អ្នកនាំពាក្យក្រសួងការពារជាតិចិន៖ កិច្ចសហប្រតិបត្តិការសន្តិសុខទ្វេភាគី ពហុភាគីត្រូវតែអំណោយផលដល់សន្តិភាព ស្ថិរភាពក្នុងតំបន់

ប៉េកាំង៖ អ្នកនាំពាក្យក្រសួងការពារជាតិចិន នៅថ្ងៃព្រហស្បតិ៍នេះ បានព្រមានបណ្តាប្រទេសនៅសមុទ្រចិនខាងកើត និងតំបន់សមុទ្រចិនខាងត្បូង ឱ្យចៀសវាងការបង្កគ្រោះថ្នាក់ដល់ខ្លួន ខណៈកំពុងប្រថុយប្រថានដល់អ្នកដទៃ។

លោក Zhang Xiaogang អ្នកនាំពាក្យក្រសួងការពារជាតិចិនបានធ្វើការកត់សម្គាល់នៅពេលត្រូវបានស្នើសុំឱ្យធ្វើអត្ថាធិប្បាយលើកិច្ចប្រជុំសន្តិសុខត្រីភាគីរវាងសហរដ្ឋអាមេរិក ជប៉ុន និងហ្វីលីពីន នៅក្នុងសន្និសីទកាសែតទៀងទាត់មួយ។

លោក Zhang Xiaogang បានឲ្យដឹងថា ស្ថានភាពនៅសមុទ្រចិនខាងកើត និងតំបន់សមុទ្រចិនខាងត្បូង ជាទូទៅមានស្ថិរភាពនាពេលបច្ចុប្បន្ន។ ប្រទេសមួយចំនួននៅខាងក្រៅតំបន់ ដើម្បីផលប្រយោជន៍អាត្មានិយមរបស់ពួកគេ បាននិងកំពុងភក់នៅក្នុងដែនទឹក តាមរយៈការបង្កហេតុខាងយោធា និងការប្រឈមមុខដាក់គ្នាក្នុងប្លុក ដែលបានធ្វើឱ្យភាពតានតឹងក្នុងតំបន់កាន់តែធ្ងន់ធ្ងរឡើង។

អ្នកនាំពាក្យរូបនេះបានសង្កត់ធ្ងន់លើជំហរជាប់លាប់របស់ចិនថា កិច្ចសហប្រតិបត្តិការសន្តិសុខទ្វេភាគី និងពហុភាគីត្រូវតែអំណោយផលដល់សន្តិភាព និងស្ថិរភាពក្នុងតំបន់ ហើយមិនគួរកំណត់គោលដៅភាគីទីបី ឬប៉ះពាល់ដល់ផលប្រយោជន៍ភាគីទីបីឡើយ។

លោក Zhang Xiaogang បានបញ្ជាក់ថា យើងជំរុញឱ្យប្រទេសពាក់ព័ន្ធបញ្ឈប់ការប៉ះពាល់ដល់អធិបតេយ្យភាពដែនដី និងសិទ្ធិ និងផលប្រយោជន៍ដែនសមុទ្ររបស់ចិន ហើយឈប់និយាយ ឬធ្វើអ្វីដែលធ្វើឱ្យស្ថានការណ៍កាន់តែស្មុគស្មាញ។

លោកបានបន្ថែមថា យោធាចិននឹងឃ្លាំមើលយ៉ាងដិតដល់ចំពោះការផ្លាស់ប្តូរណាមួយនៅក្នុងស្ថានភាព ហើយចាត់វិធានការយ៉ាងម៉ឺងម៉ាត់ និងរឹងមាំដើម្បីការពារអធិបតេយ្យភាពជាតិ សន្តិសុខ និងផលប្រយោជន៍អភិវឌ្ឍន៍។

ប្រភព៖ Xinhua

ប្រែសម្រួលដោយ៖ [ឡាយ លីហួ]