សាខាកាកបាទក្រហមកម្ពុជាខេត្តកំពង់ចាម ប្រគល់ផ្ទះមនុស្សធម៌ ២ខ្នង ជូនពលរដ្ឋទ័លលំបាក ២គ្រួសារ នៅឃុំគគរ ស្រុកកំពង់សៀម និងឃុំសូរគង ស្រុកកងមាស
ភ្នំពេញ៖ កាលពីថ្ងៃទី៤ ខែកញ្ញា ឆ្នាំ២០២៣ ឯកឧត្តម អ៊ុន ចាន់ដា ប្រធានគណៈកម្មាធិការសាខា រួមនិង ព្រះវត្តមានព្រះឧត្តមចរិយា ព្រះបាឡាត់គណខេត្ត ស៊ាង លាង, ឯកឧត្តម អនុប្រធាន លោកជំទាវ លោក លោកស្រី សមាជិក សមាជិកាគណៈកម្មាធិការសាខា រួមនឹងព្រះមន្ត្រីសង្ឃនៃសាលាគណខេត្ត សាលាអនុគណស្រុក និងអនុសាខាស្រុក បាននិមន្ត និងអញ្ជើញចុះប្រគល់ផ្ទះទី១៥ និងទី១៦ នៅទីតាំង ២កន្លែងផ្សេងគ្នា ជាកម្មវិធីផ្ទះមនុស្សធម៌ខេត្ត ក្រោមកិច្ចសហការរវាងសាខាកាកបាទក្រហមកម្ពុជាខេត្ត និងសាលាគណខេត្តជូនពលរដ្ឋទ័លលំបាក ២គ្រួសាររួមមាន៖
១- ឈ្មោះ ញ៉ិល សុខនី អាយុ៤៩ ឆ្នាំ រស់នៅ ភូមិគគរ២ ឃុំគគរ ស្រុកកំពង់សៀម មានប្តីឈ្មោះ ស្រឿន សារិន អាយុ ៥១ ឆ្នាំ ជាជនពិការ ភ្នែក និងជើង មិនអាចធ្វើការបាន ។ ជីវភាពគ្រួសារលំបាកយ៉ាប់យ៉ឺនខ្លាំង, រស់នៅ ពឹងផ្អែកតែលើការជួយពីរាជរដ្ឋាភិបាល តាមរយ:ប័ណ្ណសមធម៌ ក្រ ២ គួបផ្សំចំណូលតិចតួច ដែលបានពី ប្រពន្ធ ដើរស៊ីឈ្នួលបោកខោអាវតាមផ្ទះ ។ពួកគាត់ រស់នៅ ក្នុងផ្ទះចាស់ទ្រុឌទ្រោម ដំបូលជញ្ជាំងធ្លុះធ្លាយ ហើយពិបាកជ្រក ពេលភ្លៀង ម្តងៗ ។
២- ឈ្មោះ ឡុំ ស្រីតូច អាយុ ឆ្នាំ រស់នៅភូមិអន្លង់អកកើត ឃុំសូរគង ស្រុកកងមាស ជាស្រ្តីមេម៉ាយពិការភ្នែក មានកូនស្រី ១នាក់ អាយុ ៣ឆ្នាំ។ រស់នៅពឹងផ្អែកតែលើអំពើសប្បុរស របស់អ្នកជិតខាង រួមជាមួយការឧបត្ថម្ភរបស់ អាជ្ញាធរភូមិឃុំ និងការជួយពីរាជរដ្ឋាភិបាល តាមរយ:ប័ណ្ណសមធម៌ ក្រ ១។ ស្រ្តីមេម៉ាយទុរគត នេះ រស់នៅក្នុងកូនខ្ទមតូចផ្ទាល់ដី ដែលរដ្ឋបាលឃុំ ផ្តល់អោយ លើដីកេរ្តិ៍ ទំហំ ៨ម×១២ម ក្នុងភូមិអន្លង់អកកើតនេះ។
មើលឃើញពីស្ថានភាពលំបាកនេះ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានសម្រេចផ្តល់ផ្ទះឈើខ្ពស់ផុតពីដី ប្រក់ស័ង្កសីភ្លីធំ (ទំហំ៤ម × ៦ម) ជូន ២គ្រួសារនេះ ដែល ១ខ្នង មានតម្លៃប្រមាណ ១០,០០០,០០០ រៀល ជាថវិកាបដិភាគ របស់សាខា សាលាគណខេត្រ អនុសាខាស្រុកសាលាអនុគណ ចៅអធិការវត្តទូទាំងស្រុកកំពង់សៀម- ស្រុកកងមាស និងសប្បុរសជន ជូន ក្រុមគ្រួសារ និង ក្មួយស្រី ឡុំ ស្រីតូច សម្រាប់ស្នាក់នៅ ជាកម្មសិទ្ធិ តទៅ។
ដើម្បីជួយសម្រាលជីវភាពរស់នៅ , សាខា បានផ្តល់សម្ភារ គ្រឿង ឧបភោគ បរិភោគ ជូនគ្រួសារ ទាំង២ សម្រាប់សង្កត់ផ្ទះថ្មីនេះ ក្នុង១គ្រួសារទទួលបាន អង្ករ ៥០គក្រ, ត្រីខ ២០កំប៉ុង, ទឹកត្រី ១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់ អាវយឺត ១២ , សាប៊ូ ដុំសម្ភារផ្ទះបាយមួយចំនួន និង ថវិកា ២០០,០០០រៀល ។
ដោយឡែក លោកតា លោកយាយ ដែលចូលរួមជាសាក្សី ក្នុងពិធីប្រគល់-ទទួលផ្ទះថ្មី ទាំង២ខ្នងនេះចំនួនសរុប ២២នាក់ ក្នុងម្នាក់ៗ ទទួលបាន អង្ករ ត្រីខ ឃីត មី ទឹកត្រី ទឹកស៊ីអ៊ីវ សាប៊ូ អាវយឺត ព្រមទាំងថវិកាចំនួន ២០,០០០ រៀល ផងដែរ៕
