អ៊ីស្រាអែលនឹងទិញយន្តហោះបំបាំងកាយ F-៣៥ ចំនួន ២៥ គ្រឿងបន្ថែមទៀត ក្នុងតម្លៃ ៣ ពាន់លានដុល្លារ
បរទេស៖ ក្រសួងការពារជាតិអ៊ីស្រាអែលបានឲ្យដឹងកាលពីថ្ងៃអាទិត្យថា អ៊ីស្រាអែលបានយល់ព្រមលើការទិញក្រុមទី ៣ នៃយន្តហោះចម្បាំងបំបាំងកាយ F-៣៥ នៅក្នុងកិច្ចព្រមព្រៀងដែលមានតម្លៃ ៣ ពាន់លានដុល្លារ។
ក្រសួងការពារជាតិអ៊ីស្រាអែលបានបន្តថា យន្តហោះ ចំនួន ២៥ គ្រឿងបន្ថែមដែលផលិតដោយក្រុមហ៊ុន Lockheed Martin នឹងនាំចំនួនយន្តហោះ F-៣៥ នៅក្នុងកងទ័ពអាកាសរបស់អ៊ីស្រាអែលដល់ ៧៥ គ្រឿង ដោយបន្ថែមថាកិច្ចព្រមព្រៀងនេះនឹងត្រូវបានផ្តល់ហិរញ្ញប្បទានតាមរយៈកញ្ចប់ជំនួយការពារជាតិដែលអ៊ីស្រាអែលទទួលបានពីសហរដ្ឋអាមេរិក។
អ៊ីស្រាអែលជាប្រទេសដំបូងគេនៅក្រៅសហរដ្ឋអាមេរិក ដែលបានទិញយន្តហោះ F-៣៥។ កាលពីខែឧសភា ឆ្នាំ២០១៨ មេទ័ពអាកាសអ៊ីស្រាអែលបានឲ្យដឹងថា អ៊ីស្រាអែលគឺជាប្រទេសដំបូងគេដែលប្រើយន្តហោះនេះក្នុងការប្រយុទ្ធ។
យន្តហោះ F-៣៥ ត្រូវបានគេស្គាល់ថាជា Joint Strike Fighter និងនៅអ៊ីស្រាអែលតាមឈ្មោះជាភាសាហេប្រ៊ូ “Adir” (Mighty)។
ក្រសួងការពារជាតិអ៊ីស្រាអែល បានបន្ថែមថា ក្រុមហ៊ុន Lockheed Martin និងក្រុមហ៊ុនផលិតម៉ាស៊ីន Pratt & Whitney បានយល់ព្រមចូលរួមជាមួយក្រុមហ៊ុនការពារជាតិអ៊ីស្រាអែល ក្នុងការផលិតគ្រឿងបន្លាស់យន្តហោះ F-៣៥។
ប្រភព៖ CNBC
ប្រែសម្រួលដោយ៖ [ឡាយ លីហួ]
