ការពិគ្រោះយោបល់ និងគោលការណ៍កុងសង់ស៊ីស នៅតែជាយន្តការមិនអាចបំពានបាន ក្នុងដំណើរការធ្វើសេចក្តីសម្រេច របស់អាស៊ាន

ភ្នំពេញ៖ ក្នុងកិច្ចប្រជុំក្រុមប្រឹក្សាសម្របសម្រួលអាស៊ាន (ACC) លើកទី៣៤ នាថ្ងៃទី៤ កញ្ញា រដ្ឋមន្ត្រីការបរទេសអាស៊ានក៏បានលើកឡើងសាជាថ្មីថា ការពិគ្រោះយោបល់ និងគោលការណ៍កុងសង់ស៊ីស នៅតែជាយន្តការដែលមិនអាចបំពានបាន នៅក្នុងដំណើរការធ្វើសេចក្តីសម្រេច របស់អាស៊ាន ដែលស្របតាមធម្មនុញ្ញអាស៊ាន។

កិច្ចប្រជុំបានឯកភាពដាក់ជូននូវវិធាននីតិវិធីនៃការគាំទ្រដំណើរការធ្វើសេចក្តីសម្រេចរបស់កិច្ចប្រជុំអាស៊ាន និងឯកសារចក្ខុវិស័យសហគមន៍ អាស៊ានឆ្នាំ២០៤៥ សម្រាប់កិច្ចប្រជុំកំពូលអាស៊ានលើកទី៤៣ ដើម្បីកត់សម្គាល់ និងទន្ទឹងរង់ចាំការសម្រេចបានពេញលេញនូវឯកសារផែនការលម្អិតនិងផែនការជាយុទ្ធសាស្ត្រនៃចក្ខុវិស័យនេះ ដើម្បីអនុម័តនៅឆ្នាំ២០២៥។

កិច្ចប្រជុំបានកត់សម្គាល់នូវការឯកភាពលើក្របខ័ណ្ឌការងារសេដ្ឋកិច្ចពណ៌ខៀវអាស៊ាន ដោយក្រុមប្រឹក្សាសហគមន៍សេដ្ឋកិច្ចអាស៊ាន ដែលនឹងត្រូវដាក់ជូនកិច្ចប្រជុំអាស៊ានលើកទី៤៣ ដើម្បីអនុម័ត។ រដ្ឋមន្រ្តីការបរទេសអាស៊ានបានយល់ព្រមតាមសំណើប្រធានអាស៊ាន (ឥណ្ឌូនេស៊ី) ក្នុងការបង្កើតក្រុមការងារចំពោះកិច្ចស្តីពីសេដ្ឋកិច្ចពណ៌ខៀវ និងបានចាត់ឱ្យលេខាធិការដ្ឋានអាស៊ានសិក្សារៀបចំទម្រង់នៃការបង្កើតក្រុមការងារចំពោះកិច្ចនេះ។

រដ្ឋមន្រ្តីការបរទេសអាស៊ានបានស្វាគមន៍នូវវឌ្ឍនភាពនៃការអនុវត្តយុទ្ធសាស្រ្តស្តីពីបដិវត្តន៍ឧស្សាហកម្មទី៤ និងបានឯកភាពលើសេចក្តីព្រាងសេចក្តីថ្លែងការណ៍របស់ប្រមុខដឹកនាំអាស៊ានស្តីពី “អាស៊ានជាស្នូលនៃកំណើន” ដើម្បីដាក់ជូនកិច្ចប្រជុំកំពូលអាស៊ានលើកទី៤៣ អនុម័ត។

ពាក់ព័ន្ធនឹងផែនទីចង្អុលផ្លូវសម្រាប់សមាជិកពេញសិទ្ធិរបស់ទីម័រឡេស្តេក្នុងអាស៊ាន កិច្ចប្រជុំបានផ្លាស់ប្តូរយោបល់ស្តីពីវឌ្ឍនភាពនៃការអនុវត្តផែនទីចង្អុលផ្លូវនេះ និងបានប្តេជ្ញាចិត្តសហការគ្នាជាធ្លុងមួយ រវាងប្រទេសសមាជិកអាស៊ាន ដើម្បីជួយនៅក្នុងការធ្វើដំណើររបស់ទីម័រឡេស្តេ ដោយផ្តល់នូវបទពិសោធន៍ សមត្ថភាព និងជាពិសេសគំនិតផ្តួចផ្តើមកសាងសមត្ថភាពនានា ៕