ឯកឧត្តម ឈួរ សុបញ្ញា ប្រគេនទានវស្សា ទេយ្យវត្ថុ និងបវរណាចតុបច្ច័យប្រគេនព្រះសង្ឃ ដែលនឹងគង់ចាំព្រះ វស្សាក្នុងពុទ្ធសីមាវត្តទាំង១២ និងអាស្រម១ ក្នុងឃុំក្រែក ស្រុកពញ្ញាក្រែក
ភ្នំពេញ៖ ឯកឧត្តម ឈួរ សុបញ្ញា ប្រធានក្រុមការងារគណបក្សប្រជាជនកម្ពុជាចុះជួយឃុំក្រែក រួមជាមួយគណកម្មាធិការគណបក្សឃុំក្រែក និងពុទ្ធបរិស័ទឃុំក្រែក នៅព្រឹកថ្ងៃអង្គារ ១កើត ខែទុតិយាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៨ ខែកក្កដា ឆ្នាំ២០២៣ បានប្រគេនទានវស្សា ទេយ្យវត្ថុ និងបវរណាចតុបច្ច័យប្រគេនព្រះសង្ឃ ដែលនឹងគង់ចាំព្រះ វស្សាក្នុងពុទ្ធសីមាវត្តទាំង១២ និងអាស្រម១ ក្នុងឃុំក្រែក ស្រុកពញ្ញាក្រែក ខេត្តត្បូងឃ្មុំ ដោយក្នុង១វត្តទទួលបានទាន ១គូ, ទឹកត្រី ១យួរ, អង្ករ ១០០គីឡូក្រាម, ទឹកសុទ្ធ ៥កេស, សាដក ៥, មីជាតិ ៥កេសតូច, តែ (ម៉ាកខ្លាឃ្មុំមាស) ១បាវ, ស្ករសរ ៥គីឡូក្រាម, ធូប ១ដុំ, សៀង ៥គីឡូក្រាម, ឆៃប៉ូវ ៥គីឡូក្រាម, សាប៊ូបោកខោអាវ ១កេស, សាប៊ូលាងចាន ១ធុង, ចង្ហាន់ ១ស្រាក់, បង្អែមខ្មែរនិងផ្លែមៀន ១ឈុត និងបច្ច័យ ២០ម៉ឺនរៀល។ ពិធីនេះបានរៀបចំឡើងដោយមានការនិមន្តព្រះសង្ឃ និងអញ្ជើញគណកម្មការអាចារ្យវត្តទាំង១២ និងអាស្រម១ មកជួបប្រជុំគ្នានៅក្នុងទីអាវាសវត្តឧត្តមព្រឹក្សា ហៅវត្ត៤៥។
ប្រវត្តិទៀនដែលដុតចាំព្រះវស្សា ក៏មានតំណាលដែរថា គ្រាមួយពេលដែលព្រះពុទ្ធនាម ព្រះសមណគោតម ទ្រង់យាងទៅប្រោសពុទ្ធមាតានៅស្ថានត្រៃត្រឹង មានអ្នកធ្វើទៀនមួយរូបនោះ បានធ្វើទៀនដុតចំណាំចាំព្រះវស្សា ឱ្យមានរយៈកាល៣ខែ។ ការធ្វើទៀនតម្រូវដុតបាន៣ខែនោះ ក៏ដើម្បីសម្ភាលថ្ងៃព្រះពុទ្ធយាងចុះពីស្ថានត្រៃត្រឹងវិញនោះឯង។
ការដុតទៀនឬប្រទីបសម្រាប់ថ្ងៃចូលព្រះវស្សា ដើម្បីជាប្រយោជន៍ដល់ព្រះភិក្ខុសង្ឃដែលចាំបាច់ត្រូវស្វាធ្យាយធម៌ និងធ្វើឧបោសថកម្មនៅវេលាយប់ ក្នុងពេលចូលព្រះវស្សា។ ពន្លឺភ្លើងដែលដុតក្នុងពេលចូលព្រះវស្សានេះ ក៏ស្ថិតក្នុងការពិចារណាដល់ពន្លឺភ្លើងដែលភ្លឹបភ្លែតៗ ទៅដល់រូបខណ្ឌមនុស្សដែលកើតស្លាប់នោះដែរ។
អានិសង្ឃដែលកើតចេញពីពន្លឺប្រទីបឬទៀនចាំព្រះវស្សាថាបានដល់ន័យកំចាត់ភាពងងឹតអត្តកាលឱ្យភ្លឺមានរស្មី ដោយឧបមាដល់ការមានបញ្ញាដូច្នោះឯង ៕
