ភ្នំពេញ៖នាព្រឹកថ្ងៃចន្ទ ទី២១ ខែសីហា ឆ្នាំ២០២៣នេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាអ្នកតំណាងរាស្ត្រមណ្ឌលខេត្តបាត់ដំបង អញ្ជើញចូលរួមកិច្ចប្រជុំសម័យដំបូង នីតិកាលទី៧ នៃរដ្ឋសភា ក្រោមព្រះរាជអធិបតីភាពដ៏ខ្ពង់ខ្ពស់បំផុតរបស់ ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។ ក្នុងពិធីជាប្រវត្តិសាស្ត្រនេះ ក៏មានការអញ្ជើញចូលរួមពីឥស្សរជនជាន់ខ្ពស់ អង្គទូតប្រចាំព្រះរាជាណាចក្រកម្ពុជា និងតំណាងអង្គការក្រៅរដ្ឋាភិបាលមួយចំនួនផងដែរ។
គួរបញ្ជាក់ជូនថា រដ្ឋសភាបើកសម័យប្រជុំលើកទី១ នីតិកាលទី៧នេះ ដើម្បីពិនិត្យសម្រេច អំពីសុពលភាពនៃអាណត្តិរបស់សមាជិកនីមួយៗ និង អនុម័ត បទ បញ្ជា ផ្ទៃក្នុង នៃ រដ្ឋសភា នីតិកាលទី៧ ក្រោមអធិបតីភាព របស់ សម្តេចអគ្គមហាពញាចក្រី ហេង សំរិន ព្រឹទ្ធសមាជិករដ្ឋសភា។ ដោយឡែក ពេលរសៀល តំណាង រាស្ត្រ ដែល ប្រកាស សុពល ភាព ទាំងអស់នឹងអញ្ជើញទៅស្បថនៅព្រះបរមរាជវាំង។ សម្រាប់ ថ្ងៃទី២២ ខែសីហា ឆ្នាំ២០២៣ រដ្ឋសភានឹងបន្តសម័យប្រជុំលើកទី១ លើរបៀបវារៈចំនួន១ គឺបោះឆ្នោត ដើម្បីធ្វើការជ្រើសតាំង ប្រធាន អនុប្រធានរដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋសភា និងផ្តល់ សេចក្តីទុក ចិត្តចំពោះ រាជរដ្ឋាភិបាល។
