សម្តេច សាយ ឈុំ អញ្ជើញបិទវគ្គអប់រំនយោបាយរបស់គណបក្ស កម្រិត២ ជំនាន់ទី៣ នៅវិមាន៧មករា
ភ្នំពេញ៖ សម្តេចវិបុលសេនាភក្តី សាយ ឈុំ អនុប្រធានគណបក្ស និងជាប្រធានគណៈប្រចាំការ នៃគណៈអចិន្រ្តៃយ៍គណៈកម្មាធិការកណ្តាល គណបក្សប្រជាជនកម្ពុជា នាល្ងាចថ្ងៃសៅរ៍ ៣កើត ខែស្រាព័ណ៌ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១៩ ខែសីហា ឆ្នាំ២០២៣ បានអញ្ជើញជាអធិបតី ក្នុងពិធីបិទវគ្គអប់រំនយោបាយរបស់គណបក្ស កម្រិត២ ជំនាន់ទី៣ នៅវិមាន៧មករា។
វគ្គអប់រំនយោបាយ កម្រិត២ ជំនាន់ទី៣ បានដំណើរការអស់រយះពេល៦ថ្ងៃ កន្លងមកនេះ ហើយត្រូវបញ្ចប់នាថ្ងៃនេះ ស្របពេលដែលប្រជាជនកម្ពុជាយើងទូទាំងប្រទេស បាននឹងកំពុងអបអរសាទរយ៉ាងក្លៀវក្លា ចំពោះជ័យជម្នះភ្លូកទឹកភ្លូកដីរបស់គណបក្សប្រជាជនកម្ពុជា ក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧ នៃរដ្ឋសភា កាលពីថ្ងៃទី២៣ ខែកក្កដា ឆ្នាំ២០២៣ កន្លងមកថ្មីៗនេះ។
ការអប់រំនយោបាយដល់មន្រ្តី និងសមាជិកសមាជិការបស់គណបក្សគឺជាគោលការណ៍ដ៏ចម្បងដែលមិនអាចខ្វះបាន ក្នុងការកសាងពង្រឹង ពង្រីកធនធានមនុស្សរបស់គណបក្សអោយមានភាពរឹងមាំខាងនយោបាយ សតិអារម្មណ៍ និងចាត់តាំងដើម្បីឆ្លើយតបទៅនឹងសំណូមពរ នៃសភាពការណ៍ និងភារកិច្ចរបស់គណបក្សតាមដំណាក់កាលនីមួយៗ ពិសេសក្នុងដំណាក់កាលបច្ចុប្បន្ននេះ ការអប់រំនយោបាយគឺសំដៅចូលរួមយ៉ាងសកម្ម ក្នុងការកសាងកម្លាំងបន្តវេនរបស់គណបក្ស ដែលបាននឹងកំពុងប្រព្រឹត្តទៅ នាពេលបច្ចុប្បន្ននេះ។
វគ្គអប់រំនយោបាយនេះ ពិតជានឹងជួយដល់មន្រ្តីរបស់គណបក្សយើងអោយកាន់តែយល់ច្បាស់អំពីគណបក្ស អំពីសភាពការណ៍ជាតិ និងអន្តរជាតិ អំពីភារកិច្ចព្រមទាំងមូលដ្ឋាន នៃការត្រិះរិះពិចារណា លើបញ្ហានានាប្រកបដោយវិទ្យាសាស្រ្ត ដែលជាកត្តាដ៏សំខាន់ សម្រាប់ការធ្វើសេចក្តីសម្រេចចិត្តក្នុងការដឹកនាំអោយបានត្រឹមត្រូវ គ្រប់ជ្រុងជ្រោយ និងសត្យានុម័ត ៕
