ឯកឧត្តមបណ្ឌិត សូ ណារ៉ូ៖ រឿងមិនមានឈ្មោះបោះឆ្នោត របស់បក្សភ្លើងទៀន គឺជាចេតនារបស់បក្សនេះផ្ទាល់ ហើយជាល្បិចស្វាស៉ីបាយលាបមាត់ពពែ
ភ្នំពេញ៖ ឯកឧត្តមបណ្ឌិត សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី បានលើកឡើងថារឿងមិនមានឈ្មោះប្រកួតប្រជែងការបោះឆ្នោតជ្រើសតាំងតំណាងរាស្ត្រ នីតិកាលទី៧ ដោយគ្មានឯកសារគ្រប់គ្រាន់ គឺលិខិតចុះឈ្មោះផ្លូវការច្បាប់ដើម របស់គណបក្សភ្លើងទៀន គឺជាចេតនាមួយ ចង់ទម្លាក់កំហុសលើ គណៈកម្មាធិការជាតិរៀបចំការបោះឆ្នោត (គ.ជ.ប) និងដើម្បីថា សម្តេចតេជោ ហ៊ុន សែន ជាអ្នកគ្រប់គ្រងលើ (គ.ជ.ប)។
ឯកឧត្តមបណ្ឌិត បានលើកឡើងបែបនេះក្នុងអំឡុងពេលធ្វើសន្និសីទសារព័ត៌មានមួយ នារសៀលថ្ងៃទី២៤ ខែមិថុនា ឆ្នាំ២០២៣ នៅវិមានសន្តិភាព ក្រោយធ្វើមាតុភូមិនិវត្តន៍ បន្ទាប់ពីចាកចេញពីកម្ពុជាអស់រយៈពេល ១១ឆ្នាំ។
ឯកឧត្តមបណ្ឌិត សូ ណារ៉ូ បានថ្លែងថា ការមិនមានឈ្មោះប្រកួតប្រជែងការបោះឆ្នោតជ្រើសតាំងតំណាងរាស្ត្រ នីតិកាលទី៧ គឺជាល្បែងនយោបាយ ដែលបង្កើតឡើងដោយគណបក្សភ្លើងទៀន ខ្លួនឯងតែម្តង ពោលគឺជារឿងស្វាស៉ីបាយលាបមាត់ពពែ។ លោកបន្តថា លិខិតដើមរបស់គណបក្សភ្លើងទៀន ប្រហែលជានៅប្រទេសបារាំង។
ឯកឧត្តមបណ្ឌិត សូ ណារ៉ូ បានថ្លែងបន្តថា បើបងប្អូនចង់ធ្វើបាតុកម្ម ទាមទារឲ្យគណបក្សភ្លើងទៀនមានវត្តមាន សម្រាប់ការបោះឆ្នោតខាងមុខ សូមធ្វើបាតុកម្មនៅប្រទេសបារាំង ទើបត្រឹមត្រូវ មិនមែនយកកំហឹង ទៅខឹងនឹងគជប នោះទេ ព្រោះតែ (គ.ជ.ប) ចុះឈ្មោះគ្រប់គណបក្សនយោបាយ ដែលមានឯកសារគ្រប់គ្រាន់។ ឯកឧត្តមបណ្ឌិត បានអះអាងថា នេះមិនមែនជាលិខិតដែលបាត់ទេ តែជាលិខិតដែលគេមិនចង់បង្ហាញ ដើម្បីឲ្យគេថា សម្តេចតេជោ ហ៊ុន សែន គ្រប់គ្រងលើ (គ.ជ.ប)។
ឯកឧត្តមបណ្ឌិត សូ ណារ៉ូ កត់សម្គាល់ទៀតថា ការលាក់លិខិតនេះ ក៏ជាចេតនារបស់គណបក្សភ្លើងទៀន ឲ្យគណបក្សប្រជាជនកម្ពុជា ប្រឈមមុខនឹងសហគមន៍អន្តរជាតិ និងមិនឲ្យសហគមន៍អន្តរជាតិ មិនទទួលស្គាល់ការបោះឆ្នោតនៅកម្ពុជា។
សូមជម្រាបថា នៅថ្ងៃទី២៥ ខែឧសភា ឆ្នាំ២០២៣ ក្រុមប្រឹក្សាធម្មនុញ្ញ បានសម្រេចបដិសេធចោលបណ្តឹងរបស់បក្សភ្លើងទៀន និងបក្សមហាសាមគ្គីជាតិខ្មែរ ជុំវិញការមិនចុះបញ្ជីឈ្មោះចូលរួមបោះឆ្នោតជ្រើសតាំងតំណាងរាស្ត្រពីសំណាក់ គណៈកម្មាធិការជាតិរៀបចំការបោះឆ្នោត។ ការបោះឆ្នោតជ្រើសតាំងតំណាងរាស្ត្រនីតិកាលទី៧ មានគណបក្សចំនួន ១៨ ចូលរួម ៕
