ភ្នំពេញ៖ លោកឧត្តមសេនីយ៍ឯក ហែម ថា មេបញ្ជាការរងកងពលតូចលេខ៧០ តំណាងលោកឧត្តមសេនីយ៍ឯក ម៉ៅ សុផាន់ មេបញ្ជាការស្តីទី កងទ័ពជេីងគោក មេបញ្ជាការកងពលតូចលេខ៧០ កាលពីថ្ងៃទី១៧ ខែកក្កដា ឆ្នាំ២០២៣ បានអញ្ជើញជាអធិបតីភាព ក្នុងពិធីធ្វេីបាឋកថា និងផ្សព្វផ្សាយសៀវភៅ «ហ៊ុន សែន កម្ពុជា» ។
ពិធីនេះក៏មានការអញ្ជើញចូលរួមពីលោក អៀង ពិសី អ្នកនិពន្ធសៀវភៅ និងលោក ទុំប៉ែន វីរៈវិទូ ប្រធានក្រុមផ្សព្វផ្សាយសៀវភៅ ដែលប្រារព្ធឡេីងនៅទីបញ្ជាការកងពលតូចលេខ៧០។
ជាមួយគ្នានេះ លោក អៀង ពិសី ក៏បានបកស្រាយសង្ខេបអត្ថន័យសៀវភៅ «ហ៊ុន សែន កម្ពុជា» ដែលជាសៀវភៅ ប្រវត្តិសាស្ត្រនយោបាយស្តីពី «នយោបាយបង្រួបបង្រួមផ្សះផ្សាអភិវឌ្ឍជាតិ ពីគំនរបែកបាក់ដោយសារសង្គ្រាម»។
គោលបំណងនៃការដាក់ចំណងជើងសៀវភៅនេះថា «ហ៊ុន សែន កម្ពុជា» គឺមានហេតុផល៨យ៉ាង៖
១៖ នៅក្នុងចំណោមឥស្សរជនតស៊ូធំៗដែលបានរួមគ្នាវារំលំរបបប្រល័យពូជសាសន៍ ប៉ុល ពត គឺមានតែសម្តេចតេជោ ហ៊ុន សែន ម្នាក់ប៉ុណ្ណោះ មានអាយុតិចជាងគេ និងមានភាពក្លាហានចេញមុខតស៊ូប្រឆាំងនឹងរបប គ្រប់គ្រងផ្តាច់ការអមនុស្សធម៌ កាប់សម្លាប់ជាតិសាសន៍ខ្មែរឯង។
២៖ ខណៈដែលកម្ពុជាត្រូវបានរំដោះចេញពីរបបប្រល័យពូជសាសន៍ និងក្រោយដែលកម្ពុជា បានរៀបចំរចនាសម្ព័ន្ធ ដឹកនាំប្រទេសរួចរាល់ សម្ដេចតេជោក៏ត្រូវបានជ្រើសតាំងធ្វើជារដ្ឋមន្ត្រីការបរទេស ដែលមានភារកិច្ចយ៉ាងសំខាន់បំផុតនៅ ក្នុងទំនាក់ទំនងលើពិភពលោកដែលមានវ័យក្មេងជាងគេបំផុត។
ទី៣៖ ដំណើរការចរចានអនុសញ្ញាសន្តិភាពក្រុងប៉ារីស ឆ្នាំ១៩៩៣ សម្តេចតេជោ គឺជាដៃគូដ៏សំខាន់តំណាងឱ្យរដ្ឋាភិបាលក្រុងភ្នំពេញ ចរចាជាមួយនឹងសម្តេចព្រះនរោត្តម សីហនុ នៅបណ្តាប្រទេសអាស៊ី និងអឺរ៉ុប។
ទី៤៖ សម្តេចតេជោ ជាអ្នកនយោបាយដ៏សំខាន់នៃការរៀបចំ និងបង្កើតឱ្យមានការបោះឆ្នោតជាសកលនៅកម្ពុជា សាជាថ្មីដោយអង្គការសហប្រជាជាតិនាឆ្នាំ១៩៩៣កន្លងទៅ។
ទី៥៖ សម្តេចតេជោ ហ៊ុន សែន ជានាយករដ្ឋមន្ត្រីបម្រើជាតិ និងប្រជាជនតាំងពីឆ្នាំ១៩៨៥ ប្រកបដោយគតិបណ្ឌិតដឹកនាំ។
ទី៦៖ នៅមុនការបោះឆ្នោតឆ្នាំ១៩៩៣ សម្តេចតេជោ បានផ្លាស់ប្ដូរទីផ្សារផែនការមកទីផ្សារសេរីដែលនាំឱ្យមានការ ប្រកួតប្រជែងផលិតផលនាំចេញនាំចូលទាំងនៅក្នុងស្រុក និងនៅក្រៅស្រុក។
ទី៧៖ ឆ្នាំ១៩៩៦ សម្តេចតេជោ បានបង្កើតឱ្យមានគោលនយោបាយឈ្នះឈ្នះ ទទួលបានជោគជ័យនៅដំណាក់កាល ទី១និងបន្តបន្ទាប់ទៀតរហូតរំលត់សង្គ្រាមរ៉ាំរ៉ៃផ្ទៃក្នុងនាំមកនូវសុខសន្តិភាពទូទាំងប្រទេសដែលត្រូវបានកំណត់យកនៅថ្ងៃ
ទី២៩ ខែធ្នូ ឆ្នាំ១៩៩៨។
ទី៨៖ ចាប់ពីឆ្នាំ២០០០មក ប្រទេសកម្ពុជាក្រោមការដឹកនាំប្រកបដោយគតិបណ្ឌិតនៃសម្ដេចតេជោ បាននាំសេដ្ឋកិច្ចជាតិ មានកំណើនយ៉ាងឆាប់រហ័សក្នុងអត្រា៧% ក្នុង១ឆ្នាំជាកត្តានាំឱ្យជីវភាពប្រជាជនបានល្អប្រសើរគួរជាទីមោទនភាព។
សៀវភៅនេះត្រូវបានបែងចែកជា៤ផ្នែកធំៗគឺផ្នែកទី១៖ ពាក្យរាយ (ទំព័រទី១-៥៦៩) សរសេរពីបរិការណ៍នយោបាយកម្ពុជា,ផ្នែកទី២៖ ពាក្យកាព្យ (ទំព័រ៥៧០-៦១២) និពន្ធជាបែបបទអក្សរសិល្ប៍, ផ្នែកទី៣៖ អនុសាសន៍ប្រកបដោយគតិបណ្ឌិតនៃ សម្ដេចតេជោ ហ៊ុន សែន (ទំព័រ៦១៣-៨៦៨), ផ្នែកទី៤៖ ឧបសម្ពន្ធ រូបភាព (ទំព័រ៨៦៩-១០៥៧)៕
