអូសទាញឱ្យធ្លាក់ទៅក្នុង បញ្ហាជម្លោះរវាងកំពូលមហាអំណាចនោះ ក៏បាននិងកំពុងរៀបចំ កិច្ចប្រជុំកំពូលជាបន្តបន្ទាប់ជាមួយ មេដឹកនាំនៃបណ្តាប្រទេសជាដៃគូដទៃទៀតផងដែរ រួមមានទាំងសហរដ្ឋអាមេរិក ជប៉ុន កូរ៉េខាងត្បូង អូស្រ្តាលី និងឥណ្ឌា។

គួរបញ្ជាក់ថា ប្រធានាធិបតីចិន ឯកឧត្តម ស៉ី ជិនពីង ហើយនិងប្រធានាធិបតីអាមេរិក ឯកឧត្តម ចូ បៃដិន មិនបានមកចូលរួមកិច្ចប្រជុំកំពូល​ជាមួយអាស៊ាន នៅឥណ្ឌូណេស៉ីឡើយ។ សម្រាប់លោក បៃដិន គឺលោកបានបញ្ជូន អនុប្រធានាធិបតីអាមេរិក លោកជំទាវ ខាម៉ាឡា ហារីស (Kamala Harris) ឱ្យមកជំនួស ខណៈសម្រាប់ឯកឧត្តម ស៉ី ជិនពីង គឺឯកឧត្តម លី ឈាំង (Li Qiang) បានមកជំនួស ៕